Rōmano 15:1-33
15 A tātou, te nuꞌu ꞌite riva-riva i te meꞌe o ruŋa i te ꞌAtua, e haꞌaoromaꞌi te taꞌe aŋa o te tātou taina i te meꞌe manaꞌu e rāua he meꞌe taꞌe haꞌatiꞌa e te ꞌAtua. ꞌIna ko aŋa i te meꞌe mo koa o tātou nō.
2 Ki aŋa tahi tātou i te meꞌe hai haŋa mo haka koa ꞌe mo hāꞌūꞌū i te taina, ꞌe mo ꞌata ꞌite o tātou taꞌatoꞌa o ruŋa i te meꞌe o te ꞌAtua.
3 A Ietū, paꞌi, ꞌina kai aŋa i te meꞌe mo tōꞌona koa mau nō. ꞌI ruŋa i a ia i haka tano ai te meꞌe kī ꞌi ruŋa i te ⸤Pāpaꞌi Moꞌa⸥ pē nei ē: «Te vānaŋa taꞌe tano kī era mōꞌou, ꞌi ruŋa i a au i topa mai ai».
4 Te meꞌe taꞌatoꞌa pāpaꞌi ꞌi muꞌa ꞌā ꞌi ruŋa i te Pāpaꞌi Moꞌa i pāpaꞌi ai mo ꞌite o tātou i te haꞌaoromaꞌi i te ꞌati topa mai, ꞌe mo haka pūai i te manaꞌu mo aŋi-aŋi riva-riva pē nei ē: e ko taꞌe aŋa e te ꞌAtua i te meꞌe taꞌatoꞌa hōrea mai e ia.
5 O te ꞌAtua, vaꞌai i te ꞌite mo haꞌaoromaꞌi i te ꞌati ꞌe i te pūai mo haka hio-hio i te tātou manaꞌu, te hāꞌūꞌū atu i a kōrua mo noho ꞌi roto i te haumārū, pa he nuꞌu te rāua noho iŋa pē Ietū Kiritō ꞌā,
6 mo haꞌahana-hana tahi o kōrua i te ꞌAtua, he Matuꞌa o te tātou Pūꞌoko Haka Tere ko Ietū Kiritō hai manaꞌu mau nō e tahi.
7 ꞌO ira, ꞌi roto i a kōrua, e haŋa e tahi ki te rua pa he taina, pa he haŋa iŋa o Ietū ki a kōrua, ki haꞌahana-hana tahi ai te taŋata ki te ꞌAtua.
8 ꞌIna ko rehu i a kōrua: a Ietū i oho mai ai mo tāvini ki te ⸤hūrio⸥, mo tano o te hōrea vaꞌai era ki te mātou tupuna ꞌi muꞌa ꞌā, ꞌe mo haka takeꞌa: te ꞌAtua e haka tano rō ꞌana i tāꞌana hōrea.
9 I oho takoꞌa mai ai mo haꞌahana-hana o te nuꞌu taꞌe he hūrio ki te ꞌAtua ꞌo tōꞌona riva rahi, pa he meꞌe kī ꞌi ruŋa i te Pāpaꞌi Moꞌa:«ꞌI muꞌa o te taŋata taꞌatoꞌa o te aoka haꞌahana-hana atu ena a au ki a koe,ꞌe he hīmene atu i te hīmene mōꞌou».
10 ꞌI te kona haka ꞌou e tahi o ruŋa i te Pāpaꞌi Moꞌa e kī ena:«¡Ka koa tahi kōrua, e te nuꞌu taꞌe hūrio ē, ananake ko te hūrio,he nuꞌu haꞌataꞌa e te ꞌAtua māꞌana!».
11 ꞌE ꞌi te kona haka ꞌou e tahi e kī ena:«E te hau taꞌatoꞌa o te ao ē,¡e haꞌahana-hana ki te ꞌAtua!».
