Marko 6:1-56
6 He hoki a Ietū ki tōꞌona kāiŋa ko Nātāreta. ꞌI muri i a ia i oho ai tāꞌana nuꞌu hāpī.
2 I tano era te ⸤mahana haka ora⸥, he haꞌamata he hāpī ꞌi roto i te ⸤hare pure hūrio⸥. Nuꞌu rahi i ŋaroꞌa i a Ietū ꞌe he ꞌui ki a rāua ꞌā koia ko māere:
—¿ꞌI hē te kope nei i ꞌite ai i te meꞌe taꞌatoꞌa era? ¿O hē tōꞌona mārama-rama ꞌe te pūai mo aŋa i te mana aŋa e ia?
3 ¿Taꞌe ꞌō te kope nei he tāmuta, he poki ꞌa ⸤Māria⸥, ꞌe he taina o ⸤Tanatiako⸥, o ⸤Kōsē⸥, o Hura ꞌe o Tīmona? ¿Taꞌe ꞌō ꞌi nei takoꞌa e noho ena tōꞌona ŋā taina vahine ena?
ꞌE te nuꞌu o ira he riri rō atu ꞌai mo Ietū, ꞌe kai haka moe i te rāua manaꞌu ꞌi ruŋa i a ia.
4 He kī ia e Ietū:
—ꞌIna e tahi perofeta moꞌa e tōꞌona huaꞌai ꞌe e te nuꞌu o tōꞌona kāiŋa. O te nuꞌu o te tētahi kona te moꞌa i a ia.
5 ꞌE kai rahi te mana i aŋa e Ietū ꞌi Nātāreta, he taꞌe haka moe o te nuꞌu o rā kona i te manaꞌu ꞌi ruŋa i a ia. Te mana nō i aŋa he haka ora i te tētahi nuꞌu māui-ui i haka puā hai rima.
6 ꞌE a Ietū ko māere ꞌā ꞌi te nuꞌu o ira ꞌi te taꞌe ⸤haka moe i te manaꞌu⸥ ꞌi ruŋa i a ia.
He uŋa iŋa e Ietū i tāꞌana nuꞌu hāpī
(Māteo 10.5-15; Ruka 9.1-6)
He eꞌa ia a Ietū he oho ki kona era ki kona era e hāpī ꞌā i te taŋata.
7 E tahi mahana he haka taka-taka e Ietū i tāꞌana nuꞌu hāpī e hoꞌe ꞌahuru mā piti, ꞌe he uŋa hoko rua hoko rua koia ko vaꞌai i te parau ꞌe i te pūai mo haka eꞌa i te tātane oꞌo ki roto i te taŋata.
8 He kī mo taꞌe maꞌu e tahi meꞌe pa he pūtē, haraoa ꞌe moni mo te ara. Te meꞌe mau nō mo maꞌu he toko-toko.
9 E riva nō mo oho e uru rō ꞌā i te kirivaꞌe, ꞌe te meꞌe mo taꞌe maꞌu takoꞌa he kahu mo mono.
10 He kī e Ietū:
«Ki tuꞌu kōrua ki te kona nūnaꞌa hare e tahi, e noho ꞌi te hare raꞌe nō era mo toꞌo i a kōrua ꞌātā ki te kōrua oho iŋa mai ira.
11 ꞌE mo tuꞌu kōrua ki te kona ꞌina he haŋa atu ꞌe ꞌina he haka roŋo atu te nuꞌu o ira, e tū-tū te puŋaꞌehu mai te kōrua vaꞌe mo haka ꞌite ki rā nuꞌu: ka topa era ꞌi ruŋa i a rāua te ūtuꞌa o te ꞌAtua, he hape o rāua mau ꞌā, ꞌe ꞌai kōrua ka oho rō mai ira».
12 He eꞌa he oho ia tū nuꞌu hāpī era ꞌa Ietū he kī ki te nuꞌu mo ⸤huri i te manaꞌu ki te ꞌAtua⸥, ki tano ai te rāua noho iŋa ki a ia.
