KAU 7
¿He aha te Haꞌatere o te ꞌAtua?
1. ¿He aha te Haꞌatere o te ꞌAtua?
Te Haꞌatere o te ꞌAtua he Haꞌatere e tahi o ruŋa i te raŋi ka mono tahi ena te haꞌatere taŋata e he tuꞌu ki te roa era mo aŋa te meꞌe haŋa o te ꞌAtua i ruŋa i te raŋi e i ruŋa i te henua. Takoꞌa hai nei Haꞌatere te taŋata o te ꞌAo taꞌatoꞌa ka piri tahi ena pahe huaꞌai. ¡I te Haꞌatere mau mo te taŋata! I mau te parau ꞌāpī riva-riva.—E taiꞌo Daniel 2:44; Mateo 6:9, 10; 24:14.
Taꞌatoꞌa haꞌatere e ai toꞌona puꞌoko mo haka titīka i te aŋa. Ko vaꞌai a Iehoha ki taꞌana poki ko Ietū pahe ariki o toꞌona Haꞌatere.—E taiꞌo Revelación 11:15.
Ka mataꞌitaꞌi te video ¿He aha te Haka Tere o te ꞌAtua?
2. Ko Ietū te ariki hopeꞌa o te riva ¿o te aha?
O te ai a īa he taŋata riva e meꞌe titīka nō taꞌana meꞌe aŋa (Juan 1:14). I ora haka ꞌou era a Ietū, he iri ki ruŋa i te raŋi he noho he tiaki a te paeŋa mataꞌu o te ꞌAtua, mo vaꞌai te toroꞌa mo ariki. I tano era te hora he vaꞌai te toroꞌa e te ꞌAtua. I aŋanirā a īa he ariki pūai mo haꞌūꞌū ki te taŋata e he aŋa peira ka ariki ena i te henua mai ruŋa i te raŋi (Hebreos 10:12, 13).—E taiꞌo Daniel 7:13, 14.
3. ¿E ai rō te tahi taŋata mo ariki i muri i a Ietū?
Te Puka o te ꞌAtua e kī rō ꞌā, e ai rō ꞌā te nunaꞌa taŋata haka roŋo ki te ꞌAtua, i nape ai “nunaꞌa vae”, ka ariki ena i muri i a Ietū (Daniel 7:27). Te nunaꞌa raꞌe i vae e te ꞌAtua ko te pukuraŋa era o Ietū, nā Iehoha e vae e oho nō ꞌā ki aŋanirā, i te taŋata i te ŋā viꞌe here ki a Īa mo haka piri ki te nunaꞌa nei. Pe Ietū ꞌā, te nunaꞌa nei, hora era e mate ena, he haka ora haka ꞌou e te ꞌAtua pahe kuhane i ruŋa i te raŋi.—E taiꞌo Juan 14:1-3; 1 Corintios 15:42-44.
¿Hoko hia taŋata nei? I ruŋa i te Puka o te ꞌAtua e kī rō ꞌā e hia nuꞌu ka ariki ena te henua i muri i a Ietū: 144.000. Nuꞌu taꞌe rahi te nuꞌu nei, ōira i nape ai e Ietū “nuku-nuku iti-iti” (Lucas 12:32).—E taiꞌo Revelación 14:1.
4. ¿He aha te aŋa raꞌe i aŋa e Ietū hora haka ariki era i a īa?
A Ietū i haka ariki ai i 1914, e taꞌana meꞌe raꞌe i aŋa pahe ariki, he tute i te Tatāne ko īa ko taꞌana varūa rake-rake mai ruŋa i te raŋi, e he hoa ki ruŋa i te henua. * I te rahi o te riri o te Tatāne, he ata totoꞌā he oho i te taŋata o te ꞌAo taꞌatoꞌa, mai rā hora te taŋata pe te rake-rake nō e oho ena (Revelación 12:7-10, 12). Te meꞌe tikeꞌa nei e tātou pahe tamaꞌi, makenu-kenu henua, maiūi e ꞌoŋe o te kai, ko haka tano ꞌā ki te meꞌe kī era e Ietū, papaꞌi era i ruŋa i te Puka o te ꞌAtua, e ko haka aŋi-aŋi mai ꞌā nā te Haꞌatere o te ꞌAtua ko hahine ꞌā, mo haka tere e īa i te ꞌAo taꞌatoꞌa.—E taiꞌo Lucas 21:7, 10, 11, 31.
5. ¿E aha ꞌā te haꞌatere o te ꞌAtua i aŋanirā e he aha te aŋa ka aŋa ena pe muꞌa?
I aŋanirā te nunaꞌa o te haꞌatere o te ꞌAtua nā e kimi e oho ena i te taŋata mahatu riva haŋa mo hāpī o ruŋa o Iehoha. Rahi nō te taŋata haka roŋo ki nei hāpī, e ko riro ꞌā he nunaꞌa o te haꞌatere nei. Ko nei taŋata ka ora tahi ena ka paꞌo ena te ꞌAo e te Haꞌatere o te ꞌAtua. Ōira te nuꞌu haŋa mo rovaꞌa te hauhaꞌa riva o nei Haꞌatere e haka roŋo ki a Ietū.—E taiꞌo Revelación 7:9, 14, 16, 17.
A roto i te 1.000 matahiti, te Haꞌatere o te ꞌAtua, he aŋa i te meꞌe raꞌe haŋa era e te ꞌAtua i muꞌa ꞌā mo te taŋata taꞌatoꞌa. Te ꞌAo taꞌatoꞌa he riro he kona nehe-nehe e tahi. E ka hopeꞌa ena he haka hoki e Ietū te haꞌatere ki roto i te rima o toꞌona matuꞌa (1 Corintios 15:24-26). ¿Haŋa rō koe mo ꞌaꞌamu o ruŋa i nei Haꞌatere ki te tahi taŋata?—E taiꞌo Salmo 37:10, 11, 29.
^ parr. 6 Mo ata aŋi-aŋi ꞌoꞌou o ruŋa i te haka ariki o Ietū i 1914 ka uꞌi i ruŋa i te puka ¿Qué enseña realmente la Biblia? I te kaka parau 215 ki te 218.