Iovani 21:1-25
21 ꞌI te mahana haka ꞌou e tahi, he haka takeꞌa a Ietū i a ia ki tāꞌana nuꞌu hāpī ꞌi te taha-taha o te kona vai e kī era ko Tīvēria, ꞌe pē nei i topa ai:
2 ꞌI rā kona a Tīmona, kī takoꞌa ko Pētero, a Tōmā, kī he Hauā, a Natanaera o Kānā, he kona e tahi o Karirea, he ŋā poki e rua ꞌa Tevereo ꞌe he kope haka ꞌou hoko rua o roto o rā nūnaꞌa hāpī era ꞌa Ietū.
3 I oho era he kī e Pētero:
—ꞌĪ a au he oho he hoa i tāꞌaku kūpeŋa.
He pāhono e tū nuꞌu era:
—He oho takoꞌa atu a mātou.
He eke-eke ia ananake ki ruŋa i te vaka he eꞌa he oho, ꞌe ꞌina e tahi meꞌe i ravaꞌa ꞌi rā pō.
4 Ko hāhine ꞌana mo ꞌōtea, he māroa atu a Ietū ꞌi te taha-taha o tū kona vai era, ꞌe ꞌina kai aŋi-aŋi e rā nuꞌu hāpī era ꞌāꞌana ko ia ꞌō rā meꞌe.
5 He ohu atu e Ietū:
—E kuā hoa, ¿ꞌina ꞌō kōrua ika?
He pāhono e rā nuꞌu:
—ꞌIna.
6 He kī e Ietū:
—Ka haka topa te kūpeŋa a te pāꞌiŋa mataꞌu o te vaka, he ravaꞌa ika kōrua.
Pē ira i aŋa ai, ꞌe i haro mai era ꞌina he ŋaeꞌi te kūpeŋa ꞌi te rahi o te ika.
7 ꞌI tū hora ꞌā i aŋi-aŋi ai e te kope haŋa rahi ꞌa Ietū ꞌe he kī ki a Pētero: «¡Ko Ietū te meꞌe era!».
I ꞌite era e Pētero ko Ietū tū meꞌe era, he uru i tōꞌona kahu, he rere ki roto i te vai he kau he oho ki ꞌuta.
8 Tū tētahi nuꞌu era kai roa i tomo ai ꞌi ruŋa i te vaka e to-toi rō ꞌana i te kūpeŋa ko ꞌī ꞌā e te ika. E pae ꞌahuru nō māroa, paꞌi, o te ꞌava-ꞌava mai te taha-taha tai.
9 I topa era ki ꞌuta, he takeꞌa i te ahi e hū rō ꞌā, ꞌi ruŋa e tahi ika ꞌe he haraoa.
10 He kī e Ietū: «Ka maꞌu mai hai ika toꞌo iho mai ena e kōrua».
11 He eke ia a Pētero ki ruŋa i te vaka he to-toi he oho mai i tū kūpeŋa era ki ꞌuta ko ꞌī ꞌana e te ika ko tetu ko tetu, e hoꞌe hānere e pae ꞌahuru mā toru ika; ꞌe ꞌina kai mō-more tū kūpeŋa era ꞌi te rahi.
12 He kī a Ietū: «Ka oho mai kōrua ka kai».
ꞌI te haꞌamā ꞌina e tahi o rāua i haŋa mo ꞌui ko ai a ia ꞌi te meꞌe era e ꞌite riva-riva rō ꞌana ko Ietū rā meꞌe.
13 He haka hāhine ia a Ietū, he toꞌo i te haraoa ꞌe i te ika he tuhaꞌa ki tū nuꞌu era.
14 He toru haka takeꞌa iŋa nei o Ietū i a ia ki tāꞌana nuꞌu hāpī mai tōꞌona ora iŋa mai te mate.
Ko Ietū ꞌe ko Pētero
15 I oti era i te kai, he ꞌui e Ietū ki a Pētero:
—E Tīmona, e te poki ꞌa ⸤Iovani⸥ ē, ¿i hau rō atu tuꞌu haŋa mai ki a au ki te nuꞌu nei?