13 ꞌE, takoꞌa, i haka eꞌa rō mai roto i te taŋata meꞌe rahi nō atu tātane, ꞌe meꞌe rahi nuꞌu māui-ui i paru ꞌiti-ꞌiti hai mōrī ꞌe i haka ora.
He aha i tiŋaꞌi ai i a Iovani Papatito
(Māteo 14.1-12; Ruka 9.7-9)
14 Te ꞌariki ko ⸤ꞌErore⸥ ko ŋaroꞌa ꞌā i te vānaŋa o ruŋa i a Ietū. ꞌI te kona taꞌatoꞌa, paꞌi, e vānaŋa era te nuꞌu o ruŋa. Tētahi e kī era: «Ko Iovani Papatito ko ora ꞌā mai te mate, ꞌo ira e pūai era mo aŋa i te mana».
15 He kī e te tētahi: «Ko te perofeta era o muꞌa ꞌā ko ꞌĒria». ꞌE o te tētahi haka ꞌou atu te kī: «He perofeta e tahi, pa he ŋā perofeta era o muꞌa ꞌā».
16 I ŋaroꞌa era i tū ŋā meꞌe era e ꞌErore, he kī: «Ko Iovani te meꞌe era. ꞌĀꞌaku i uŋa i haka paꞌo i tōꞌona pūꞌoko, ꞌe, hora nei, ko ora haka ꞌou ꞌā».
17 Hai ꞌEroria a ꞌErore i uŋa i haka ꞌa-ꞌaru ai i a Iovani ꞌe he haka here-here hai vivi ꞌi roto i te hare maꞌuꞌaurī. A ꞌEroria he viꞌe ⸤hāipo-ipo⸥ ꞌa Fīripo, taina o ꞌErore, ꞌe a ꞌErore i hāipo-ipo nō ki rā viꞌe.
18 A Iovani te aŋa nō he ture ki a ꞌErore: «Ko hape ꞌā a koe i toꞌo ai i te viꞌe o tuꞌu taina mo viꞌe ꞌāꞌau».
19 ꞌO ira a ꞌEroria e maꞌu era i te riri mo Iovani, ꞌe he haŋa mo tiŋaꞌi. Te meꞌe nō, ꞌina he ravaꞌa pē hē.
20 A ꞌErore e riꞌa-riꞌa rō ꞌana i a Iovani. Ko ꞌite ꞌana he taŋata moꞌa ꞌe aŋa i te meꞌe tī-tika ki te mata o te ꞌAtua. ꞌO ira e hāpaꞌo era. He mira-mira nō te manaꞌu o ꞌErore e ŋaroꞌa era i te vānaŋa ꞌa Iovani. ꞌE, ka ai atu pē ira, ko te haka roŋo iŋa ꞌā hai māhatu.
21 ꞌI te mahana e tahi, he uꞌi e ꞌEroria ko ai ꞌana ꞌō te rāveꞌa mo tiŋaꞌi i a Iovani. ꞌI te mahana poreko o ꞌErore, he aŋa i te ŋoŋoro mo koa ananake ko te kōmana, ko te kape ꞌe ko te nuꞌu hōnui o Karirea.
22 ꞌI rā ŋoŋoro i ꞌori ai te poki vahine ꞌa ꞌEroria. ꞌI te nehe-nehe o rā uka ꞌe o tōꞌona ꞌori iŋa he koa tahi te nuꞌu o rā ŋoŋoro. He kī ia e te ꞌariki ko ꞌErore ki tū uka era:
—Ka no-noꞌi nō mai taꞌa meꞌe haŋa, he vaꞌai atu e au.
23 He hōrea ki rā uka e vaꞌai nō e ia i te meꞌe nō i haŋa ka ai atu he pāꞌiŋa o te henua haka tere e ia.
24 He oho tū uka era he ꞌui ki tōꞌona matuꞌa vahine:
—¿He aha tāꞌaku meꞌe ka no-noꞌi nei?
He pāhono:
—Ka kī mo vaꞌai atu i te pūꞌoko o Iovani Papatito.
25 He hoki tū uka era ki muꞌa o te ꞌariki, he kī:
—Tāꞌaku meꞌe haŋa he vaꞌai mai ōꞌou, ꞌi te hora mau ena ꞌā, i te pūꞌoko o Iovani ꞌi ruŋa i te mareti.
