KAU 2
¿Ko ai te ꞌAtua?
1. ¿O te aha tātou ana haꞌatura ki te ꞌAtua?
O te ai ꞌaꞌana i aŋa te meꞌe taꞌatoꞌa peira ꞌā i a tātou. Ōira ki a Īa nō tātou ana haka roŋo e haꞌatura. Mai muꞌa ꞌā te ꞌAtua i noho ai i ruŋa i te raŋi, ꞌina ꞌoꞌona mahana poreko e ꞌina a Īa e ko mate (Salmo 90:2). E ꞌaꞌana te parau ꞌāpī riva-riva papaꞌi ena i ruŋa i taꞌana Puka (1 Timoteo 1:11).—E taiꞌo Revelación 4:11.
2. ¿Pe hē te huru o te ꞌAtua?
Ata nui-nui te huru o te ꞌAtua ki te huru o te taŋata o te ai a Īa he kuhane e tahi, ōira e ko riva e tahi taŋata mo tikeꞌa i a Īa (Juan 1:18; 4:24). No atu te taꞌe tikeꞌa i a Īa, e riva nō tātou mo aŋi-aŋi toꞌona huru hai mataꞌitaꞌi a ruŋa i taꞌana meꞌe aŋa taꞌatoꞌa era. Mo haꞌauraꞌa atu, ka uꞌi te huru kē huru kē tiare e te rauhuru tumu kai, rā meꞌe he haka aŋi-aŋi mai i toꞌona maramarama e toꞌona here ki a tātou. Takoꞌa te nui-nui o te ꞌAo taꞌatoꞌa he haka ꞌite mai i toꞌona mana pūai.—E taiꞌo Romanos 1:20.
Te rua raveꞌa mo aŋi-aŋi tātou pe hē te huru o te ꞌAtua, hai taiꞌo i taꞌana Puka. Hai Puka nei he haka aŋi-aŋi hē taꞌana meꞌe haŋa e hē taꞌana meꞌe taꞌe haŋa. Takoꞌa, he aŋi-aŋi tātou pe hē te ꞌAtua e aŋa ena ki te taŋata, e pe hē toꞌona manaꞌu o te tātou haka tere riva-riva e o te tātou haka tere rake-rake.—E taiꞌo Salmo 103:7-10.
3. ¿E ai rō ꞌā te ꞌīŋoa o te ꞌAtua?
Kī ꞌā e Ietū: “E te Matuꞌa o mātou o te raŋi ē, ka moꞌa te taŋata taꞌatoꞌa i tū ꞌīŋoa” (Mateo 6:9). Te taŋata e raŋi ena ki te ꞌAtua hai rauhuru ꞌīŋoa, te parautīꞌa e tahi nō ꞌoꞌona ꞌīŋoa mau. Te ꞌīŋoa nei e kī rō ꞌā i te rauhuru tumu ꞌarero, ko Iehoha i te ꞌarero rapanui.—E taiꞌo Salmo 83:18.
Ko toꞌo ꞌā te ꞌīŋoa o Iehoha mai ruŋa i te rahi o te Puka o te ꞌAtua e ko mono ꞌā ki te rauhuru ꞌīŋoa pahe ꞌAtua o Matuꞌa. I papaꞌi era te Puka o te ꞌAtua i muꞌa ꞌā i papaꞌi rō te ꞌīŋoa ko Iehoha a ruŋa ki te hitu tautini. Takoꞌa i haka aŋi-aŋi rō e Ietū te ꞌīŋoa o Iehoha e hāpī era ki te taŋata o ruŋa i a Īa. —E taiꞌo Juan 17:26.
Ka mataꞌitaꞌi te video ¿E ai rō ꞌā te ꞌīŋoa o te ꞌAtua?
4. ¿Tapa rō mai ꞌā e te ꞌAtua?
Pahe huru here o te matuꞌa tane nei ki taꞌana poki, peira ꞌā te ꞌAtua e tapa rō mai ꞌā i te hora nei e pe muꞌa ka oho ena
Mo ai, e here rō mai ꞌā Iehoha ki a tātou, ¿O te aha e haꞌatiꞌa ena mo piri mai te taŋi-taŋi e i te mamāe? Kē nuꞌu e manaꞌu ena e hāꞌito ꞌā e te ꞌAtua mo aŋi-aŋi ana ꞌai e here rō ꞌā tātou ki a Īa. Manaꞌu nei taꞌe he parautīꞌa.—E taiꞌo Santiago 1:13.
Ko haꞌatiꞌa mai ꞌā e Iehoha mo uꞌi a ara hē tātou ana haka tere. Ōira e mauru-uru ki a Īa o te haꞌatiꞌa mai mo uꞌi ki ꞌa ꞌai tātou ana haka roŋo. Te meꞌe hopeꞌa o te riva-riva mo tātou e haka tere a te ara era mo aŋa tātou ki a Īa (Josué 24:15). Te ꞌati, rahi nō te taŋata e haka tere ena i te rāua ara mo aŋa i te meꞌe rake-rake, ōira e rahi ena te ꞌati i ruŋa i te ꞌAo, nei ŋā meꞌe e haka mamāe rō ꞌā i a Iehoha.—E taiꞌo Génesis 6:5, 6.
I te rahi o te here o Iehoha e i toꞌona haŋa mo koa mo oho tātou, nā he haka kore tahi te mamāe e i te ꞌino. I te hora nei ko te piri iŋa mai ꞌā te meꞌe rake-rake. E ai rō ꞌā te haꞌauraꞌa o te aha te ꞌAtua e haꞌatiꞌa ena i rā meꞌe. I te kau vaꞌu he pahono atu te ꞌui nei.—E taiꞌo 2 Pedro 2:9; 3:7, 13.
5. ¿Pe hē tātou ana hahine ki te ꞌAtua?
A Iehoha e tapa rō ꞌā i a tātou, ōira ko vaꞌai mai ꞌā te raveꞌa mo hahine ki a Īa: e vānaŋa tātou ki a Īa a roto i te vaha era o te pure (Salmo 65:2; 145:18). Takoꞌa, ko haŋa ꞌā mo haka kore te tātou hara, o te ai e tikeꞌa rō ꞌā pe hē tātou e haka uhu ena mo aŋa i taꞌana meꞌe haŋa. No atu te taꞌe rovaꞌa rā meꞌe paurō te mahana, e riva nō tātou mo riro he ŋaruhoa ꞌoꞌona.—E taiꞌo Salmo 103:12-14; Santiago 4:8.
E here tātou hai mahatu ki a Iehoha raꞌe ki te tahi, o te ai ꞌaꞌana tātou i aŋa (Marcos 12:30). Mo haka tikeꞌa i te tātou here ki te ꞌAtua, e hāpī o ruŋa i a Īa ꞌe e haka roŋo i taꞌana roŋo. Peira he ata hahine tātou ki a Īa, e a Īa ki a tātou.—E taiꞌo 1 Timoteo 2:4; 1 Juan 5:3.
