Iovani 4:1-54
4 I ꞌite era ia a Ietū ko ꞌite ꞌana te ⸤fariseo⸥ ꞌata rahi tāꞌana nuꞌu hāpī ꞌe ꞌata rahi te nuꞌu papatito e ia ki a ⸤Iovani⸥
2 (ka ai atu o tāꞌana nuꞌu hāpī mau era ꞌā te papatito, taꞌe ꞌa Ietū),
3 he eꞌa he oho mai Hūrea ki Karirea.
4 ꞌI tōꞌona oho iŋa i vari ai a Tāmāria.
5 He tuꞌu ia ki te kona e tahi o Tāmāria te ꞌīŋoa ko Tīkara hāhine ki te henua vaꞌai e ⸤Hākovo⸥, ꞌi muꞌa ꞌā, ki tāꞌana poki ko ⸤Kōsē⸥.
6 ꞌI rā kona te pū vai e tahi e kī era He Pū Vai ꞌa Hākovo.
A Ietū, ꞌi te rohi-rohi ꞌi te roa o te ara, he noho ꞌi muri i tū pū vai era. Ko hāhine ꞌā rā hora ki te hora kai,
7 ꞌe te nuꞌu hāpī ꞌāꞌana ko oho ko uꞌi ꞌā hai kona mo hoꞌo mai hai meꞌe mo kai.
He tuꞌu ia ki rā kona pū vai era te viꞌe tāmāria e tahi, ꞌe he kī e Ietū:—Ka vaꞌai mai koe hai vai.
8 —.
9 ꞌI te meꞌe era ꞌina he ⸤hūrio⸥ he vānaŋa ki te nuꞌu o Tāmāria, he pāhono e rā viꞌe:
—¿Pē hē ia koe te hūrio e no-noꞌi mai ena ki a au ki te viꞌe tāmāria mo vaꞌai atu hai vai?
10 He pāhono e Ietū:
—ꞌĀhani ꞌō e ꞌite rō ꞌā koe he aha te meꞌe haŋa o te ꞌAtua mo vaꞌai atu, ꞌe ꞌāhani takoꞌa e ꞌite rō ꞌā koe ko ai te meꞌe nei e no-noꞌi atu ena ki te vai, ko no-noꞌi ꞌana ia e koe ki a ia hai vai, ꞌe he vaꞌai atu i te vai vaꞌai i te ora ꞌāpī ꞌina he hopeꞌa raꞌa.
11 He kī e rā viꞌe:
—Raro nui rahi te pū nei ꞌe ꞌina e tahi aꞌa meꞌe mo ꞌu-ꞌutu mai. ¿Mai hē ia koe ka vaꞌai mai ena i te vai ora ena?
12 Te mātou tupuna ko Hākovo ko haka rē mai ꞌana ki a mātou i te pū vai nei. ꞌI nei e unu era i te vai, pē ira takoꞌa ꞌana tāꞌana ŋā poki ꞌe tāꞌana ꞌanimare. ¿ꞌAta hau ꞌō koe ki a ia?
13 He pāhono e Ietū:
—Te nuꞌu taꞌatoꞌa unu i te vai nei he pohe haka ꞌou ki te vai;
14 ꞌe, te kope unu i te vai vaꞌai e au, e ko pohe haka ꞌou. Te vai vaꞌai e au ꞌi roto i a ia pa he kona tehe vai ꞌina he oti ꞌe mai ira he ravaꞌa e ia i te ora ꞌāpī ꞌina he hopeꞌa raꞌa vaꞌai e te ꞌAtua.
15 He kī e rā viꞌe:
—Ē, ka vaꞌai mai tāꞌaku o te vai ena ꞌo pohe haka ꞌou a au ki te vai ꞌe ꞌo hoki haka ꞌou mai au ki nei.
16 He kī e Ietū:
—Ka oho ka uŋa mai taꞌu kenu.
17 He pāhono e rā viꞌe:
—ꞌIna ꞌāꞌaku kenu.
He kī e Ietū:
—He aŋi ꞌā tāꞌau, ꞌina mau ꞌā aꞌu kenu.
18 E rima, paꞌi, aꞌu kenu ⸤hāipo-ipo⸥ i ai, ꞌe te kope ena ꞌi muri i a koe taꞌe he kenu ꞌāꞌau. He parautiꞌa mau ꞌā tāꞌau.
19 I ŋaroꞌa era e rā viꞌe i tū meꞌe era, he pāhono:
—Ki tōꞌoku uꞌi he perofeta koe.
