Iovani 16:1-33
16 »A au e kī atu ena i te ŋā meꞌe nei ꞌo ꞌaka-ꞌaka te kōrua haka moe iŋa i te manaꞌu ꞌi ruŋa i a au.
2 A kōrua nā he haka eꞌa mau rō ꞌai mai roto i te ⸤hare pure hūrio⸥; ꞌe ꞌātā e tuꞌu rō te mahana te kope nō era mo tiŋaꞌi mo haka mate i a kōrua he manaꞌu e aŋa ꞌana i te meꞌe haŋa e te ꞌAtua.
3 Te ŋā meꞌe nei ka aŋa atu ena ki a kōrua ꞌo te taꞌe ꞌite ko ai a au ꞌe ko ai te Matuꞌa.
4 E haka ꞌite atu ena au i te meꞌe nei mo haka topa o te kōrua manaꞌu, hora ena ka topa atu ena rā meꞌe, ko kī atu era ꞌana e au.
Te meꞌe aŋa e te ⸤Vārua Maitai⸥
»Kai kī atu a au i te meꞌe nei ꞌi tū hora raꞌe era ꞌo te ai ꞌi muri i a kōrua ꞌana a au.
5 Hora nei he hoki a au ki te kope ꞌāꞌana a au i uŋa mai, ꞌe ꞌina ꞌā e tahi o kōrua i ꞌui mai ki hē au ka oho nei.
6 Te meꞌe nō, ko mamae ꞌana te kōrua māhatu ꞌo te kī atu ōꞌoku i te meꞌe nei.
7 Te parautiꞌa, i hau ꞌi te riva mo kōrua mo oho ōꞌoku. Mo taꞌe oho ōꞌoku, e ko tuꞌu mai tū kope hāꞌūꞌū era, he Vārua Maitai, mo noho ꞌi roto i a kōrua; ꞌe mo oho ōꞌoku, he uŋa mai e au.
8 »Ki tuꞌu mai a ia, he haka ꞌite ki te taŋata o te ao nei ko ai te kope hara, ko ai te kope ꞌina e tahi hape, ꞌe ꞌi ruŋa i a ai ka topa ena te ture o te ꞌAtua.
9 Te kope hara: he taŋata taꞌe ⸤haka moe i te manaꞌu⸥ ꞌi ruŋa i a au;
10 te kope ꞌina e tahi hape: ko au mau nei ꞌā ka iri nei ki te Matuꞌa, ꞌe e ko takeꞌa haka ꞌou e kōrua;
11 ꞌe te kope ꞌi ruŋa i a ia ka topa ena te ture o te ꞌAtua: ko te kope ena ꞌāꞌana te ao te haka tere, te auraꞌa, ko Rukifero, he kope ko ai era ꞌā tōꞌona ūtuꞌa.
12 »E rahi nō ꞌana tāꞌaku meꞌe mo kī atu; ꞌe, mo kī atu ōꞌoku ꞌi te hora nei, e ko aŋi-aŋi e kōrua.
13 Ki tuꞌu mai te Vārua o te parautiꞌa, he haka aŋi-aŋi he oho atu i te parautiꞌa taꞌatoꞌa o te ꞌAtua. Taꞌe hai manaꞌu ōꞌona ꞌā ka vānaŋa atu ena, hai meꞌe i ŋaroꞌa e ia, ꞌe he haka ꞌite takoꞌa atu he aha te meꞌe ka topa ena.
14 »He haka nui-nui i a au hai toꞌo i tōꞌoku manaꞌu ꞌe hai haka ꞌite atu ki a kōrua.
15 Te manaꞌu taꞌatoꞌa o te ꞌAtua Matuꞌa i a au. ꞌO ira i kī atu ai e au: mai i a au ka ꞌite ena e te Vārua Maitai i tōꞌoku manaꞌu ꞌe māꞌana e haka ꞌite atu.
16 »ꞌIna he hora toe he ŋaro a au. ꞌE pe muꞌa ꞌiti he takeꞌa haka ꞌou e kōrua i a au.
Te taŋi o kōrua e riro rō he koa
17 Tētahi o te nuꞌu hāpī ꞌa Ietū he ꞌui ki a rāua ꞌā:
«¿He aha te auraꞌa o te meꞌe kī mai era pē nei ē: ꞌina he hora toe he ŋaro a ia, ꞌe pe muꞌa ꞌiti he takeꞌa haka ꞌou? ꞌE, takoꞌa, ¿he aha te auraꞌa o te meꞌe kī mai ena he oho a ia ki te Matuꞌa?
