Hura 1:1-25
1 A au, a Hura, tāvini o Ietū Kiritō, ꞌe taina o ⸤Tanatiako⸥, he ꞌaroha atu ki a kōrua ki te nuꞌu haŋa e te ꞌAtua Matuꞌa ꞌe haꞌataꞌa māꞌana, he nuꞌu hāpaꞌo ꞌa Ietū Kiritō.
2 Ka rahi ka oho te haka ꞌaroha, te haumārū ꞌe te haŋa o te ꞌAtua ꞌi ruŋa i a kōrua taꞌatoꞌa.
E maꞌu hio-hio te hāpī parautiꞌa
3 E te taina, ko haŋa ꞌana a au mo pāpaꞌi atu o ruŋa i te eꞌa iŋa mai roto i te ūtuꞌa o te hara ꞌe te ravaꞌa iŋa i te ora ꞌāpī ꞌina he hopeꞌa raꞌa, he meꞌe ai i a kōrua ꞌe i a au. ꞌE, ko uꞌi ꞌana e au ꞌi te hora nei, te meꞌe ꞌāꞌaku mo hōrou mo pāpaꞌi atu: e maꞌu hio-hio ꞌi roto i te kōrua māhatu te hāpī parautiꞌa vaꞌai mai e te ꞌAtua ki a tātou ki te nuꞌu haꞌataꞌa e ia māꞌana ꞌe e hāpaꞌo ꞌo huri hai manaꞌu taŋata.
4 Nā, paꞌi, hai reo-reo ko oꞌo ꞌana ki roto i te nūnaꞌa taŋata ⸤haka moe i te manaꞌu⸥ ꞌi ruŋa i a Ietū te nuꞌu haka ꞌite mai era ꞌi ruŋa i te ⸤Pāpaꞌi Moꞌa⸥ e ai rō ꞌā te ūtuꞌa mo rāua. Te nuꞌu nei he nuꞌu taparahi-taꞌata toꞌo i te riva rahi o te tātou ꞌAtua pa he ꞌōtohe mo aŋa i te meꞌe haŋa nō e te rāua hakari, ꞌe ꞌina he haŋa ki te tātou Pūꞌoko Haka Tere ko Ietū Kiritō.
He ūtuꞌa o te ꞌAtua
5 Te meꞌe nei e au ka pāpaꞌi atu ena e ꞌite rō ꞌana e kōrua ꞌe, ka ai atu pē ira, e haŋa nō ꞌā a au mo haka manaꞌu haka ꞌou atu pē nei ē: ka ai atu te ꞌAtua i toꞌo tahi rō i te itaraera mai Ehipto, i haka kore nō i te tētahi o rā nuꞌu he taꞌe haka moe i te manaꞌu ꞌi ruŋa i a ia.
6 ꞌE te ŋā merahi taꞌe haka hauhaꞌa era i te rāua tōroꞌa ꞌe hoa era i te rāua kona noho, ko here-here ꞌana e te ꞌAtua hai vivi taꞌe mo pakoꞌo ki te hora hopeꞌa, ꞌe ꞌi te kona pōꞌuri i haka rē ai mo te mahana o te ture hopeꞌa.
7 ꞌE ki te nuꞌu o ⸤Tōroma⸥, o ⸤Kōmora⸥ ꞌe o te kona hāhine ki ira i haka ūtuꞌa ai ꞌi roto i te ahi ꞌina he hopeꞌa raꞌa ꞌo te vaꞌai i a rāua ki te taiꞌata, ꞌe ki te rauhuru meꞌe taꞌe tano pa he noho te taŋata ki te taŋata ꞌā, ꞌe te viꞌe ki te viꞌe ꞌā. Te nuꞌu nei koia ko rā ŋā merahi he noho rō ꞌai pa he meꞌe mo haka manaꞌu ki te taꞌatoꞌa, ꞌo aŋa i te meꞌe tuꞌu pē ira ꞌe ꞌo haka ūtuꞌa e te ꞌAtua.
8 ꞌE, ka ai atu pē ira, te nuꞌu oꞌo atu era ki roto i a kōrua hai reo-reo ko te haka hara iŋa ꞌana i te rāua hakari. Pē nei e reo-reo ena: o te ꞌAtua te haka takeꞌa ꞌi roto i te moe vārua e tano rō ꞌā rā meꞌe. Te parautiꞌa mau, te nuꞌu nei ꞌina he haꞌatura ki te ꞌAtua ꞌe he parauꞌino nō te aŋa mo te merahi.
9 Ka manaꞌu rā: hora tātake era o Mihaera, he merahi ra-rahi o te ꞌAtua, ararua ko Rukifero o ruŋa i te hakari o ⸤Mōtē⸥, ꞌina a Mihaera kai kī i te vānaŋa rake-rake mo Rukifero; i kī nō: «¡Mo te ꞌAtua koe e ture atu!».
10 ꞌE nā ia te nuꞌu oꞌo atu ena ki roto i a kōrua e vānaŋa taꞌe tano ꞌā mo te meꞌe ꞌina e rāua kai ꞌite. Te meꞌe ꞌite mau nō o rāua he meꞌe kī e te hakari, pa he oho iŋa o te ꞌanimare, ꞌe hai nei meꞌe e tiŋaꞌi e oho ena i a rāua.
11 ¡ꞌAu-auē te nuꞌu ena! Ko oho ꞌana a te ara taꞌe tano pē ⸤Kāiŋa⸥. ꞌI te haŋa ki te moni, ko haka tapa ꞌā mai te ara o te ꞌAtua, pē ⸤Vārama⸥, ꞌe, ꞌi te haka ꞌāriŋa mau era ꞌā o rāua, pē Kōrē* ka mā-mate ena.