26 He haka kiva-kiva ꞌe he māui-ui rō atu ꞌai te māhatu o te ꞌariki. ꞌE, ꞌi te meꞌe ko hōrea ꞌā ꞌi muꞌa o tū nuꞌu taꞌatoꞌa era, he ꞌē-ē rō atu ꞌai ꞌo haꞌamā ꞌi te taꞌe haka tano i tāꞌana vānaŋa.
27 He uŋa, ꞌi rā hora mau ꞌā, ki te vaꞌehau e tahi mo maꞌu i te pūꞌoko o Iovani. He oho tū vaꞌehau era ki roto i te hare maꞌuꞌaurī, he paꞌo i te pūꞌoko o Iovani,
28 ꞌe ꞌi ruŋa i te mareti i maꞌu ai. He vaꞌai ki tū uka era, ꞌe o rā uka i vaꞌai ki tōꞌona matuꞌa vahine.
29 I ꞌite era e te nuꞌu hāpī ꞌa Iovani, he oho he toꞌo i te hakari ꞌe he maꞌu he tanu.
He hāŋai iŋa o Ietū i te nuꞌu rahi
(Māteo 14.13-21; Ruka 9.10-17; Iovani 6.1-14)
30 Tū nuꞌu ⸤ꞌāpōtoro⸥ uŋa era e Ietū, i hoki era, he taka-taka ꞌi muri i a Ietū ꞌe he ꞌaꞌamu i te rāua meꞌe i aŋa ꞌe i hāpī ki te nuꞌu.
31 He kī e Ietū: «Mai ki oho ki haka ora tātou ꞌi te kona ꞌina he taŋata».
I kī ai i te meꞌe nei ꞌo te ai pē rā ꞌā te taŋata e tuꞌu ꞌe e oho era ꞌe ꞌina he ravaꞌa i te hora mo kai o rāua.
32 He oho ia a kuā Ietū ꞌi ruŋa i te vaka ki te kona mo noho ko rāua nō.
33 Meꞌe rahi nō atu nuꞌu i takeꞌa i te oho iŋa, ꞌe ko aŋi-aŋi ꞌā ko ai rā nuꞌu. ꞌO ira, mai te kona taꞌatoꞌa i tāhuti i oho ai te taŋata ki te kona ki ira e oho era a kuā Ietū, ꞌe ꞌi raꞌe ꞌā i tuꞌu ai.
34 I topa era a Ietū mai ruŋa i te vaka, he takeꞌa i te rahi o te taŋata e tiaki ꞌā ki a ia. He haka ꞌaroha ꞌi rā nuꞌu; e tuꞌu rō ꞌana, paꞌi, pa he māmoe ꞌina he taŋata mo hāpaꞌo. He haꞌamata ia a Ietū he hāpī meꞌe rahi nō atu meꞌe o ruŋa i te ⸤haka tere iŋa ꞌāpī o te ꞌAtua⸥.
35 Pe te ahi-ahi, he haka hāhine ki a Ietū tū nuꞌu hāpī era ꞌāꞌana he kī:
—E Ietū, ko ahi-ahi ꞌā ꞌe te kona nei kona taꞌe noho taŋata.
36 Ka haka oho te nuꞌu ena a te kona hāhine mai mo hoꞌo hai meꞌe mo kai o rāua.
37 He kī e Ietū:
—Ka vaꞌai e kōrua hai meꞌe mo kai.
He pāhono e rā nuꞌu:
—¿Pē hē ia a mātou ana hoꞌo mai i te kai mo te nuꞌu taꞌatoꞌa nei? Ka ai atu i a mātou te tara ꞌauhau o te piti hānere mahana aŋa, ꞌina ꞌā e ko tano mo hāŋai i te rahi ena.
38 He ꞌui ia e Ietū:
—¿He aha te meꞌe ai mo kai? Ka oho rā ka uꞌi.
I uꞌi era he kī:
—E rima nō haraoa ꞌe e rua ika.
