KAU 13
¿He aha te parau ꞌāpī riva-riva o ruŋa i te rauhuru hare pure?
1. ¿E haka tere titīka rō ꞌā te hare pure taꞌatoꞌa?
Ko rahi ꞌā te meꞌe rake-rake aŋa e te pūꞌoko haka tere o te rauhuru hare pure, peaha ko ŋaroꞌa ꞌā e ko tikeꞌa ꞌā e koe pe nei ē, e teki rō ꞌā te ŋā poki riki-riki, e haꞌamoꞌa rō ꞌā i te tamaꞌi, ꞌe e tiŋaꞌi rō ꞌā i te taŋata (2 Corintios 4:3, 4; 11:13-15). No atu nei meꞌe, i roto i te hare pure taꞌatoꞌa e ai rō ꞌā te taŋata e mamāe rō ꞌā te rāua mahatu, o te uꞌi te ŋā aŋa rake-rake nei, o te ai ko haŋa ꞌā mo aŋa te meꞌe riva-riva. Te ꞌAtua e tapa rō ꞌā ki te taŋata haka tere peira, e te meꞌe nei mo noho ꞌoꞌou mo uꞌi, he parau ꞌāpī riva-riva mo tātou.—E taiꞌo Mateo 24:3-5, 11, 12.
Te hare pure parautīꞌa e vānaŋa riva-riva rō ꞌā o ruŋa o Iehoha, e te hare pure taꞌe parautīꞌa he enemī mau ꞌaꞌana. ¿O te aha? O te hāpī i te reo-reo o ruŋa i a Īa, o te hāpī i te manaꞌu taꞌe kī e te Puka o te ꞌAtua, pahe hāpī ena o ruŋa i te nuꞌu era ko mate ꞌā. A Iehoha ko haŋa ꞌā mo ꞌite te taŋata te parautīꞌa mau o ruŋa i a Īa.—E taiꞌo Ezequiel 18:4;1 Timoteo 2:3-5.
2. ¿He aha te parau ꞌāpī riva-riva o ruŋa i te rauhuru hare pure?
E aŋi-aŋi nō ꞌā e te ꞌAtua i te reo-reo o te pukuraŋa e kī ena, e here rō ꞌā rāua ki te ꞌAtua, e te parautīꞌa, ki te ꞌAo o te Tatāne rāua e here ena (Santiago 4:4). Te Puka o te ꞌAtua e kī rō ꞌā, i oti era te aꞌa ꞌua i te hora era o Noé, te hare pure taꞌe parautīꞌa i haꞌamata ai, i te kona tuai e tahi o muꞌa ꞌā, toꞌona ꞌīŋoa ko Babilonia. Te meꞌe aŋa ananake he haka mira-mira rahi i te manaꞌu o te taŋata. E noho nō ꞌā tātou ka haka kore ena e te ꞌAtua, i te hare pure taꞌe parautīꞌa, o te rave ꞌino e o te reo-reo rahi ki te taŋata.—E taiꞌo Revelación 17:1, 2, 5, 16, 17; 18:8.
A Iehoha e tapa rō ꞌā te taŋata riva, e maraŋa mai ena i te rauhuru hare pure taꞌe parautīꞌa o te ꞌAo taꞌatoꞌa, e nā e haka taka-taka e oho mai ena. ¿Pe hē e aŋa ena? Hai hāpī te parautīꞌa o ruŋa i te Puka o te ꞌAtua.—E taiꞌo Miqueas 4:2, 5.
3. ¿He aha te meꞌe mo aŋa te nuꞌu mahatu riva?
Te hare pure parautīꞌa he haꞌūꞌū mo piri te pukuraŋa parautīꞌa i roto i a rāua ꞌā
A Iehoha e uꞌi rō ꞌā ki te taŋata here ki te parautīꞌa e haŋa mo aŋa i te meꞌe riva-riva, ōira e haka vevēri ena mo haka rē te hare pure taꞌe parautīꞌa. Mo ai a rāua e here rō ꞌā hai parautīꞌa ki a Iehoha, he huri i te rāua huru haka tere mo haka koa i a Īa.—E taiꞌo Revelación 18:4.
I te taꞌu raꞌe o muꞌa ꞌā, rahi nō te nuꞌu mahatu riva i pahono ai hai koa, ki te parau ꞌāpī riva-riva tatāra era e te pukuraŋa o Ietū. Ko hāpī ꞌā e Iehoha i te huru haka tere ꞌāpī mo rovaꞌa i te koa mau. Pe rāua ꞌā a tātou ana pahono ki te parau ꞌāpī riva-riva o te Puka o te ꞌAtua, hai aŋa i te meꞌe haŋa o te ꞌAtua raꞌe ki te tahi meꞌe.—E taiꞌo 1 Tesalonicenses 1:8, 9; 2:13.
A Iehoha ko mataki ꞌā toꞌona rima ki te nuꞌu haka rē i te hare pure taꞌe parautīꞌa, mo riro he nunaꞌa ꞌaꞌana. Taꞌatoꞌa nei nuꞌu he riro he ŋaruhoa ꞌoꞌona, he rovaꞌa te here o te taꞌatoꞌa pukuraŋa o te ꞌAtua, e takoꞌa he ai te raveꞌa mo ora ki te hopeꞌa raꞌa. ¿Haŋa rō koe mo rovaꞌa te ŋā hauhaꞌa nei?—E taiꞌo Marcos 10:29, 30; 2 Corintios 6:17, 18.
4. ¿Pe hē te ꞌAtua ka haka koa ena i te taŋata o te ꞌAo taꞌatoꞌa?
Ka haka kore ena e Iehoha i te hare pure taꞌe parautīꞌa, he ŋaroꞌa iho te ora mau i ruŋa i te ꞌAo. O te ai ꞌina he hare pure taꞌe parautīꞌa e ko reo-reo haka ꞌou ki te nuꞌu e ꞌina e ko haka haꞌataꞌa haka ꞌou i te taŋata, te taŋata o te ꞌAo taꞌatoꞌa, ki a Iehoha nō ka haꞌatura ena.—E taiꞌo Revelación 18:20, 21; 21:3, 4.
