Iovani 3:1-36
3 E tahi ⸤fariseo⸥ te ꞌīŋoa ko Nikoremo, taŋata hōnui e tahi o te ⸤hūrio⸥,
2 he oho ꞌi te pō e tahi uꞌi i a Ietū ꞌe he kī:
—E te Maꞌori, ko ꞌite ꞌana a mātou o te ꞌAtua a koe i uŋa mai mo hāpī i te taŋata; ꞌina, paꞌi, e tahi kope aŋa i te mana aŋa e koe mo kore o te ꞌAtua o muri.
3 He pāhono e Ietū:
—ꞌĪ a au he kī atu: te taŋata mo taꞌe poreko haka ꞌou, ꞌina e ko oꞌo ki roto i te ⸤haka tere iŋa ꞌāpī o te ꞌAtua⸥.
4 He ꞌui e Nikoremo:
—¿Pē hē ia te taŋata paꞌari ana poreko haka ꞌou? ¿E tano mau rō mo uru haka ꞌou ki roto i te manava o tōꞌona matuꞌa vahine ꞌe ꞌai ka poreko haka ꞌou mai?
5 He pāhono e Ietū:
—ꞌĪ a au he kī atu: te taŋata mo taꞌe poreko mai roto i te vai ꞌe mai te ⸤Vārua Maitai⸥, e ko oꞌo ki roto i te haka tere iŋa ꞌāpī o te ꞌAtua.
6 Te meꞌe poreko mai roto i te taŋata he taŋata mau ꞌā, ꞌe te meꞌe poreko hai pūai o te Vārua Maitai he poki o te ꞌAtua.
7 ꞌIna koe ko māere ana kī atu au: e poreko haka ꞌou te taŋata taꞌatoꞌa.
8 Te tokerau e puhi ena a te kona taꞌatoꞌa nō; ka ŋaroꞌa atu e koe, e ko ꞌite koe mai hē ꞌe kī hē ka oho era. Pē ira te aŋa iŋa o te Vārua Maitai ꞌi ruŋa i te taŋata poreko haka ꞌou hai pūai ōꞌona.
9 He ꞌui haka ꞌou e Nikoremo:
—¿Pē hē ia te meꞌe ena?
10 He pāhono e Ietū:
—¿He maꞌori koe o te itaraera ꞌe kai ꞌite koe i te ŋā meꞌe ena?
11 ꞌĪ a au he kī atu: e vānaŋa atu ena o ruŋa i te meꞌe ko ꞌite ꞌā ꞌe ko takeꞌa ꞌā e au; ꞌe, a kōrua ꞌina he haka roŋo mai.
12 Mo taꞌe haka roŋo mai o kōrua ki tāꞌaku meꞌe e kī atu ena o te ao nei, ¿pē hē ia kōrua ana haka roŋo mai mo vānaŋa atu ōꞌoku o ruŋa i te meꞌe o te raŋi?
13 »ꞌIna ꞌā he kope raꞌe i iri ki te raŋi, he kope topa nō mai era mai ruŋa, he ⸤Poki o te taŋata⸥.
14 Pa he haka tuꞌu iŋa e ⸤Mōtē⸥ i te pou ꞌi ruŋa te kōreha ꞌi te kona ꞌone taꞌe noho taŋata, pē ira takoꞌa ꞌana ka haka tuꞌu ena i te tātaurō ꞌi ruŋa te Poki o te taŋata,
15 ki ravaꞌa ai e te nuꞌu taꞌatoꞌa ⸤haka moe i te manaꞌu⸥ ꞌi ruŋa i a ia te ora ꞌāpī ꞌina he hopeꞌa raꞌa vaꞌai e te ꞌAtua.
16 »ꞌI te haŋa rahi o te ꞌAtua ki te taŋata taꞌatoꞌa o te ao, he vaꞌai i tāꞌana Poki mau nō era e tahi mo mate, ꞌe nuꞌu nō era mo haka moe i te manaꞌu ꞌi ruŋa, e ko haka tapa e te ꞌAtua mai muri i a ia ꞌe e ko haka ūtuꞌa; he vaꞌai i te ora ꞌāpī ꞌina he hopeꞌa raꞌa.
17 Te ꞌAtua ꞌina kai uŋa i tāꞌana Poki ki te ao mo haka ūtuꞌa i te taŋata; i uŋa ai mo haka eꞌa i a rāua mai roto i te ūtuꞌa o te hara ꞌe mo vaꞌai i te ora ꞌāpī ꞌina he hopeꞌa raꞌa.
18 »Te taŋata haka moe i tōꞌona manaꞌu ꞌi ruŋa i te Poki o te ꞌAtua e ko haka ūtuꞌa; ꞌe te taŋata taꞌe haka moe i te manaꞌu ꞌi ruŋa i a ia ko ai era ꞌana te ūtuꞌa mōꞌona ꞌo te taꞌe haka moe i te manaꞌu ꞌi ruŋa i te Poki mau nō era e tahi o te ꞌAtua.