20 Te mātou tupuna ꞌi ruŋa o te maꞌuŋa nei i haꞌamuri ai ki te ꞌAtua, ꞌe a kōrua te hūrio e kī ena: ꞌi Hērutarema te kona tano mo haꞌamuri ki te ꞌAtua.
21 He pāhono e Ietū:
—Ka haka roŋo mai. Nā ko hāhine ꞌā te mahana e ko tātake haka ꞌou ꞌi hē te kona tano mo haꞌamuri ki te ꞌAtua, hoki ꞌi nei ꞌo ꞌi Hērutarema.
22 A kōrua, te nuꞌu o Tāmāria, ꞌina he ꞌite ki a ai e haꞌamuri ena. ꞌE, a mātou e ꞌite rō ꞌana ki a ai; mai i a mātou, paꞌi, mai te hūrio, ka ai ena te rāveꞌa mo te taŋata mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.
23 E tuꞌu rō te hora, ko te hora mau nei ꞌā, te nuꞌu haꞌamuri parautiꞌa ki te ꞌAtua e haꞌamuri rō hai māhatu ꞌe hai hāꞌūꞌū o te ⸤Vārua Maitai⸥. Pē ira te haꞌamuri haŋa mau o te ꞌAtua Matuꞌa.
24 Te ꞌAtua he Vārua mau nō, ꞌina ōꞌona hakari; te nuꞌu haꞌamuri ki a ia e haꞌamuri hai pūai o te Vārua Maitai ꞌe tano ki te parautiꞌa o ruŋa i a ia.
25 He kī e rā viꞌe:
—Ko ꞌite ꞌana a au nā e tuꞌu rō mai te ⸤Mētia⸥ (te auraꞌa, te ⸤Kiritō⸥); ki tuꞌu mai, māꞌana e haka aŋi-aŋi tahi mai.
26 He kī e Ietū:
—Ko au rā kope, ko te kope nei e vānaŋa atu ena.
27 E vānaŋa nō ꞌana ararua i tuꞌu rō atu ai te nuꞌu hāpī ꞌāꞌana. He māere ꞌo te ai e vānaŋa ꞌana a Ietū ararua ko te viꞌe e tahi. ꞌE, ꞌina e tahi i haŋa mo ꞌui he aha tāꞌana meꞌe haŋa, ꞌe he aha e vānaŋa era ki rā viꞌe.
28 He haka rē ia rā viꞌe i tāꞌana karo, he eꞌa he oho ki te kona noho ōꞌona, he kī ki te taŋata o ira:
29 «Ka oho mai kōrua ka uꞌi i te taŋata e tahi ko kī tahi mai ꞌana i tāꞌaku meꞌe aŋa ki ꞌaŋarīnā. He Kiritō ꞌō pēaha».
30 He eꞌa tahi te taŋata mai te rāua kona noho he oho ki te kona era ꞌi ira a Ietū.
31 ꞌI rā kona, te nuꞌu hāpī ꞌāꞌana e haka koni ꞌā:
—E te Maꞌori, ka kai tāꞌau o te meꞌe.
32 He pāhono e Ietū:
—E ai rō ꞌana tāꞌaku kai taꞌe ꞌite e kōrua.
33 He haꞌamata tū nuꞌu hāpī era he kī ki a rāua ꞌana: «¿Ko maꞌu mai ꞌana ꞌō pēaha e te nuꞌu hai meꞌe māꞌana mo kai?».
34 He kī e Ietū:
«Tāꞌaku kai he aŋa ꞌe he haka oti i te meꞌe kī mai e te kope uŋa mai i a au.
35 »A kōrua e kī ena: “E hā ꞌāvaꞌe toe mo kato iho o te kai”. Tāꞌaku kī: “Ko tano ꞌana mo kato”. Ka uꞌi rā kōrua i te nuꞌu e pae mai ena: a rāua pa he kai ꞌoka ena ꞌā ko tano riva-riva ꞌana te rāua hora mo kato.
36 »Te nuꞌu kato i te kai e ꞌauhau rō ꞌā, ꞌe te kai kato era he ravaꞌa e rāua i te ora ꞌāpī ꞌina he hopeꞌa raꞌa. Pē ira te nuꞌu ꞌoka (te auraꞌa, te nuꞌu haka ꞌite i te vānaŋa o te ꞌAtua) ka koa ena ananake ko te nuꞌu o rāua i kato i te nuꞌu ⸤haka moe i te manaꞌu⸥ ꞌi ruŋa i a au.
37 »Pa he meꞌe kī: “O te tētahi te ꞌoka, ꞌe o te tētahi atu te kato”.