39 He uŋa e Ietū mo kī ki te nuꞌu mo no-noho ꞌi ruŋa i te mauku e haka nūnaꞌa.
40 Pē ira i no-noho ai e pae ꞌahuru ꞌe e hoꞌe hānere taŋata ka tahi nūnaꞌa.
41 He toꞌo ia e Ietū i tū haraoa era e rima ꞌe i tū ika era e rua, he uꞌi a te raŋi, he māuru-uru ki te ꞌAtua. I oti era, he more-more i te haraoa, he vaꞌai ki tāꞌana nuꞌu hāpī mo tuhaꞌa ki te taŋata. ꞌE he tuhaꞌa takoꞌa i tū ika era.
42 He ka-kai tahi tū nuꞌu taꞌatoꞌa era ka mākona rō.
43 I oti era he haꞌaꞌī e hoꞌe ꞌahuru mā piti kānato o te pārehe-rehe topa.
44 Te nuꞌu i kai e pae taꞌutini ŋāŋata.
He haꞌere iŋa o Ietū ꞌi ruŋa i te vai
(Māteo 14.22-27; Iovani 6.16-21)
45 I oti era te meꞌe nei he kī e Ietū ki tāꞌana nuꞌu hāpī mo eke ki ruŋa i te vaka ꞌe mo oho ꞌi raꞌe ki a ia ki Vetetaira; ko ia mo noho mo haka oho i te nuꞌu.
46 I haka oho tahi era, he iri ki ruŋa i te maꞌuŋa he pure.
47 I pō era, ꞌi vāeŋa tini o te vai tū vaka era, ꞌe a Ietū hoko tahi nō ꞌi ꞌuta.
48 He takeꞌa aŋa riꞌa-riꞌa tū nuꞌu era ꞌāꞌana e hoe era i te vaka ꞌo te ai ꞌi muꞌa te tokerau.
ꞌI te popohaŋa he haꞌere he oho a Ietū a ruŋa i te vai a te kona era ꞌi ira rā nuꞌu. Ko oho ꞌā mo oŋa pe muꞌa o tū vaka era,
49 he takeꞌa e rā nuꞌu i te kope e tahi e haꞌere e oho ꞌana a ruŋa i te vai. He veveri ꞌe he haka kiva-kiva ꞌo te manaꞌu he vārua;
50 taꞌatoꞌa, paꞌi, i takeꞌa ai ꞌe he riꞌa-riꞌa rō atu ꞌai. He kī ia e Ietū: «¡Kiahio kōrua! Ko au nei. ¡ꞌIna ko mataku!».
51 He eke ia a Ietū ki ruŋa i te vaka ꞌe he noho rō ꞌai te tokerau. He māere tū nuꞌu era.
52 Ka ai atu, paꞌi, ko takeꞌa ꞌana i te mana aŋa mo haka rahi i te haraoa ꞌe i te ika, ꞌina ꞌā he aŋi-aŋi ko ai mau a Ietū ꞌi te taꞌe haka moe riva-riva i te rāua manaꞌu ꞌi ruŋa i a ia.
He haka ora iŋa o Ietū i te nuꞌu māui-ui o Henetareta
(Māteo 14.34-36)
53 He oho ia ananake ki te kona ko Henetareta. ꞌI ira ꞌi te taha-taha i here ai i te rāua vaka.
54 Kai roa te rāua tomo ki ꞌuta i aŋi-aŋi rō ai e te nuꞌu i a Ietū.
55 He tāhuti he haka ꞌite a te kona taꞌatoꞌa o ira, ꞌe he haꞌamata te taŋata he tari i te rāua māui-ui a ruŋa i te raŋo ki te kona ŋaroꞌa ꞌi ira a Ietū.
56 Kona nō era ꞌi ira a Ietū, ka ai atu ꞌi ꞌuta ꞌo ꞌi te kona nūnaꞌa hare, ꞌai te taŋata e haka rē era i te rāua māui-ui a te kona a ira ka vari era. ꞌE, e vari e oho era a Ietū, he ani e te māui-ui mo haꞌatiꞌa i a rāua mo haka puā ka ai atu ki te titi o tōꞌona kahu; ꞌe taꞌatoꞌa taŋata haka puā, he ora te rāua māui-ui.
