Mai te iti⁠-⁠iti haŋa ꞌā a Samuel i noho ai i te karapā era o Iehoha mo aŋa i ꞌira. Ki te kona nei te nuꞌu e pae era mo pure ki a Iehoha. ¿Haŋa rō koe mo ꞌite pe hē a Samuel i tuꞌu ai ki ꞌira? Raꞌe tātou ka hāpī nei o ruŋa i te matuꞌa vahine o Samuel, ko Ana toꞌona ꞌīŋoa.

Rahi nō te matahiti a Ana e pohe era mo ai taꞌana poki. Oīra he pure e he nonoꞌi ki a Iehoha mo haꞌūꞌū mo tupu taꞌana poki. He kī ki te ꞌAtua mo ai taꞌana poki, he uŋa mo aŋa ki a Īa i roto i tū karapā era. He pahono e Iehoha i tū pure era e he tupu e he poreko e tahi poki tane, te ꞌīŋoa ko Samuel. He aŋa e Ana tū meꞌe kī era e īa ki te ꞌAtua. Ki hahine mo tano te hā matahiti o Samuel, he maꞌu ki roto ki tū karapā era mo aŋa ki te ꞌAtua.

Te puꞌoko haka tere o te karapā o te ꞌAtua, ko Elī toꞌona ꞌīŋoa. E ai rō ꞌā e rua ꞌaꞌana poki tane paꞌari e aŋa era i muri i a īa. Ko ꞌite era ꞌā koe, te karapā he kona e oho era te taŋata mo pure ki te ꞌAtua. Oīra te taŋata aŋa i rā kona, e ai he taŋata haka tere titīka i a rāua. E te ŋā poki era a Elī, he meꞌe rake⁠-⁠rake nō te meꞌe aŋa. Pe rā ꞌā a Samuel e tikeꞌa era te rāua aŋa rake⁠-⁠rake. ¿I aŋa rō e Samuel i te meꞌe rake⁠-⁠rake pe tū ŋā poki era a Elī? ¿Pe hē ki tuꞌu manaꞌu?... ꞌIna. A Samuel ko haka tere titīka ꞌā i a īa a te huru hāpī era e toꞌona matuꞌa.

¿He aha te meꞌe tano mau mo aŋa a Elī ki tū ŋā poki era e rua?... ꞌIna ko haꞌatiꞌa ki taꞌana ŋā poki mo aŋa mo oho i roto i tū karapā era. Kai aŋa a Elī peira. Ko riri riva⁠-⁠riva ꞌā Iehoha mo Elī e mo taꞌana ŋā poki era. Oīra a Iehoha i haka kore ai i a rāua.

E moe no ꞌā a Samuel e tahi pō, he ŋaroꞌa e tahi reꞌo ka raŋi: “¡Samuel!”, he tahuti a Samuel ki a Elī e he kī e Elī: “Taꞌe ꞌaꞌaku koe i raŋi”. Ko tū meꞌe ꞌā i haka roŋo ai e Samuel e rua hora. I te toru ohu iŋa ki a īa, he kī e Elī ki a Samuel: “Ka ohu haka ꞌou atu ena te reꞌo, ka kī: ‘Iehoha i au e haka roŋo atu ena’”. Peira mau ꞌā i aŋa ai e Samuel. He pahono ia e Iehoha e he kī: “Ka kī ki a Elī i au he haka kore i a īa e i taꞌana huaꞌai o te rāua aŋa rake⁠-⁠rake taꞌatoꞌa.” Ki tuꞌu manaꞌu, ¿I haŋa rō a Samuel mo kī te vānaŋa nei ki a Elī?... E riꞌa⁠-⁠riꞌa rō ꞌā a Samuel o nei vānaŋa, e no atu  toꞌona riꞌa⁠-⁠riꞌa, he haka roŋo e he aŋa te meꞌe kī era e Iehoha. Te vānaŋa kī era e Iehoha, peira mau ꞌā i topa ai. I tano era te mahana, he mate a Elī koīa ko taꞌana ŋā poki era.

¿He aha te meꞌe o tātou mo hāpī o ruŋa i a Samuel? A te ara titīka a Samuel i haka tere ai, no atu te haka tere rake⁠-⁠rake o te tahi taŋata. ¿E tuꞌu rō koe pē Samuel ꞌe e aŋa rō koe i te meꞌe titīka? Mo aŋa koe pē Samuel he haka koa koe i a Iehoha e ki tuꞌu matuꞌa.