Rōmano 7:1-25
7 E te taina, ko ꞌite riva-riva ꞌana a kōrua o ruŋa i te ⸤haka tere iŋa ꞌa Mōtē⸥ ꞌe, ko ꞌite takoꞌa ꞌā: ꞌina e tahi pūai o te haka tere iŋa nei ꞌi ruŋa i te taŋata mate.
2 Pē nei te auraꞌa: te viꞌe ⸤hāipo-ipo⸥ ki te taŋata e tahi he viꞌe mau rō ꞌai o rā taŋata ꞌi te hora e ora nō ꞌā. ꞌE, mo mate o rā kenu, taꞌe rā viꞌe viꞌe hāipo-ipo toe.
3 Mo noho ki te rua taŋata e ora nō ꞌā tāꞌana kenu, e taiꞌata ꞌā. ꞌE, mo mate, e tano nō rā viꞌe mo hāipo-ipo haka ꞌou ki te rua taŋata, ꞌe taꞌe e taiꞌata ꞌā ꞌi te ai taꞌe a ia he viꞌe hāipo-ipo toe.
4 Pē ira takoꞌa a kōrua, e te taina ōꞌoku ē. ꞌIna he pūai toe o te haka tere iŋa ꞌa Mōtē ꞌi ruŋa i a kōrua. I mate era a Ietū mo tātou, ko mate takoꞌa ꞌā a tātou ꞌi muri. Pē ira i kore ai te pūai o rā haka tere iŋa mai ruŋa i a tātou, ꞌe ꞌi te hora nei te meꞌe i a tātou he pūai o te kope ora haka ꞌou mai era mai te mate mo aŋa o tātou i te meꞌe haŋa o te ꞌAtua.
5 Hora era ꞌi roto i te hara ꞌana a tātou, te aŋa o te haka tere iŋa ꞌa Mōtē he haka poreko ꞌi roto i a tātou rauhuru atu manaꞌu taꞌe tano, ꞌe te meꞌe mau nō i ravaꞌa mai rā ŋā meꞌe he mate.
6 ꞌE hora nei, ꞌina he pūai toe o te haka tere iŋa ꞌa Mōtē ꞌi ruŋa i a tātou. Ko tano ꞌana ia a tātou ꞌi te hora nei mo aŋa i te meꞌe haŋa o te ꞌAtua, taꞌe ꞌō hai oho iŋa tuai haꞌatura ki te haka tere iŋa ꞌa Mōtē, hai oho iŋa ꞌāpī hāꞌūꞌū mai e te ⸤Vārua Maitai⸥.
Te haka tere iŋa ꞌa Mōtē
7 ¿Ka kī ꞌō te haka tere iŋa era ꞌa Mōtē meꞌe rake-rake? ¡Taꞌe pē ira! ꞌĀhani ꞌina he haka tere iŋa era ꞌa Mōtē, e ko ꞌite mai he aha te meꞌe he hara, te auraꞌa, e ko ꞌite mai he aha te meꞌe he nou-nou ꞌāhani i taꞌe haka ꞌite mai: «ꞌIna ko nou-nou».
8 Mo taꞌe ai, paꞌi, o te haka tere iŋa mo haꞌatura, te hara he meꞌe mate. Te ꞌati nō, he toꞌo mai e te huru hara ōꞌoku i te roŋo nei «ꞌina ko nou-nou», he haka poreko ꞌi roto i a au i te nou-nou mo te meꞌe rahi nō atu meꞌe.
9 ꞌI te hora kai ꞌite ꞌana a au o ruŋa i te haka tere iŋa ꞌa Mōtē e riva-riva rō ꞌana a au e noho era, ki tōꞌoku manaꞌu. ꞌE, i ꞌite era a au o ruŋa, ꞌi rā hora i aŋi-aŋi iho ai e au he taŋata hara ꞌō tū au era
10 ꞌe e ꞌava-ꞌava rō ꞌana e noho era mai te ꞌAtua. Pē ira, te haka tere iŋa nei ꞌa Mōtē, he meꞌe mo maꞌu i a tātou a te ara o te ora, i riro ai he meꞌe mo maꞌu i a tātou ki te mate.
