Iovani 13:1-38
13 Te ⸤Pakate⸥ kai haꞌamata ꞌā, ꞌe a Ietū ko ꞌite era ꞌana ko tano ꞌā tōꞌona hora mo haka rē i te ao nei ꞌe mo hoki ki muri i tōꞌona Matuꞌa. Te aŋa ꞌāꞌana he haka takeꞌa he oho nō i tōꞌona haŋa ki tāꞌana nuꞌu, ꞌe pē ira i aŋa i oho ai ꞌātā ki te hopeꞌa.
2 Ka ai atu pē ira, ko ai era ꞌā ꞌi roto i te māhatu o Hura, poki ꞌa Tīmona Ikariote, te manaꞌu o Rukifero mo hoꞌo i a Ietū. ꞌE a Ietū, ꞌi te ꞌite: mai te ꞌAtua a ia i oho mai ai ꞌe ki a ia ka hoki era, ꞌe ꞌi te ꞌite takoꞌa ko vaꞌai ꞌana ki a ia e tōꞌona Matuꞌa i te parau o te meꞌe taꞌatoꞌa o te ao, e kai nō ꞌā he māroa mai ruŋa i te ꞌamuramaꞌa, he patu i te paratoa ꞌe he here i te pānio pa he pena.
3 —
4 —
5 He toꞌo i te vātōrio ꞌe he haꞌaꞌī hai vai. He haꞌamata ia he haka hopu i te vaꞌe o tāꞌana nuꞌu hāpī ꞌe he haroꞌi hai tū pānio era.
6 I oho era mo haka hopu i te vaꞌe o Tīmona, kī takoꞌa ko Pētero, he kī:
—E Ietū, ¿He haka hopu mai a koe i tōꞌoku vaꞌe?
7 He pāhono e Ietū:
—ꞌIna he aŋi-aŋi e koe, ꞌi te hora nei, he aha a au e aŋa nei i te meꞌe nei; pe muꞌa ka oho ena he aŋi-aŋi e koe.
8 He kī e Pētero:
—¡E ko haꞌatiꞌa atu e au ki te hora hopeꞌa mo haka hopu mai ōꞌou i tōꞌoku vaꞌe!
He pāhono e Ietū:
—Mo taꞌe haka hopu atu ōꞌoku i tuꞌu vaꞌe, taꞌe ia a koe ꞌāꞌaku.
9 He kī e Pētero:
—¡Mo ai ia pē ira, taꞌe nō he vaꞌe taꞌa meꞌe mo haka hopu mai; ka haka hopu takoꞌa mai tōꞌoku rima ꞌe tōꞌoku pūꞌoko!
10 He pāhono e Ietū:
—Te taŋata hopu iho, ¿mo aha ꞌā ana hopu haka ꞌou? E maꞌitaki rō ꞌā, paꞌi. He vaꞌe nō te meꞌe mo hopu. ꞌE a kōrua e maꞌitaki rō ꞌana, ka ai atu e tahi o roto o kōrua taꞌe pē ira.
11 Te vānaŋa kī era e Ietū: «taꞌe taꞌatoꞌa o kōrua e maꞌitaki rō ꞌā», ꞌo te ꞌite ko ai te kope ka hoꞌo era i a ia.
12 I oti era te haka hopu i te vaꞌe, he uru haka ꞌou a Ietū i tōꞌona paratoa, he noho haka ꞌou ꞌi ruŋa i te ꞌamuramaꞌa, ꞌe he ꞌui:
«¿E aŋi-aŋi rō ꞌana e kōrua tāꞌaku meꞌe aŋa atu ena?
13 A kōrua e kī mai ena: “e te Maꞌori”, ꞌe, takoꞌa, “e te Pūꞌoko Haka Tere ē”. Ko tano ꞌana, he aŋi mau ꞌā to kōrua.
14 Mo ai a au, te Maꞌori ꞌe te Pūꞌoko Haka Tere o kōrua, ko haka hopu atu ꞌana i te kōrua vaꞌe, pē ira takoꞌa ꞌana a kōrua ana aŋa ꞌi roto i a kōrua.
15 »Hai meꞌe aŋa ena e au, i haka takeꞌa atu ai he aha te kōrua meꞌe mo aŋa.
16 ꞌĪ a au he kī atu: ꞌina he tāvini ꞌata hau ki te kope haka aŋa i a ia, ꞌe ꞌina he kope maꞌuroŋo ꞌata hau ki te kope haka uŋa i a ia.
17 Mo aŋi-aŋi o kōrua i tāꞌaku meꞌe hāpī atu ena ꞌe mo aŋa i rā ŋā meꞌe, he haꞌamaitai kōrua e te ꞌAtua.
18 »Te meꞌe kī atu ena e au taꞌe mo kōrua taꞌatoꞌa. Ko ꞌite riva-riva ꞌana e au ko ai ko ai tāꞌaku meꞌe i toꞌo mo taŋata hāpī ꞌāꞌaku. I aŋa ai pē ira mo tano ki te meꞌe kī ꞌi ruŋa i te ⸤Pāpaꞌi Moꞌa⸥ pē nei ē:“Te kope kai ararua māua,ko hārui mai ꞌā i a au hai tuaꞌivi”.
19 »E kī atu ena a au i te meꞌe nei mo aŋi-aŋi riva-riva e kōrua, ꞌi te hora ena ka topa ena rā meꞌe, pē nei ē: a au he kope mau nei ꞌā e au e kī atu ena.