12 I pāpaꞌi takoꞌa rō e te perofeta era ko ꞌItaia:«Mai te hakaara o te taŋata ko Hētē*ka eꞌa mai ena te kope mo haka tere i te nuꞌu taꞌe he hūrio,ꞌe ꞌi ruŋa ka ŋatu ena i te rāua haŋu».
13 Mo te ꞌAtua haka aŋi-aŋi mai e haka tano rō ꞌana i tāꞌana hōrea e ꞌata haka koa ꞌe e ꞌata haka haumārū atu i a kōrua i te nuꞌu ⸤haka moe i te manaꞌu⸥ ꞌi ruŋa i a ia, ꞌe māꞌana takoꞌa e ꞌata haka aŋi-aŋi atu, hai pūai o te ⸤Vārua Maitai⸥, e ko taꞌe aŋa a ia i tāꞌana meꞌe hōrea.
Te aŋa ꞌa Pauro pa he ⸤ꞌāpōtoro⸥
14 E te taina ōꞌoku ē, e ꞌite riva-riva rō ꞌana a au: te kōrua noho iŋa noho iŋa tano ki te mata o te ꞌAtua, ko ꞌite riva-riva ꞌana kōrua o ruŋa i te hāpī parautiꞌa ꞌāꞌana, ꞌe e tano rō ꞌana mo hāꞌūꞌū ꞌi roto i a kōrua ꞌā mo haka tika o ruŋa i te meꞌe haŋa o te ꞌAtua.
15 Ka ai atu pē ira, ꞌi ruŋa i te parau nei, ko pāpaꞌi ko haka ꞌite atu ꞌana a au o ruŋa i te tētahi meꞌe, ꞌo rehu i a kōrua. I pāpaꞌi atu ai ꞌo te ai te ꞌAtua hai riva rahi ōꞌona ko haka ꞌāpōtoro ꞌā i a au
16 mo tāvini ki a Ietū Kiritō mo te riva-riva o te nuꞌu taꞌatoꞌa taꞌe he hūrio. Tāꞌaku aŋa pa he aŋa ꞌā o te ⸤oromatuꞌa⸥: he haka ꞌite ki te nuꞌu taꞌe he hūrio i te ⸤roŋo riva-riva o te ꞌAtua⸥, ki haka moe ai a rāua i te manaꞌu ꞌi ruŋa i a Ietū. Pē ira ka ai ena a rāua pa he meꞌe mo vaꞌai ki te ꞌAtua mo tōꞌona koa haka maꞌitaki e te Vārua Maitai.
17 ꞌE, ꞌi te ai ōꞌoku ꞌa Ietū Kiritō, e tano nō a au mo koa o ruŋa i tāꞌaku aŋa mo te ꞌAtua.
18 Ka ai atu pē ira, tāꞌaku meꞌe nō mo ꞌaꞌamu atu he meꞌe i aŋa e te ⸤Kiritō⸥ mo haꞌatura o te nuꞌu taꞌe he hūrio ki te ꞌAtua hai meꞌe kī ꞌe aŋa e au,
19 ꞌe, takoꞌa, hai mana aŋa e au hai pūai vaꞌai mai e te Vārua o te ꞌAtua. Pē ira i haka mao riva-riva ai a au i te aŋa vaꞌai mai he haka ꞌite he oho i te roŋo riva-riva o ruŋa i te Kiritō mai Hērutarema ki te kona taꞌatoꞌa, ꞌātā ka tuꞌu rō ki Iriria.
20 ꞌI tōꞌoku ara, tāꞌaku meꞌe aŋa he haka ꞌite i te roŋo riva-riva o te ꞌAtua a te kona kai ꞌite ꞌā o ruŋa o Ietū Kiritō, ꞌo aŋa ꞌo oho a te kona ko haꞌamata era ꞌā te aŋa e te rua.