12 Te nuꞌu ena he haꞌamā e tahi ꞌi te hora kai i te haraoa mo haka manaꞌu i te mate iŋa o Ietū. ꞌIna a rāua he moꞌa i te ŋoŋoro ena; te meꞌe aŋa nō he kai, he unu ꞌe he reka. Te nuꞌu ena pa he nuꞌu hāpaꞌo māmoe hāpaꞌo i a rāua mau nō, pa he raŋi vai kore maꞌu e te tokerau. ꞌE pa he tumu ꞌina he hua, ꞌina e tahi meꞌe riva-riva mo poreko mai roto i te nuꞌu ena. A rāua he meꞌe mate, pa he tumu ko oꞌi ꞌā a te aka ꞌe ko paka-paka ꞌana.
13 A rāua takoꞌa pa he vave taparahi-taꞌata, ꞌe te meꞌe taꞌe tano haꞌamā aŋa e rāua pa he kuta-kuta ꞌōꞌone o te vaikava. Te nuꞌu ena takoꞌa pa he hetuꞌu eꞌa mai te rāua ara, ꞌe nā ko ai era ꞌā te ūtuꞌa mo rāua, he noho mau rō ꞌāvai ꞌi roto i te kona hopeꞌa o te pōꞌuri.
14 A ꞌĒnoko, he hitu taŋata mai i a ꞌĀtamu, i vānaŋa rō pa he perofeta o ruŋa i te nuꞌu ena ꞌi te hora kī era pē nei ē: «I takeꞌa rō e au i te ꞌAtua e oho mai ꞌana koia ko tāꞌana merahi ka miꞌi ka miꞌi
15 mo ture ꞌe mo haka ūtuꞌa i te taŋata o ruŋa i te meꞌe taꞌatoꞌa taꞌe tano aŋa ꞌe o ruŋa i te parauꞌino taꞌatoꞌa kī mōꞌona e te nuꞌu hara taparahi-taꞌata».
16 Te nuꞌu ena he riri-riri nō te aŋa mo te meꞌe taꞌatoꞌa, ꞌina e tahi meꞌe tano mo rāua, te meꞌe haŋa mau nō he haka koa i a rāua. Te vānaŋa iŋa e haka tuꞌu rō ꞌana pa he meꞌe ena ē: i a rāua mau nō te tano, ꞌe te aŋa he haka paka i te tētahi mo ravaꞌa nō i te meꞌe mai i a rāua.
E haka hio-hio te manaꞌu ꞌi ruŋa i te ꞌAtua
17 E te taina, e uꞌi ꞌo rehu te vānaŋa kī ꞌi muꞌa ꞌā e te ⸤ꞌāpōtoro⸥ o te tātou Pūꞌoko Haka Tere ko Ietū Kiritō
18 pē nei ē: «ꞌI te ŋā mahana hopeꞌa ena e ai rō te nuꞌu haka kata-kata ꞌi te ꞌAtua ꞌe ꞌi tāꞌana nuꞌu, ꞌe hai meꞌe taꞌe tano pohe nō e te hakari ka haka tere ena i a rāua».
19 O te nuꞌu ena te haka topa-topa kē i te taŋata. Te rāua meꞌe aŋa he meꞌe pohe nō o te hakari, ꞌe ꞌina he Vārua o te ꞌAtua i a rāua.
20 ꞌE a kōrua, e te taina ē, e haka hio-hio e oho nō ꞌi roto i te hāpī parautiꞌa hai haka moe i te manaꞌu ꞌi ruŋa i a Ietū, ꞌe e pure hai pūai o te ⸤Vārua Maitai⸥.
21 E uꞌi ꞌo rehu te rahi o te haŋa o te ꞌAtua mo tātou. ꞌE e tiaki ki te mahana ka vaꞌai mai ena e te tātou Pūꞌoko Haka Tere ko Ietū Kiritō, hai riva rahi ōꞌona, i te ora ꞌāpī ꞌina he hopeꞌa raꞌa.
22 E haka ꞌaroha ꞌe e hāꞌūꞌū e oho kōrua i te nuꞌu e ꞌaka-ꞌaka rō ꞌana te rāua manaꞌu.
23 ꞌE ki te tētahi e uꞌi e haka eꞌa mai roto i te ūtuꞌa o te pōꞌauahi. E haka ꞌaroha kōrua i te nuꞌu hara, ꞌe e uꞌi kōrua e te hara era o rāua pa he ꞌōꞌone haka pea-pea i te kahu, ꞌo pea-pea takoꞌa rō kōrua.
E haꞌahana-hana ki te ꞌAtua
24 Ki haꞌahana-hana tahi tātou ki te ꞌAtua, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa hai Ietū Kiritō, he Pūꞌoko Haka Tere o tātou. I te ꞌAtua mau nō te pūai mo hāpaꞌo i a tātou ꞌo oꞌo ki roto i te hara, ꞌe mo haka māroa i a tātou pe muꞌa ka oho ena ꞌi muꞌa i a ia ꞌi roto i tōꞌona pūai ꞌana-ꞌana e koa rō ꞌana ꞌe ꞌina e tahi hape. I a ia mau nō te nui-nui, te pūai, te parau o te meꞌe taꞌatoꞌa ꞌi muꞌa ꞌā, ꞌi te hora nei ꞌe ꞌina he hopeꞌa raꞌa. ⸤ꞌĀmene⸥.
25 —.
Notas
^ A Kōrē he kope haka tumu i te ture ki a Mōtē ararua ko ꞌĀrone. Te ꞌAtua i riri rahi rō mōꞌona, ꞌo ira i mātaki ai i te henua ꞌe he horo i te kope nei ananake ko te nuꞌu taꞌatoꞌa peꞌe ki a ia.
