Marko 3:1-35
3 ꞌI te mahana haka ora haka ꞌou e tahi, he oho a Ietū ki te ⸤hare pure hūrio⸥. ꞌI roto e tahi taŋata rima rehe-rehe.
2 ꞌI roto takoꞌa te nuꞌu uꞌi hoki e haka ora rō a Ietū i te rima o tū taŋata era ꞌi rā mahana, mo ravaꞌa ꞌōtohe mo tuhi ko aŋa ꞌā i te meꞌe taꞌe tano ki te rāua haka tere iŋa.
3 He kī e Ietū ki tū taŋata rima rehe-rehe era: «Ka māroa rā koe ꞌi vāeŋa».
4 He ꞌui ia e Ietū ki tū nuꞌu era: «¿He aha te meꞌe haꞌatiꞌa mo aŋa ꞌi te mahana haka ora: he meꞌe riva-riva ꞌo he meꞌe rake-rake? ¿He haka ora i te taŋata ꞌo he tiŋaꞌi he haka mate?».
ꞌIna e tahi o rā nuꞌu i pāhono.
5 I riri a Ietū i uꞌi ai ki tū nuꞌu era koia ko haka ꞌaroha ꞌi te hio-hio o te rāua māhatu. He kī ia ki tū taŋata rima rehe-rehe era: «Ka haka toro mai tuꞌu rima».
I haka toro era he ora rō ꞌai tū rima era.
6 I eꞌa era tū nuꞌu ⸤fariseo⸥ era, he haꞌamata he haꞌaꞌau ananake ko te nuꞌu peꞌe ki a ⸤ꞌErore⸥ mo tiŋaꞌi mo haka mate i a Ietū.
Meꞌe rahi nō atu te nuꞌu i oho ki a Ietū
7 E tahi mahana he oho a Ietū ananake ko tāꞌana nuꞌu hāpī ki te taha-taha o te vai era ko Karirea. ꞌI muri i a rāua i oho ai meꞌe rahi taŋata noho hāhine ki ira.
8 I ꞌite era e te nuꞌu o ruŋa i te mana taꞌatoꞌa aŋa e Ietū, he pae takoꞌa mai Hūrea, mai Hērutarema, mai Irumea, mai te rua pāꞌiŋa o te rio era ko Horotana, mai Tiro ꞌe mai Tīrone.
9 ꞌO ira a Ietū i kī ai ki tāꞌana nuꞌu hāpī mo haka riva-riva e tahi vaka mo eke ōꞌona ꞌo rei-rei i a ia e te taŋata.
10 ꞌI te rahi o te nuꞌu haka ora e ia, ꞌai e rere era te nuꞌu māui-ui taꞌatoꞌa ki ruŋa mo haka puā.
11 ꞌE te tātane oꞌo ki roto i te hakari o te nuꞌu, e takeꞌa era i a Ietū, he haka tū-turi i rā nuꞌu ꞌi muꞌa o Ietū koia ko kī pūai: «¡Ko koe te Poki o te ꞌAtua!».
12 Te aŋa nō ꞌa Ietū he ture pē nei ē: «ꞌIna kōrua ko haka ꞌite haka ꞌou ko ai a au».
He toꞌo iŋa o Ietū i te ŋāŋata mo ⸤ꞌāpōtoro⸥
(Māteo 10.1-4; Ruka 6.12-16)
13 He iri ia a Ietū ki ruŋa i te maꞌuŋa ananake ko te nuꞌu i haŋa e ia. I taka-taka era ꞌi ruŋa,
14 he toꞌo mai roto e hoꞌe ꞌahuru mā piti taŋata mo hāꞌūꞌū ki a ia ꞌe mo haka ꞌite o ruŋa i te ⸤roŋo riva-riva o te ꞌAtua⸥. Ki rā nuꞌu i kī ai he ꞌāpōtoro,
15 ꞌe he vaꞌai ki a rāua i te parau mo haka eꞌa mai roto i te taŋata i te tātane.
16 He nuꞌu nei te nuꞌu i toꞌo e Ietū: ko Tīmona, nape e Ietū ko Pētero;
17 ko ⸤Tanatiako⸥ ꞌe ko ⸤Iovani⸥, ararua e kī era e Ietū ko Voanéreke (te auraꞌa: «he ŋā poki o te pātiri»). A rāua he ŋā poki ꞌa Tevereo.