21 Hai aŋa nei ꞌāꞌaku i haka tano ai te vānaŋa kī ꞌi ruŋa i te Pāpaꞌi Moꞌa pē nei ē:«Te nuꞌu taꞌe ꞌite o ruŋa i a ia ko rāua te nuꞌu ka ꞌite ena ko ai a ia;te nuꞌu taꞌe ŋaroꞌa o ruŋa i a ia ko rāua te nuꞌu ka aŋi-aŋi ena i tāꞌana roŋo».
He manaꞌu iŋa o Pauro mo oho ki Roma
22 I rahi rō tōꞌoku mahana i manaꞌu mo oho atu mo uꞌi i a kōrua, ꞌe, ꞌi te rahi o tāꞌaku aŋa, e taꞌe ravaꞌa nei a au mo oho atu.
23 ꞌE, hora nei, ꞌi te oti o tāꞌaku aŋa ꞌi te ŋā kona nei, ꞌe ꞌi te rahi o tōꞌoku matahiti haŋa mo oho atu ki a kōrua ꞌi Roma,
24 ko manaꞌu ꞌana a au mo hipa atu ꞌi tōꞌoku ara ka oho nei ki Paniora. Ki tuꞌu atu a au ꞌe ki koa tātou, ka ai atu mahana taꞌe rahi, he oho haka ꞌou a au ꞌi tōꞌoku ara hai hāꞌūꞌū o kōrua.
25 ꞌĪ a au he oho ꞌi te hora nei ki Hērutarema, he maꞌu i te meꞌe mo hāꞌūꞌū o te ŋā taina era o ira.
26 Ko haka taka-taka ꞌana, paꞌi, e te taina o Mātērōnia ꞌe o Ākāia i te moni mo haka maꞌu mo te taina veve o Hērutarema.
27 Te meꞌe nei i aŋa ai hai manaꞌu o rāua, ka ai atu he meꞌe mau ꞌana mo aŋa e rāua. Pa he haka ꞌite iŋa era ꞌā e te hūrio o ruŋa i te rāua hauhaꞌa, he roŋo riva-riva o te ꞌAtua, ki te nuꞌu taꞌe he hūrio, pē ira takoꞌa ꞌana te nuꞌu taꞌe hūrio ana hāꞌūꞌū ꞌi te hora nei hai hauhaꞌa o rāua o te ao nei mo te hūrio haka moe i te manaꞌu ꞌi ruŋa i a Ietū.
28 Ki vaꞌai ki oti a au i tū meꞌe vaꞌai mai era e rā nuꞌu, he oho au ki Paniora ꞌe, ꞌi tōꞌoku ara ki ira, ka hipa atu ena a au ki a kōrua ꞌi Roma.
29 ꞌE, ko ꞌite riva-riva ꞌana a au pē nei ē: ki tuꞌu atu a au, ka ꞌata haꞌamaitai mai ena e te Kiritō i a tātou taꞌatoꞌa.
30 E te taina, ꞌi te ai o tātou taꞌatoꞌa ꞌa Ietū Kiritō, he Pūꞌoko Haka Tere o tātou, ꞌe ꞌi te ai o te haŋa ꞌi roto i a tātou vaꞌai mai e te Vārua Maitai, he ani atu a au: e pure kōrua ki te ꞌAtua mōꞌoku.
31 E ani kōrua ki a ia mo hāpaꞌo i a au ꞌo tōtōā mai e te nuꞌu taꞌe haka moe i te manaꞌu ꞌi ruŋa i a Ietū o Hūrea, ꞌe e ani takoꞌa mo koa o te ŋā taina era o Hērutarema ꞌo tū meꞌe era mo maꞌu e au.
32 Pē ira, ki oti te aŋa nei, he oho atu a au ki a kōrua, ana haŋa te ꞌAtua, hai koa, mo haka ora ꞌe mo haka pūai haka ꞌou i te tātou manaꞌu.
33 Ka noho riva-riva kōrua, ꞌe mo te ꞌAtua, kope vaꞌai i te haumārū, e hokorua atu i a kōrua taꞌatoꞌa. ⸤ꞌĀmene⸥.
