KAU 4
¿Ko ai a Ietū?
1. ¿Mai hē a Ietū i oho mai ai?
Hai huru era o Ietū te taŋata e haŋa era mo hahine ki a īa, ¿Ko huru hē? (MATEO 11:29; MARCOS 10:13-16)
Te meꞌe raꞌe i aŋa e Iehoha ko Ietū. A īa he varūa e tahi e noho era i ruŋa i te raŋi, raꞌe ki te poreko mai i ruŋa i te henua (Juan 8:23). He ꞌoti mau ꞌā te meꞌe i aŋa e Iehoha hoko tahi nō, ko Ietū (Juan 1:14). E ꞌaꞌana i haꞌūꞌū ki a Iehoha mo aŋa i te meꞌe taꞌatoꞌa. E takoꞌa ko īa te maꞌu reꞌo o toꞌona matuꞌa.—E taiꞌo Proverbios 8:22, 23, 30; Colosenses 1:15, 16.
2. ¿O te aha a Ietū i oho mai ai ki ruŋa i te henua?
O te ꞌAtua i uŋa i taꞌana poki ki ruŋa i te henua. A Ietū ꞌina he matuꞌa tane taŋata, o te ai ko haka tupu ꞌā e te ꞌAtua i roto i te kaiŋa o te neru judia e tahi, te ꞌīŋoa ko María (Lucas 1:30-35). A Ietū i turu mai ai: 1) mo hāpī te parautīꞌa o ruŋa i te ꞌAtua, 2) mo hāpī mai, a ruŋa i toꞌona huru haka tere, pe he ana aŋa i te meꞌe haŋa o te ꞌAtua, no atu te ꞌati ka piri mai ena 3) mo vaꞌai mai toꞌona hakari hara kore, mo auhau te ora iŋa o te taꞌatoꞌa.—E taiꞌo Mateo 20:28.
3. ¿He aha ana auhau te ora iŋa o te taꞌatoꞌa?
Mo toke i a koe e te taŋata ꞌino, ai ka nonoꞌi te moni ki tū huaꞌai mo haka pakoꞌo i a koe, ¿e auhau rō? He auhau e tū huaꞌai mo ora ꞌoꞌou. A tātou ko hoꞌo ꞌā e Adán ki te mate i hara era īa, ōira e ai te raveꞌa e tahi mo auhau te ora iŋa o te taꞌatoꞌa mo haka kore te tātou hara e mo taꞌe mate haka ꞌou. I aŋa ai e te ꞌAtua i a Adán he taŋata hara kore, ōira taꞌe mo mate a īa. ꞌIna paꞌi he mate e he korohuꞌa o te taŋata i roto i te manaꞌu o te ꞌAtua i aŋa ai te taŋata i ruŋa i te ꞌAo. A tātou ko aŋi-aŋi ꞌā nei meꞌe hai Iehoha, ꞌaꞌana paꞌi i kī ki a Adán mo hara – o te taꞌe haka roŋo ki a Īa- he mate. Ahani Adán i haka roŋo, ko te ora iŋa ꞌā (Génesis 2:16, 17; 5:5). I ruŋa i te Puka o te ꞌAtua e kī rō ꞌā, te mate i oꞌo ai ki ruŋa i te ꞌAo o te hara o Adán. Hai īa i peꞌe mai ai te hara, ōira tātou e mate nei o te ai he haka ꞌara tātou ꞌoꞌona.—E taiꞌo Romanos 5:12; 6:23.
Ōira te ꞌui nei, ¿Ko ai te taŋata mo riva mo auhau te ora iŋa o te taꞌatoꞌa? E mate nei tātou e peꞌe iho ena te tātou hara, ōira e ko riva e tahi taŋata mo auhau te tātou ora iŋa.—E taiꞌo Salmo 49:7-9.
4. ¿O te aha a Ietū i mate ai?
A Ietū he taŋata hara kore, taꞌe pe tātou, e ꞌina a īa kai hara ki te hora hopeꞌa. Ōira i mate era a īa, taꞌe mo auhau toꞌona hara, a īa i mate ai, mo auhau i te hara o te taꞌatoꞌa. I uŋa era te ꞌAtua i taꞌana poki mo mate mo haka kore i te tātou hara, ko haka tikeꞌa mai ꞌā te rahi o toꞌona here ki te taŋata o te ꞌAo. Peira ꞌā a Ietū i haka ꞌite mai ai i toꞌona here, hai haka roŋo ki toꞌona Matuꞌa, e hai vaꞌai toꞌona hakari hara kore, mo haka kore te hara e te mate mai i a tātou.—E taiꞌo Juan 3:16; Romanos 5:18, 19.
Ka mataꞌitaꞌi te video ¿O te aha a Ietū i mate ai?
5. ¿E aha ꞌā a Ietū i aŋanirā?
Rahi nō te aŋa a Ietū i aŋa ai hora noho era i ruŋa i te henua, ko haka kore ꞌā i te maiūi o te taŋata, ko haka ora haka ꞌou ꞌā i te nuꞌu mate, e ko haꞌūꞌū ꞌā i te taŋata mamāe era i te rahi o te ꞌati. Hai rā aŋa, i haka tikeꞌa mai ai pe hē a īa ka aŋa ena pe muꞌa, ki te taŋata here e aŋa i te meꞌe haŋa o te ꞌAtua (Mateo 15:30, 31; Juan 5:28). I mate era Ietū he haka ora e Iehoha mo iri mo noho haka ꞌou i ruŋa i te raŋi pahe kuhane e tahi (1 Pedro 3:18). Ki ꞌoti i tiaki ai a te paeŋa mataꞌu o toꞌona Matuꞌa mo ariki i ruŋa i te ꞌAo (Hebreos 10:12, 13). I aŋanirā nā a Ietū e ariki mai ena i ruŋa i te raŋi, e nā taꞌana pukuraŋa e haka ꞌite mai ena te parau ꞌāpī riva-riva nei i te ꞌAo taꞌatoꞌa.—E taiꞌo Daniel 7:13, 14; Mateo 24:14.
Nā ko hahine ꞌā te hora o Ietū, te ariki mana, mo haka kore i te mamāe e i te taŋata rake-rake. Te nuꞌu moꞌa e haka roŋo ki a Ietū pahe ariki o te haꞌatere o te ꞌAtua, mo rāua e noho i ruŋa i te henua ka haꞌariro ena pahe henua nehe-nehe.—E taiꞌo Salmo 37:9-11.
