Firemono 1:1-25
1 A au, a Pauro, puru ꞌo te tāvini ki a Ietū Kiritō, ꞌe a Timoteo, taina o tātou, he ꞌaroha atu ki a koe, e Firemono ē, hokorua haŋa rahi ꞌi te aŋa o te ꞌAtua,
2 ki a ꞌĀpia, viꞌe taina o tātou, ki a Arakipo, hokorua takoꞌa ꞌi te aŋa o te ꞌAtua, ꞌe ki te nūnaꞌa taŋata ⸤haka moe i te manaꞌu⸥ ꞌi ruŋa i a Ietū taka-taka ꞌi tuꞌu hare.
3 Ka ai ꞌi ruŋa i a kōrua taꞌatoꞌa te riva rahi ꞌe te haumārū o te ꞌAtua, he Matuꞌa o tātou, ꞌe o Ietū Kiritō, he Pūꞌoko Haka Tere o tātou.
He huru riva o Firemono
4 ꞌI tōꞌoku pure iŋa paurō te mahana e māuru-uru nei a au ki te ꞌAtua mōꞌou, e Firemono ē.
5 Ko ŋaroꞌa ꞌana, paꞌi, e au o ruŋa i tuꞌu haka moe iŋa i te manaꞌu ꞌi ruŋa i a Ietū, ꞌe o ruŋa i te rahi o tuꞌu haŋa ki te nuꞌu taꞌatoꞌa haꞌataꞌa e te ꞌAtua māꞌana.
6 ꞌI roto i tāꞌaku pure e ani nei a au ki te ꞌAtua mo vānaŋa-naŋa mo oho nō ōꞌou ananake ko te tētahi taina o ruŋa i te haka moe iŋa i te manaꞌu ꞌi ruŋa i a Ietū, ki ꞌata aŋi-aŋi ai koe i te meꞌe taꞌatoꞌa riva-riva vaꞌai mai e te ꞌAtua ꞌi te meꞌe era a tātou ꞌa Ietū Kiritō.
7 Ko koa ꞌana a au ꞌe ko ꞌata ai ꞌana tōꞌoku haŋu, e Firemono ē, ꞌi te ai o tuꞌu haŋa ki te nuꞌu haꞌataꞌa e te ꞌAtua māꞌana, ꞌi te meꞌe era e haka koa rō ꞌana koe i te rāua māhatu.
He ani iŋa mo Onetimoro
8 E Firemono, e tano nō a au mo kī atu hai ꞌīŋoa o Ietū Kiritō, he aha taꞌa meꞌe mo aŋa,
9 ꞌe ꞌina a au kai haŋa mo aŋa pē ira. ꞌI te ai o tuꞌu here mo te taina, te haŋa e no-noꞌi atu. ꞌĪ a au, a Pauro, korohuꞌa, e puru atu ena ꞌi te hora nei ꞌo te haka ꞌite o ruŋa i a Ietū Kiritō,
10 he ani atu mo haka ꞌaroha ōꞌou i a Onetimoro. A ia ko tuꞌu ꞌana pa he poki ꞌāꞌaku ꞌe a au pa he matuꞌa ōꞌona he haka moe i te manaꞌu ꞌi ruŋa i a Ietū ꞌi te hora haka ꞌite e au, ꞌi roto i te hare maꞌuꞌaurī, o ruŋa i a Ietū.
11 ꞌI muꞌa ꞌana, ꞌina e tahi meꞌe riva-riva mo ravaꞌa e koe mai i a ia; ꞌe hora nei, e ai rō ꞌana te meꞌe riva-riva mo ravaꞌa e koe ꞌe pē ira takoꞌa ꞌana e au.
12 Nā ko haka hoki haka ꞌou atu ꞌana e au: a ia he māhatu ōꞌoku.
13 I haŋa rō, hoꞌi, a au mo noho mai ōꞌona mo hāꞌūꞌū mai ꞌi te hora nei ōꞌoku ꞌi roto i te hare maꞌuꞌaurī ꞌo te haka ꞌite i te ⸤roŋo riva-riva o te ꞌAtua⸥, pa he hāꞌūꞌū iŋa mai ōꞌou ꞌāhani ko koe te meꞌe o nei.