18 Te meꞌe takoꞌa i toꞌo: ko Antarea, ko Feripe, ko Torometi, ko Māteo, ko Tōmā, ko Tanatiako, poki ꞌa Arafeo, ko Tāreo, ko Tīmona, o roto i te nūnaꞌa he ⸤kananeo⸥,
19 ꞌe ko Hura Ikariote, hoꞌo era i a Ietū.
Te mana o Ietū e kī era o ⸤Veresepupa⸥
(Māteo 12.22-32; Ruka 11.14-23; 12.10)
20 I hoki era a kuā Ietū ki te hare noho o rāua, he taka-taka haka ꞌou te taŋata ꞌi ira. ꞌI te rahi, ꞌina he ravaꞌa te hora mo kai o rāua.
21 I ꞌite era e te huaꞌai o Ietū i tāꞌana meꞌe aŋa, he oho mo toꞌo ꞌe mo maꞌu ꞌi muri i a rāua; e kī era, paꞌi, ko maꞌa-maꞌa ꞌana.
22 ꞌE o te ⸤maꞌori o te haka tere hūrio⸥ tuꞌu mai Hērutarema te kī: «Ko oꞌo ꞌā a Veresepupa, pūꞌoko o te tātane, ki roto i te kope era ꞌe ko vaꞌai ꞌā i te parau mo haka eꞌa i te tātane mai roto i te taŋata».
23 He kī e Ietū ki rā nuꞌu mo haka hāhine ki muri i a ia ꞌe he haꞌaauraꞌa hai vānaŋa nei:
«¿Pē hē a Rukifero ana haka eꞌa i a ia mau ꞌā?
24 Te henua tamaꞌi ki a rāua ꞌā e ko roa he ŋaro,
25 ꞌe te huaꞌai moto ki a rāua ꞌā e ko roa he haꞌataꞌa.
26 Pē ira takoꞌa, mo moto o Rukifero ꞌe o tāꞌana tātane ki a rāua ꞌā, te pūai o tōꞌona haka tere iŋa he ŋaro.
27 »ꞌIna e tahi kope mo uru mo toꞌo i te meꞌe o roto i te hare o te ꞌaito mo taꞌe here-here ꞌi raꞌe i rā ꞌaito. Pē ira mau nō, paꞌi, ana ravaꞌa i te meꞌe o roto i rā hare.
28 »ꞌĪ a au he kī atu: te ꞌAtua e haka kore nō i te hara taꞌatoꞌa ꞌe i te meꞌe taꞌe tano kī e te taŋata.
29 Te hara mau nō mo taꞌe haka kore e te ꞌAtua: he kī i te vānaŋa taꞌe tano mo te ⸤Vārua Maitai⸥. Te hara nei e ko kore ki te hora hopeꞌa».
30 I kī ai a Ietū i te meꞌe nei ꞌo te kī e rā nuꞌu ko oꞌo ꞌā a ia e te tātane.
He matuꞌa vahine ꞌe he taina o Ietū
(Māteo 12.46-50; Ruka 8.19-21)
31 He tuꞌu ia te matuꞌa vahine ꞌe te taina o Ietū. He no-noho ꞌi haho ꞌe he uŋa i te roŋo mo eꞌa.
32 He kī e te nuꞌu o muri i a Ietū:
—Ē, ꞌai tuꞌu matuꞌa vahine ꞌe tuꞌu ŋā taina era ꞌai haho ki a koe.
33 He kī e Ietū:
—¿Ko ꞌite ꞌana a kōrua ko ai te nuꞌu he matuꞌa ꞌe he taina takoꞌa ōꞌoku?
34 He uꞌi riva-riva ki te nuꞌu o tū kona era, ꞌai ka kī haka ꞌou:
—ꞌI nei takoꞌa te nuꞌu he matuꞌa vahine ꞌe he taina ōꞌoku.
35 Te nuꞌu aŋa, paꞌi, i te meꞌe haŋa o te ꞌAtua he huaꞌai takoꞌa ōꞌoku.