KAU 10
A Ietū he taŋata haka roŋo
¿Meꞌe aŋa rahi mo haka roŋo ki a koro e ki a nua?... Peaha ko tuꞌu ꞌā te mahana kai haŋa koe mo haka roŋo ki a rāua. E ¿Ko ꞌite ꞌā koe he aha te meꞌe mo haꞌūꞌū atu mo haka roŋo ꞌoꞌou? Ka uꞌi koe a ruŋa i a Ietū. ¿Ko ꞌite ꞌā koe meꞌe haka roŋo nō a īa ki a Iehoha e ki toꞌona matuꞌa?... Mai ki hāpī tātou o ruŋa i a Ietū.
Raꞌe ki te turu mai ki ruŋa i te henua, a Ietū i ruŋa i te raŋi e noho era i muri i toꞌona matuꞌa ko Iehoha. I ai takoꞌa rō te matuꞌa o Ietū i ruŋa i te henua, te ꞌīŋoa o rāua ko José e ko María. ¿Ko ꞌite ꞌā koe pe hē a rāua i riro ai he matuꞌa o Ietū?...
A Iehoha ko toꞌo ꞌā i a Ietū e ko haka tupu ꞌā i roto i a María e peira i poreko ai i ruŋa i te henua. Te meꞌe nei i aŋa ai hai mana o te ꞌAtua. I tupu era Ietū i roto i a María, he nui-nui he oho pahe ŋā poki taꞌatoꞌa. I tano era te iva avaꞌe he poreko. Peira i riro ai a José rāua ko María he matuꞌa o Ietū i ruŋa i te henua.
E 12 nō matahiti o Ietū i oho ai koīa ko toꞌona huaꞌai ki Jerusalén ki te ŋoŋoro e tahi o te ꞌAtua. I te hoki iŋa mai ki te rāua hare mai tū ŋoŋoro era, he ŋaro a Ietū. He eꞌa ia he kimi e José rāua ko María e ꞌina kai ravaꞌa. ¿He aha a Ietū i ŋaro ai? O te ai ko aŋa ꞌā e tahi meꞌe mo haka tikeꞌa i te rahi o toꞌona here ki toꞌona matuꞌa o ruŋa i te raŋi ko Iehoha. ¿I hē a Ietū koe e manaꞌu ena?...
¿O te aha a Ietū i oho ai ki te Hare o te ꞌAtua?
I tahuti a José rāua ko María ki Jerusalén mo kimi i a Ietū i te taꞌatoꞌa kona. A rāua ko tipa-tipa ꞌā i te taꞌe ravaꞌa i a īa. I tano era ka toru mahana o te kimi, he ravaꞌa i roto i te Hare o te ꞌAtua. ¿Ko ꞌite ꞌā koe o te aha i oho ai a Ietū ki ꞌira?... I ꞌira a īa e riva era mo ata ꞌite o ruŋa i toꞌona Matuꞌa ko Iehoha. Oīra i noho ai i rā kona. A īa e here rahi rō ꞌā ki a Iehoha e ko haŋa ꞌā mo ata ꞌite pe hē ana haka koa i a Īa. Takoꞌa, i paꞌari i oho era a Ietū, ko te haka roŋo haŋa ꞌā ki a Iehoha. No atu te aŋa rahi e i te aŋa rake-rake aŋa e te taŋata i ruŋa i a īa, i haka roŋo rō a Ietū ki toꞌona matuꞌa ko Iehoha. ¿I haka roŋo takoꞌa rō ki a José rāua ko María?... E ē, te Puka o te ꞌAtua e kī rō ꞌā e ē.
¿He aha te meꞌe o tātou mo hāpī o ruŋa o Ietū?... Ko hāpī mai ꞌā i te meꞌe nui-nui e tahi: e haka roŋo ki a nua e ki a koro, no atu te aŋa rahi mo haka roŋo. ¿E aŋa takoꞌa rō koe peira?...
