KAU 5
¿He aha te meꞌe haŋa o te ꞌAtua mo te ꞌAo nei?
1. ¿Mo te aha te ꞌAtua i aŋa ai te ꞌAo?
A Iehoha i aŋa ai te ꞌAo mo te taŋata. Ōira i aŋa ai i a Adán rāua ko Eva, mo noho i ruŋa, taꞌe mo noho i ruŋa i te raŋi o te ai ko aŋa era ꞌā te ꞌAtua i te merahi mo noho ꞌi īra (Job 38:4, 7). A Iehoha i haka noho ai te taŋata raꞌe i ruŋa i te kona nehe-nehe e tahi, te ꞌīŋoa ko Edén (Génesis 2:15-17). Peira ꞌā ko vaꞌai ꞌā te raveꞌa ki rā taŋata e ki toꞌona haka ꞌara mo ora mo oho rō ꞌai i ruŋa i te henua.—E taiꞌo Salmo 37:29; 115:16.
Te kona nei ko Edén, he kona iti-iti nō e tahi i ruŋa i te henua. Ka poreko ka oho era te ŋā poki a Adán rāua ko Eva, he aŋa ananake mo hapaꞌo e mo haꞌariro te henua taꞌatoꞌa pahe kona nehe-nehe nei (Génesis 1:28). Ōira te ꞌAtua i aŋa ai te ꞌAo, mo noho e te taŋata, ꞌe e ko haka kore ki te hora hopeꞌa.—E taiꞌo Salmo 104:5.
Ka mataꞌitaꞌi te video ¿O te aha te ꞌAtua i aŋa ai i te henua?
2. ¿O te aha e taꞌe tuꞌu nei te ꞌAo he kona nehe-nehe pe Edén i aŋanirā?
O te ai kai haka roŋo Adán rāua ko Eva ki te ꞌAtua, ōira i tute ai mai Edén. ꞌIna nei kona toe. Kai ai ꞌā e tahi taŋata mo haꞌariro haka ꞌou rā kona pahe hora raꞌe era, o te ai mai rā hora, te henua e haka tere mai ena e te nuꞌu rake-rake, e kī ena e te Puka o te ꞌAtua (Job 9:24).—E taiꞌo Génesis 3:23, 24.
¿Ko neki ꞌā a tuꞌa a Iehoha o ruŋa i taꞌana meꞌe haŋa mo te ꞌAo? ¡ꞌIna! A Īa he ꞌAtua mana pūai e ꞌina e tahi ꞌaꞌana aŋa mo hape (Isaías 45:18). Pe muꞌa ka oho ena, te ꞌAtua he aŋa te ora iŋa o te taŋata pahe meꞌe haŋa era e Īa i te hora raꞌe era.—E taiꞌo Salmo 37:11, 34.
3. ¿Pe hē ka haꞌariro haka ꞌou ena te ꞌAo he kona nehe-nehe e tahi?
Ma Ietū te ariki o te Haꞌatere o te ꞌAtua e aŋa mo haꞌariro haka ꞌou te ꞌAo he kona nehe-nehe. ¿Pe hē ka aŋa ena? Ma Ietū ko īa ko taꞌana merahi e haka kore tahi te taŋata rake-rake taꞌe haka roŋo ki te ꞌAtua, ka tamaꞌi era i te tamaꞌi nui-nui e tahi te ꞌīŋoa ko Armagedón. Ki ꞌoti, he puru i te Tatāne e hoꞌe tautini matahiti. Te nunaꞌa haka roŋo ki te ꞌAtua he ora ki nei tamaꞌi, o te ai paꞌi ma Ietū e puꞌoko ꞌe e hapaꞌo. I rā hora, nei nuꞌu he ŋaroꞌa iho te ora ki te hopeꞌa raꞌa.—E taiꞌo Revelación 20:1-3; 21:3, 4.
4. ¿A hē ka ꞌoti te mamāe e te taŋi-taŋi?
¿A hē ka haka kore ena te ꞌAtua i te ꞌino? Ko kī mai ꞌā e Ietū he aha te meꞌe o tātou ka tikeꞌa nei ka hahine mai era rā hora. A te huru tikeꞌa nei e tātou i te ꞌAo taꞌatoꞌa i aŋanirā, ko haka aŋi-aŋi mai ꞌā, nā “te paꞌo o te ꞌAo” ko hahine mai ꞌā.—E taiꞌo Mateo 24:3, 7-14, 21, 22.
I te ŋā hoꞌe tautini matahiti, ka ariki mai era a Ietū i te ꞌAo taꞌatoꞌa mai ruŋa i te raŋi, he haka kore he oho i te meꞌe e haka mamāe nei i te taŋata (Isaías 9:6, 7; 11:9). Maꞌana takoꞌa e haka kore e oho i te hara o te taŋata here ki te ꞌAtua. Peira ꞌā hai Ietū te ꞌAtua ka haka kore ena i te maiūi, te korohuꞌa o te taŋata, te rūau o te ŋā viꞌe, e peira ꞌā, he haka kore i te mate.—E taiꞌo Isaías 25:8; 33:24.
5. ¿Ma ꞌai e noho i ruŋa i te Henua Nehe-Nehe?
I roto i te koro paina piri he mahani koe ki te nuꞌu here ki te ꞌAtua haŋa mo hāpī pe hē ana aŋa taꞌana meꞌe haŋa
Mo te taŋata haꞌatura e haka roŋo ki te ꞌAtua, e noho i ruŋa i te henua nehe-nehe (1 Juan 2:17). A Ietū i uŋa ki taꞌana pukuraŋa, mo kimi i te nuꞌu mahatu riva mo hāpī pe hē ana haka tere a te ara haꞌatiꞌa era e te ꞌAtua. I aŋanirā nā Iehoha e hāpī mai ena ki te nuꞌu nei, mo haka tere riva-riva i a rāua i ruŋa i te henua nehe-nehe ka oho mai ena (Sofonías 2:3). I te koro paina piri o te Taŋata Haka ꞌIte o Ruŋa o Iehoha, e hāpī rō ꞌā pe hē ana haka tere te huaꞌai a te huru haŋa o te ꞌAtua, e pe hē ana rovaꞌa i te hauhaꞌa riva o te parau ꞌāpī riva-riva, vaꞌai mai ena e te Puka o te ꞌAtua.—E taiꞌo Miqueas 4:1-4.