11 Pē nei te auraꞌa: ko toꞌo mai ꞌā e te huru hara o te taŋata i te haka tere iŋa ꞌa Mōtē, ko haꞌariro ꞌā pa he meꞌe ꞌāꞌana, mo reo-reo mai pē nei ē: mo haꞌatura ōꞌoku ki rā haka tere iŋa, he ravaꞌa e au i te ora ꞌāpī ꞌina he hopeꞌa raꞌa. ꞌE, i hopeꞌa ai, hai rā haka tere iŋa mau ꞌā, i haꞌataꞌa ai i a au mai muri i te ꞌAtua ꞌi te taꞌe ravaꞌa e au mo haꞌatura tahi.
12 Te parautiꞌa mau, te haka tere iŋa ꞌa Mōtē ꞌe te roŋo hāꞌaki o ruŋa he meꞌe riva-riva, tano ꞌe hopeꞌa o te moꞌa.
13 ¿Te kī ia: o te meꞌe riva-riva nei i maꞌu i a au ki te mate? ¡Taꞌe pē ira! O te huru hara o tātou te maꞌu i a tātou ki te mate, ꞌe i meꞌe ai hai meꞌe riva-riva. Hai haka tere iŋa, paꞌi, ꞌa Mōtē e aŋi-aŋi ena i te taparahi-taꞌata o te meꞌe ena he hara.
14 A tātou e ꞌite rō ꞌana: te haka tere iŋa ꞌa Mōtē meꞌe riva-riva, he meꞌe vaꞌai e te Vārua o te ꞌAtua. ꞌE a au pa he taŋata ꞌina ōꞌoku pūai ꞌi muꞌa o te hara. E tuꞌu rō ꞌana a au pa he ꞌekaravo o te hara.
15 E tano rō ꞌā te mahana e māere rō ꞌana a au i tāꞌaku meꞌe aŋa. ꞌIna, paꞌi, a au he aŋa i tāꞌaku meꞌe riva-riva haŋa mo aŋa. He meꞌe hopeꞌa o tōꞌoku taꞌe haŋa tāꞌaku meꞌe aŋa.
16 ꞌI te taꞌe haŋa ōꞌoku mo aŋa i te meꞌe taꞌe tano aŋa e au, e takeꞌa ena pē nei ē: e peꞌe rō ꞌana a au ki te haka tere iŋa ꞌa Mōtē, ꞌe e ꞌite rō ꞌana e au meꞌe riva-riva.
17 ꞌE taꞌe ko au toe te meꞌe aŋa i rā meꞌe, he huru hara nei o roto i a au.
18 Ko ꞌite ꞌana a au ꞌina he meꞌe riva-riva poreko mai roto i tōꞌoku huru hara. Ka haŋa atu, paꞌi, a au mo aŋa i te meꞌe riva-riva, ꞌina ōꞌoku pūai mo aŋa i rā meꞌe.
19 ꞌIna a au he aŋa i te meꞌe riva-riva haŋa e au mo aŋa. He meꞌe rake-rake taꞌe haŋa e au mo aŋa tāꞌaku meꞌe aŋa.
20 Mo aŋa ia ōꞌoku i te meꞌe ꞌina e au he haŋa, taꞌe ko au toe ia te meꞌe aŋa i rā meꞌe, he huru hara nei o roto i a au.
21 Hora nei ko aŋi-aŋi ꞌana e au: ka haŋa atu a au mo aŋa i te meꞌe riva-riva, te meꞌe ravaꞌa nō mo aŋa he meꞌe rake-rake.
22 Hai māhatu a au e haŋa nei ki te ⸤haka tere iŋa o te ꞌAtua haka pāpaꞌi ki a Mōtē⸥.
23 Ka ai atu pē ira, ꞌi roto i a au te meꞌe haka tātake i tōꞌoku manaꞌu riva-riva: he huru hara o roto ōꞌoku, maꞌu i a au pa he taŋata puru ꞌāꞌana.
24 ¡Ko te ꞌati ꞌō i a au! ¿Mā ꞌai au e haka eꞌa mai roto i te rima o te huru hara maꞌu i a au ki te mate?
25 Mo te ꞌAtua mau nō e haka eꞌa hai Ietū Kiritō, he Pūꞌoko Haka Tere o tātou, ꞌe ki a ia a au e māuru-uru nei. Hora nei e aŋi-aŋi riva-riva rō ꞌana e au: tāꞌaku meꞌe haŋa he haꞌatura ki te haka tere iŋa o te ꞌAtua haka pāpaꞌi ki a Mōtē, ꞌe, ꞌi te meꞌe ꞌina ōꞌoku pūai, he haꞌatura nō tāꞌaku aŋa ki te hara.
