ꞌUI 7
¿He aha te vānaŋa i kī e te Puka o te ꞌAtua o ruŋa i te ŋā mahana nei?
“O te ai he tamaꞌi te kaiŋa ki te rua kaiŋa, te henua ki te rua henua [...]. Taꞌatoꞌa meꞌe nei he haꞌamata o te ꞌati.”
“E rahi nō te pukuraŋa haꞌavare ka eꞌa mai ena e he haka poteko i te ara o te taŋata; e i te rahi o te aŋa taꞌe tano, he ŋaro he oho te here o te rahi o te taŋata.”
“Ka ŋaroꞌa ena kōrua o ruŋa i te tamaꞌi e o ruŋa i te parau ꞌāpī o te tamaꞌi, ꞌina kōrua ko riꞌa-riꞌa; ko te ŋā meꞌe nei te meꞌe mo piri mai, e ꞌina ꞌā kai tuꞌu mai ꞌā te paꞌo o te ao.”
“He makenu-kenu nui-nui te henua, e i te ao taꞌatoꞌa te maꞌi e te oŋe o te kai; e he tikeꞌa te rauhuru meꞌe haka riꞌa-riꞌa e mai ruŋa i te raŋi te meꞌe nui-nui ka tikeꞌa ena.”
“I te ŋā mahana hopeꞌa o te ao rake-rake nei, he piri mai te ꞌati nui-nui, aŋa riꞌa-riꞌa mo haka tere. O te ai te taŋata he here ki a rāua ꞌā, he here ki te moni, teꞌo-teꞌo, a ruŋa i te kēkēꞌu ana uꞌi atu, vāvā i te ꞌAtua, taꞌe haka roŋo ki te rāua matuꞌa, ꞌina e tahi meꞌe mo mauru-uru atu, ꞌina he moꞌa i te rāua vānaŋa, ꞌina he here taŋata, ꞌina he tano te manaꞌu i roto i a rāua ꞌā, vāvā i te taŋata, ꞌina he haka noho i a rāua mo taꞌe aŋa i te meꞌe rake-rake, ꞌina he haka ꞌaroha i te taŋata, e ko haŋa ki te meꞌe riva-riva, a muꞌa he kī atu e tahi meꞌe e a tuꞌa he ꞌoꞌoka atu i tuꞌu tuꞌa ivi, ꞌeta-ꞌeta, haka uma i a rāua, he ata haŋa ki te reka taꞌe ki te ꞌAtua, he haka tuꞌu pahe taŋata o te ꞌAtua e hai rāua aŋa e haka tikeꞌa ena pe nei ē he reo-reo.”