19 Te ꞌAtua ka haka ūtuꞌa ena i te taŋata ꞌo te meꞌe nei: i oho mai era te mōrī ki te ao, ꞌina kai haŋa e te taŋata. Te meꞌe i haŋa he pōhāhā, taꞌe he māꞌeha, ꞌo te ai te rāua meꞌe aŋa he meꞌe taꞌe tano.
20 Te nuꞌu taꞌatoꞌa aŋa i te meꞌe taꞌe tano, meꞌe taꞌe haŋa o rāua he mōrī, ꞌe ꞌina he haka hāhine a muri ꞌo maꞌurima te rāua meꞌe aŋa.
21 ꞌE te nuꞌu noho ꞌi roto i te parautiꞌa aŋa i te meꞌe tī-tika e haka hāhine rō ꞌana ki te mōrī mo takeꞌa pē nei ē: te rāua meꞌe taꞌatoꞌa aŋa hai pūai o te ꞌAtua.
E vānaŋa haka ꞌou ꞌā a Iovani Papatito o ruŋa i a Ietū
22 Ko oti atu ꞌana te meꞌe nei, he oho a Ietū ananake ko tāꞌana nuꞌu hāpī ki Hūrea. He noho ꞌi ira meꞌe rahi mahana he ⸤papatito⸥ i te taŋata.
23 A Iovani e papatito takoꞌa ꞌā ꞌi ꞌĒnono, he kona e rahi rō ꞌā te vai hāhine ki Tārima. Te taŋata e oho rō ꞌana ꞌe he papatito ꞌi ira.
24 ꞌI rā hora kai puru ꞌā a Iovani.
25 Tētahi o te nuꞌu hāpī ꞌāꞌana he haꞌamata he tātake ki te hūrio e tahi o ruŋa i te ⸤haka maꞌitaki⸥ iŋa o rāua.
26 He oho ia rā nuꞌu he kī ki a Iovani:
—E te Maꞌori, tū kope era ꞌi muri i a koe ꞌi te rua pāꞌiŋa o te rio era ko Horotana, haka ꞌite mai era e koe o ruŋa i a ia, ꞌai e papatito ꞌana, ꞌe e rahi rō ꞌā te nuꞌu oho ki a ia.
27 He kī e Iovani:
—Mo ai rō o te pūai o te taŋata e tahi, o te ꞌAtua i vaꞌai.
28 Ko ŋaroꞌa ꞌana e kōrua i tōꞌoku kī iŋa taꞌe a au he ⸤Kiritō⸥, he taŋata nō au e tahi uŋa mai ꞌi muꞌa i a ia.
29 »ꞌI te ŋoŋoro hāipo-ipo, paꞌi, te taŋata i a ia te viꞌe mo hāipo-ipo ko ia te meꞌe ka hāipo-ipo era. ꞌE te repahoa o muri, ka ŋaroꞌa era i te reꞌo o rā kope e hāipo-ipo ꞌana, he toꞌo te koa. Pē ira takoꞌa tōꞌoku koa mo rahi o te taŋata oho ki a ia.
30 He pūai he oho a ia ꞌe he ŋaro he oho a au.
31 »Te kope turu mai mai te raŋi ꞌata hau rō atu ki te taŋata taꞌatoꞌa. Te taŋata o te ao nei o te ao mau nei ꞌā, ꞌe te meꞌe vānaŋa he meꞌe o te ao nō nei. ꞌE te kope turu mai mai te raŋi ꞌata hau rō atu ki te taꞌatoꞌa
32 ꞌe e haka ꞌite mai ꞌana o ruŋa o tāꞌana meꞌe i ŋaroꞌa ꞌe i takeꞌa, ꞌe taŋata taꞌe rahi te taŋata i haka roŋo ki tāꞌana vānaŋa.
33 Te taŋata haka roŋo ki a ia he ꞌite: he aŋi mau ꞌana te vānaŋa o te ꞌAtua.
34 Te kope uŋa mai e te ꞌAtua e haka ꞌite ꞌana i te vānaŋa o te ꞌAtua; i a ia, paꞌi, te pūai o te Vārua Maitai i vaꞌai ai e te ꞌAtua.
35 »E haŋa rahi rō ꞌana te Matuꞌa ki tāꞌana Poki, ꞌe ko vaꞌai ꞌana ki a ia i te parau o te meꞌe taꞌatoꞌa.
36 Te kope haka moe i te manaꞌu ꞌi ruŋa i te Poki o te ꞌAtua he ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua. ꞌE te kope taꞌe haka moe i te manaꞌu ꞌi ruŋa i a ia e ko ravaꞌa i rā ora; te meꞌe mo ravaꞌa he ūtuꞌa ꞌina he hopeꞌa raꞌa.