18 ¿He aha te haꞌaauraꞌa o te vānaŋa ena: “ꞌina he hora toe”? ꞌIna he aŋi-aŋi mai he aha tāꞌana meꞌe ena e vānaŋa mai ena».
19 He aŋi-aŋi ia e Ietū e haŋa rō ꞌā rā nuꞌu mo ꞌui ki a ia, ꞌe he kī:
—Ko kī atu ꞌana a au ꞌina he hora toe he ŋaro a au, ꞌe pe muꞌa ꞌiti he takeꞌa haka ꞌou e kōrua i a au. ¿He haꞌaauraꞌa o te meꞌe nei te meꞌe haŋa o kōrua mo ꞌite?
20 ꞌĪ a au he kī atu: e ta-taŋi rō ꞌe e koromaki rō kōrua, ꞌe te nuꞌu o te ao nei taꞌe haka moe i te manaꞌu ꞌi ruŋa i a au e koa rō. ꞌE, ka ai atu e koromaki rō kōrua, te koromaki era e huri rō ki te koa.
21 »E hāhine ena te poki mo poreko, he mamae te viꞌe. I poreko era he rehu rō atu ꞌai rā mamae ꞌi te rahi o te koa mo te poki ko poreko ꞌā.
22 Pē ira takoꞌa ꞌana te kōrua mamae ena. Ki piri haka ꞌou a tātou, he koa te kōrua māhatu, ko te koa ena ꞌina he rua kope mo hiko.
23 »ꞌI rā mahana e ko ꞌui haka ꞌou mai kōrua e tahi meꞌe. ꞌE ꞌī a au he kī atu: he vaꞌai atu e te Matuꞌa i te meꞌe taꞌatoꞌa o kōrua ka no-noꞌi ena hai ꞌīŋoa ōꞌoku.
24 Ki te hora nei, kai no-noꞌi ꞌana kōrua e tahi meꞌe hai ꞌīŋoa ōꞌoku; ka no-noꞌi, he vaꞌai atu ki koa riva-riva ai kōrua.
A Ietū ko rē ꞌā ki te kope haka tere i te ao nei
25 »Ki te hora nei e vānaŋa atu ena a au hai ꞌaꞌamu haꞌaauraꞌa. ꞌE, ꞌī ko hāhine ꞌā te hora mo taꞌe vānaŋa haka ꞌou atu pē ira. Hai vānaŋa mo aŋi-aŋi riva-riva e kōrua ka haka ꞌite atu ena o ruŋa o te ꞌAtua Matuꞌa.
26 ꞌI rā mahana he no-noꞌi kōrua hai ꞌīŋoa ōꞌoku. ¿Mo aha ꞌana a au ana no-noꞌi ki te Matuꞌa mo kōrua? Mo kōrua mau ꞌā e no-noꞌi.
27 Te Matuꞌa, paꞌi, e haŋa rahi rō ꞌana ki a kōrua. E haŋa atu ena ꞌo te haŋa mai o kōrua ki a au ꞌe ꞌo te ai he parautiꞌa mau ꞌana mo kōrua: a au i oho mai ai mai i a ia.
28 Mai te Matuꞌa a au i oho mai ai ki te ao nei, ꞌe, hora nei, he haka rē a au i te ao ꞌe he hoki a au ki a ia.
29 He kī ia ki a Ietū e tāꞌana nuꞌu hāpī:
—E vānaŋa mai ena koe ꞌi te hora nei hai vānaŋa mo aŋi-aŋi riva-riva e mātou, ꞌe taꞌe hai ꞌaꞌamu haꞌaauraꞌa.
30 A mātou ko ꞌite ꞌana ꞌi te hora nei: a koe ko ꞌite tahi ꞌana i te meꞌe, ꞌātā ki te mātou meꞌe manaꞌu mo ꞌui atu. ꞌO ira he parautiꞌa mau ꞌā mo mātou: a koe mai te ꞌAtua i oho mai ai.
31 He pāhono e Ietū:
—¿He aŋi mau ꞌā he parautiꞌa mo kōrua?
32 Nā he tuꞌu mai te hora, ko te hora mau nei ꞌā, he maraŋa tahi kōrua ki te kōrua kona, ꞌe he haka rē kōrua i a au hoko tahi nō. Nōatu. Taꞌe a au hoko tahi nō; ararua māua ko te Matuꞌa.
33 E kī atu ena au i te meꞌe taꞌatoꞌa nei mo noho kōrua ꞌi roto i te haumārū ꞌo te ai o kōrua ꞌāꞌaku. ꞌI te ao nei e ꞌamo rō kōrua i te ꞌati. Kiahio kōrua; ko rē ꞌana, paꞌi, a au ki te kope ꞌāꞌana te haka tere i te ao.