14 ꞌE kai haŋa a au mo aŋa e tahi meꞌe ꞌina he tano ki tuꞌu manaꞌu, ꞌo tuꞌu pa he meꞌe ena ē: i kī atu ꞌō e au. Tōꞌoku haŋa: māꞌau ꞌā e manaꞌu.
15 Koiꞌite te haꞌataꞌa ꞌiti-ꞌiti ena o Onetimoro mai muri i a koe mo riro mau rō atu ꞌai ōꞌona ꞌi te hora nei ꞌāꞌau,
16 taꞌe nō ꞌō pa he ꞌekaravo, pa he meꞌe ꞌata hau rō atu ki te meꞌe ena: pa he taina haŋa rahi e tahi o tātou. E haŋa rahi rō ꞌana a au ki a Onetimoro, ꞌe a koe e ꞌata haŋa ki a ia, taꞌe nō ꞌō pa he taŋata, pa he taina takoꞌa ꞌi te haka moe iŋa i te manaꞌu ꞌi ruŋa i a Ietū.
17 ꞌO ira, mo ai he hokorua haŋa rahi mau ꞌā tāua ꞌi te aŋa o te ꞌAtua, ka toꞌo haka ꞌou atu koe i a ia ki tuꞌu hare, pa he toꞌo iŋa ōꞌou i a au mo ai ko au nā meꞌe.
18 Mo ai ko aŋa atu ꞌā i te meꞌe taꞌe tano ꞌo ko tārahu atu ꞌā, māꞌaku e ꞌauhau atu.
19 Hai rima mau ꞌana ōꞌoku o Pauro e pāpaꞌi atu ena: māꞌaku mau ꞌā e ꞌauhau atu. Ka ai atu pē ira, ꞌina ko rehu i a koe e ai rō ꞌana tuꞌu tārahu mōꞌoku: hai au, paꞌi, i ravaꞌa ai e koe i te ora ꞌāpī ꞌina he hopeꞌa raꞌa vaꞌai e te ꞌAtua.
20 E te taina, ka aŋa koe i tāꞌaku meꞌe nei e kī atu ena hai haŋa ena ōꞌou ki te ꞌAtua; ka haka koa mai koe i tōꞌoku māhatu pa he taina haka moe i te manaꞌu ꞌi ruŋa i a Ietū.
21 E pāpaꞌi atu ena ꞌo te ꞌite ōꞌoku e haꞌatura rō mai koe, ꞌe ꞌo te ꞌite takoꞌa ōꞌoku pē nei ē: e hau rō atu taꞌa meꞌe riva-riva ka aŋa ena ki te meꞌe no-noꞌi atu ena e au.
22 E haŋa takoꞌa rō ꞌana a au mo haka riva-riva mai ōꞌou e tahi piha mōꞌoku; ko ꞌite riva-riva ꞌana, paꞌi, e au: te ꞌAtua he haka roŋo i te kōrua pure ꞌe he haka rē mai i a au mo oho atu mo uꞌi i a kōrua.
He ꞌaroha
23 ꞌĪ a Epafara e ꞌaroha atu ena; a ia he hokorua ōꞌoku ꞌi roto i te hare maꞌuꞌaurī ꞌo te haka ꞌite takoꞌa o ruŋa i a Ietū Kiritō.
24 ꞌE, ꞌī e ꞌaroha takoꞌa atu ena a Marko, a Aritarako, a Rema, ꞌe a Ruka, nuꞌu hāꞌūꞌū mai ꞌi tāꞌaku aŋa.
25 Ka ai ꞌi ruŋa i a kōrua te riva rahi o te tātou Pūꞌoko Haka Tere ko Ietū Kiritō.