20 ꞌĪ a au he kī atu: Te kope here ꞌi roto i tōꞌona māhatu i te kope uŋa e au e here takoꞌa ꞌana i a au ꞌi roto i tōꞌona māhatu, ꞌe te kope here i a au ꞌi roto i tōꞌona māhatu e here takoꞌa ꞌana i te kope uŋa mai i a au».
He haka ꞌite iŋa o Ietū he hoꞌo i a ia
(Māteo 26.20-25; Marko 14.17-21; Ruka 22.21-23)
21 I oti era i te kī i te meꞌe nei, he ŋaroꞌa e Ietū i te māui-ui ꞌi roto i tōꞌona māhatu, ꞌe he kī: «Nā e tahi o kōrua he vaꞌai i a au ki te nuꞌu».
22 He haꞌamata ia te nuꞌu hāpī ꞌa Ietū he uꞌi-uꞌi ki a rāua ꞌā; ꞌina he aŋi-aŋi o ruŋa i a ai e vānaŋa era.
23 E tahi o rā nuꞌu, he kope haŋa rahi ꞌa Ietū, e kai ꞌana ꞌi muri.
24 I haꞌaauraꞌa atu e Pētero hai rima mo ꞌui ki a Ietū o ruŋa i a ai e vānaŋa era.
25 He ꞌata haka hāhine rā kope ki muri i a Ietū, he ꞌui:
—E Ietū, ¿ko ai nā meꞌe?
26 He pāhono e Ietū:
—ꞌĪ a au he haka ruku e tahi parehe haraoa; kope era ki a ia a au ka vaꞌai nei, ko ia.
ꞌI tū hora ꞌā he haka ruku a Ietū e tahi parehe haraoa ꞌe he vaꞌai ki a Hura, he poki ꞌa Tīmona Ikariote.
27 ꞌI te hora toꞌo mau era ꞌā e Hura i te haraoa i oꞌo ai ki roto i tōꞌona māhatu a Rukifero.
He kī ia e Ietū: «Taꞌa meꞌe manaꞌu ena mo aŋa, ka keꞌo-keꞌo ka aŋa rō ꞌai».
28 ꞌIna e tahi o rā nuꞌu kai era ananake ko kuā Ietū i aŋi-aŋi he aha e kī era i rā meꞌe ki a Hura.
29 ꞌE, ꞌi te ai ꞌa Hura te hāpaꞌo i te rāua pūtē moni, he manaꞌu e te tētahi o rā nuꞌu e kī ꞌā a Ietū mo hoꞌo hai meꞌe mo te ŋoŋoro, ꞌo mo vaꞌai hai moni mo te veve.
30 I toꞌo era e Hura i rā haraoa he eꞌa he oho. Ko pō ꞌana ia te mahana.
He roŋo ꞌāpī
31 I eꞌa era a Hura he kī a Ietū:
—E ko roa he takeꞌa te pūai ꞌe te nui-nui o te ⸤Poki o te taŋata⸥, ꞌe hai ia ka takeꞌa takoꞌa ena te pūai ꞌe te nui-nui o te ꞌAtua.
32 ꞌE mo ai hai Poki o te taŋata e haka takeꞌa ena i te pūai ꞌe i te nui-nui o te ꞌAtua, pē ira takoꞌa ꞌana e haka takeꞌa ena e te ꞌAtua i te pūai ꞌe i te nui-nui o te Poki. Te meꞌe nei ka topa ena e ko roa hia.
33 »E kuā ŋā poki ꞌāꞌaku ē, e ko noho haka ꞌou atu a au ꞌi muri i a kōrua. E kimi rō mai kōrua. ꞌE pa he meꞌe kī e au ki te nuꞌu ⸤hūrio⸥ ra-rahi ka kī takoꞌa atu ena a au ꞌi te hora nei: e ko tuꞌu atu kōrua ki te kona nei ōꞌoku ka oho nei.
34 »He haka rē atu au i te roŋo ꞌāpī nei: E haŋa kōrua ki te rua. Pa he haŋa nei ōꞌoku mo kōrua, pē ira kōrua ana haŋa ꞌi roto i a kōrua.
35 Mo haŋa o kōrua pē ira, he ꞌite e te taŋata: he nuꞌu hāpī kōrua ꞌāꞌaku.
A Pētero e kī rō kai ꞌite a ia ko ai a Ietū
(Māteo 26.31-35; Marko 14.27-31; Ruka 22.31-34)
36 He ꞌui e Pētero ki a Ietū:
—E Ietū, ¿ki hē koe ka oho ena?
He pāhono e Ietū:
—Te kona nei ōꞌoku ka oho nei, e ko tano mo oho atu ōꞌou ꞌi te hora nei; ki tano tuꞌu hora he oho atu koe.
37 He kī e Pētero:
—E Ietū, ¿he aha a au ana taꞌe oho atu ꞌi te hora nei? ¡E vaꞌai nō a au i a au ki te mate mōꞌou!
38 He pāhono e Ietū:
—¿He parautiꞌa mau ꞌā e vaꞌai rō koe i a koe ki te mate mōꞌoku? ꞌĪ a au he kī atu: e ko ꞌoꞌoa hia te moa ka kī ena e koe e toru kī iŋa kai ꞌite koe ko ai a au.