He pāhono e Pētero:
—Ko ꞌite ꞌana koe, e Ietū ē, e haŋa rō atu ꞌana a au.
He kī ia e Ietū:
—E hāpaꞌo koe i tāꞌaku māmoe.
16 He ꞌui haka ꞌou e Ietū:
—E Tīmona, e te poki ꞌa Iovani ē, ¿e haŋa rō mai ꞌana koe?
He pāhono e Pētero:
—Ko ꞌite ꞌā e koe, e Ietū ē, e haŋa rō atu ꞌana a au.
He kī e Ietū:
—E hāpaꞌo koe i tāꞌaku māmoe.
17 He ꞌui haka ꞌou ia e Ietū:
—E Tīmona, e te poki ꞌa Iovani ē, ¿e haŋa rō mai ꞌana koe?
He oꞌo te māui-ui ꞌi roto i te māhatu o Pētero ꞌo te ꞌui haka ꞌou o Ietū i tū vānaŋa era, ꞌe he pāhono:
—E Ietū, e ꞌite tahi rō ꞌana a koe i te meꞌe, ꞌe ko ꞌite takoꞌa ꞌana koe e haŋa rō atu ꞌana a au.
He kī haka ꞌou e Ietū:
—E hāpaꞌo koe i tāꞌaku māmoe.
18 ꞌĪ a au he kī atu: ꞌi te hora ōꞌou e ꞌāpī nō ꞌā, ꞌāꞌau ꞌā te here i tuꞌu pena ꞌe te oho ki te kona nō era ꞌāꞌau i haŋa. ꞌE, ka korohuꞌa ena, he haka toro i tuꞌu rima, he here-here atu ꞌe he maꞌu i a koe ki te kona ꞌina e ko haŋa e koe mo oho.
19 I kī ai e Ietū i te meꞌe nei, e haka aŋi-aŋi ꞌā pē hē ka mate era a Pētero, ꞌe pē hē te mate era o Pētero ka haka nui-nui era i te ꞌAtua. I oti era he kī:
—¡E aŋa e oho koe i tāꞌaku meꞌe kī atu mo aŋa!
Te kope haŋa rahi ꞌa Ietū
20 He hārui ia a Pētero a tuꞌa, he takeꞌa ka tata atu tū kope haŋa rahi era ꞌa Ietū, kope noho ꞌi muri i a Ietū ꞌi te ⸤ŋoŋoro era o te Pakate⸥ ꞌui era pē nei ē: «E te Maꞌori, ¿ko ai te meꞌe ena ka hoꞌo ena i a koe?».
21 I takeꞌa era e Pētero, he ꞌui:
—E Ietū, ¿he aha te meꞌe ka topa ena ki te kope era?
22 He pāhono e Ietū:
—Mo haŋa ōꞌoku mo taꞌe mate ōꞌona ꞌātā ki tōꞌoku hoki iŋa mai, taꞌe he meꞌe ꞌāꞌau. Ka aŋa ka oho nō koe i tāꞌaku meꞌe kī atu.
23 ꞌO ira i rahi ai te ꞌaꞌamu ꞌi roto i te nuꞌu taina ⸤haka moe i te manaꞌu⸥ ꞌi ruŋa i a Ietū: rā kope e ko mate. ꞌE taꞌe pē ira te kī ꞌa Ietū. Te kī: «Mo haŋa ōꞌoku mo taꞌe mate ōꞌona ꞌātā ki tōꞌoku hoki iŋa mai, taꞌe he meꞌe ꞌāꞌau».
24 Ko te kope mau nei ꞌā te kope e haka ꞌite atu ena o ruŋa i te ŋā meꞌe nei, ꞌe ꞌāꞌana mau ꞌā i pāpaꞌi. ꞌE a tātou e ꞌite rō ꞌā he parautiꞌa tāꞌana meꞌe kī.
25 I aŋa rō a Ietū meꞌe rahi haka ꞌou nō atu meꞌe. ꞌĀhani i pāpaꞌi tahi ꞌi ruŋa i te puka, ꞌi te rahi, ꞌina he kona o te ao mo hue.