38 Ko uŋa ꞌana a au i a kōrua mo kato i te kai mai te kona taꞌe o kōrua i ꞌoka, o te tētahi. O rāua i haꞌamata te aŋa he haka ꞌite i te vānaŋa o te ꞌAtua, ꞌe o kōrua i haka mao i te aŋa he kato i te nuꞌu haka moe i te manaꞌu ꞌi ruŋa i a au».
39 I rahi rō te nuꞌu o rā kona o Tāmāria i haka moe i te manaꞌu ꞌi ruŋa i a Ietū ꞌo tū meꞌe kī era e rā viꞌe pē nei ē: «Ko kī tahi mai ꞌana i tāꞌaku meꞌe i aŋa ki ꞌaŋarīnā».
40 I tuꞌu era rā nuꞌu, he ani ki a Ietū mo noho ꞌi muri i a rāua, ꞌe he noho ꞌi ira e rua mahana.
41 I ŋaroꞌa era mai i a ia mau ꞌā i tāꞌana meꞌe kī, ko ꞌata rahi atu ꞌana te nuꞌu haka moe i te manaꞌu ꞌi ruŋa i a ia.
42 ꞌE he kī e te nuꞌu ki rā viꞌe: «Hora nei ko haka moe ꞌana a mātou i te manaꞌu ꞌi ruŋa i a ia, taꞌe nō ꞌō ꞌo tū meꞌe kī mai era e koe, ꞌo te ai takoꞌa ko ŋaroꞌa ꞌana e mātou mau ꞌana i a ia, ꞌe ko ꞌite ꞌā e mātou ko ia mau ꞌā te kope mo haka eꞌa i a tātou i te taŋata mai roto i te ūtuꞌa o te hara ꞌe mo vaꞌai mai i te ora ꞌāpī ꞌina he hopeꞌa raꞌa».
He haka ora iŋa o Ietū i te poki o te kape vaꞌehau
(Māteo 8.5-13; Ruka 7.1-10)
43 I oti era tū mahana era e rua, he eꞌa a Ietū mai Tāmāria he oho ki Karirea,
44 ka ai atu ko kī era ꞌā e ia mau ꞌā: ꞌina e ko moꞌa te perofeta e te nuꞌu o tōꞌona kāiŋa.
45 I tuꞌu era ki Karirea, he koa e te nuꞌu o ira ꞌo te ai i oho takoꞌa rō a rāua ki Hērutarema mo te ⸤ŋoŋoro o te Pakate⸥ ꞌe ꞌi ira i takeꞌa ai i te meꞌe taꞌatoꞌa aŋa e Ietū.
46 He hoki ia a Ietū ki Kānā era o Karirea, kona haka riro era i te vai he ꞌava. ꞌI ira te taŋata hōnui e tahi aŋa ki te ꞌariki rōmano ko māui-ui ꞌana tāꞌana poki ꞌi Kaperenāū.
47 I ꞌite era e rā taŋata ko tuꞌu ꞌana a Ietū ki Karirea mai Hūrea, he oho he uꞌi ꞌe he ani mo oho ki tōꞌona hare mo haka ora i te māui-ui o tāꞌana poki ko hāhine ꞌā mo mate.
48 He kī a Ietū:
—A kōrua, mo taꞌe takeꞌa i te mana, e ko haka moe i te manaꞌu ꞌi ruŋa i te ꞌAtua.
49 He kī e tū taŋata hōnui era:
—E Ietū, ka hōrou koe mai taꞌe mate tāꞌaku poki.
50 He kī ia e Ietū:
—Ka hoki koe ki tuꞌu hare; taꞌa poki ko ora ꞌana.
He haka moe rā taŋata i tōꞌona manaꞌu ki tū vānaŋa kī era e Ietū ꞌe he eꞌa he oho rō ꞌai.
51 E oho nō ꞌana ki tōꞌona hare he piri tāꞌana nuꞌu tāvini ꞌi te ara ꞌe he kī: «¡Ko ora ꞌana te māui-ui o te poki!».
52 He ꞌui e tū taŋata era: «¿Hora aha i haꞌamata i ora ai te māui-ui?». He pāhono e rā nuꞌu: «ꞌI ꞌaŋataiahi pe te hora hoꞌe o te ahi-ahi i kore ai te vera o te hakari».
53 He aŋi-aŋi ia e rā taŋata ko tū hora kī mau era ꞌā e Ietū: «Ko ora ꞌana te māui-ui o taꞌa poki». ꞌE he haka moe rō ꞌai te manaꞌu ꞌi ruŋa i a Ietū, ꞌe pē ira ꞌā te nuꞌu taꞌatoꞌa o tōꞌona hare.
54 He rua aŋa iŋa nei o Ietū i te mana ꞌi Karirea mai tōꞌona hoki iŋa mai mai Hūrea.
