KAU 14
¿O te aha te ꞌAtua e haka taka-taka ena i taꞌana nuꞌu mo aŋa i taꞌana meꞌe haŋa?
1. ¿O te aha Iehoha i haka taka-taka ai i a Israel mo riro he nunaꞌa ꞌaꞌana?
A Iehoha, i haka taka-taka ai i te haka ꞌara o Abrahán, mo piri mo tuꞌu he nunaꞌa ꞌaꞌana, e he vaꞌai i te rauhuru roŋo. Te nunaꞌa nei te ꞌīŋoa ko Israel. A rāua i topa kē rō mai te tahi kaīŋa, o te haka roŋo ki te taꞌatoꞌa roŋo vaꞌai e te ꞌAtua, e ko rāua nō i haꞌatura ai ki a Iehoha, a te huru parautīꞌa haꞌatiꞌa era e Īa (Salmo 147:19, 20). O te haka tere rāua a te huru nei, e riva ena te taŋata o te ꞌAo taꞌatoꞌa mo rovaꞌa i te hauhaꞌa riva.—E taiꞌo Génesis 22:18.
Te ꞌAtua i haka taka-taka ai te Israelita, mo riro rāua he taŋata mataꞌite o taꞌana meꞌe aŋa taꞌatoꞌa. A roto i te vaha era o te Israelita, e rovaꞌa era te tahi, i te raveꞌa mo aŋi-aŋi riva-riva ko ai te ꞌAtua mau. E haka roŋo era te Israelita i te roŋo o te ꞌAtua, he rovaꞌa rāua i te hauhaꞌa riva, peira ꞌā, mo haka roŋo tātou i te roŋo o te ꞌAtua, he rovaꞌa takoꞌa i te hauhaꞌa riva (Deuteronomio 4:6).—E taiꞌo Isaías 43:10, 12.
2. ¿O te aha e taka-taka ena te pukuraŋa parautīꞌa mo aŋa te meꞌe haŋa o Iehoha?
I tano era te mahana, i te taꞌe haka roŋo o Israel ki te ꞌAtua he haꞌataꞌa a Īa mai muri i a rāua, ōira a Iehoha i mono ai te Israelita hai pukuraŋa o Ietū o muꞌa ꞌā, pahe nunaꞌa ꞌaꞌana (Mateo 21:43; 23:37, 38). I aŋanirā, o te pukuraŋa parautīꞌa te aŋa i te meꞌe haŋa o te ꞌAtua pahe Taŋata Haka ꞌIte ꞌoꞌona, e taꞌe o te Israelita.—E taiꞌo Hechos 15:14, 17.
A Ietū ko uŋa ꞌā i taꞌana pukuraŋa, mo tatāra mo hāpī ki te taŋata o te ꞌAo taꞌatoꞌa, mo tuꞌu mo riro he pukuraŋa o Ietū (Mateo 10:7, 11; 24:14; 28:19, 20). I aŋanirā, i te ŋā mahana hopeꞌa o te ꞌAo nei, te aŋa uŋa era e Ietū mo tatāra, ko haꞌamata ko tuꞌu ꞌā ki toꞌona roa, i te ꞌAo taꞌatoꞌa. Ko rahi ꞌā te taŋata o te ꞌAo taꞌatoꞌa e haka taka-taka mai ena e Iehoha mo riro he pukuraŋa parautīꞌa ꞌaꞌana, e ꞌina e tahi taꞌu o muꞌa ꞌā, hahine ki te aŋa o te hora nei (Revelación 7:9, 10). E taka-taka ena te pukuraŋa parautīꞌa, he riva mo haꞌūꞌū e mo haka haŋu i a rāua ꞌā. Takoꞌa a roto i te rāua koro paina piri, e hāpī ena i te ꞌAo taꞌatoꞌa ko tū hāpī ꞌā o ruŋa i te Puka o te ꞌAtua.—E taiꞌo Hebreos 10:24, 25.
3. ¿Pe hē te Taŋata Haka ꞌIte o Ruŋa o Iehoha o aŋanirā i haꞌamata ai?
I te matahiti 1870 te nunaꞌa iti-iti hāpī te Puka o te ꞌAtua, he haꞌamata he tikeꞌa e he aŋi-aŋi te parautīꞌa mau o ruŋa i te ꞌAtua i naꞌa i oho mai ai, mai muꞌa ꞌā. He aŋi-aŋi takoꞌa rāua pe nei ē, i haka taka-taka rō e Ietū i taꞌana pukuraŋa mo tatāra. Peira takoꞌa, a rāua i haꞌamata ai te aŋa nui–nui e tahi i te ꞌAo taꞌatoꞌa, mo haka aŋi-aŋi i te roŋo o te Haꞌatere o te ꞌAtua. I te matahiti 1931 i nape ai i a rāua he Taŋata Haka ꞌIte o Ruŋa o Iehoha.—E taiꞌo Hechos 1:8; 2:1, 4; 5:42.
4. ¿Pe hē te huru haka tere o te Taŋata Haka ꞌIte o Ruŋa o Iehoha?
I muꞌa ꞌā i te hora era o Ietū, i taka-taka rō taꞌana pukuraŋa i te rauhuru henua, ꞌe e ai rō ꞌā i te nunaꞌa taŋata maꞌa mo haka tere i a rāua, pahe pūꞌoko haka tere nui-nui. Te nunaꞌa nei, e moꞌa rō ꞌā i a Ietū pahe pūꞌoko ariki o rāua (Hechos 16:4, 5). I aŋanirā i te ꞌAo taꞌatoꞌa, te Taŋata Haka ꞌIte o Ruŋa o Iehoha e ai rō ꞌā te rāua kona e huri era i te rauhuru puka iti-iti vānaŋa o ruŋa i te ꞌAtua, a ruŋa ki te 600 tumu ꞌarero. I rā ŋā kona takoꞌa, e tapura ena ꞌe e tuhaꞌa ena te ŋā puka nei. Te Taŋata Haka ꞌIte o Ruŋa o Iehoha i aŋanirā, pahe hora era o Ietū, e ai rō ꞌā te rāua pūꞌoko haka tere nui-nui mo haka titīka i te ŋā aŋa nei. Te Taŋata Haka ꞌIte o Ruŋa o Iehoha o te ꞌAo taꞌatoꞌa, e taka-taka rō ꞌā a ruŋa ki te 100.000 nunaꞌa taŋata, e hai Puka o te ꞌAtua te pūꞌoko haka tere nei, e haka haŋu ꞌe e haka tere ena i a rāua. Peira ꞌā, e ai rō ꞌā te taŋata maꞌa hapaꞌo hai here te ŋā nunaꞌa nei, pahe nuku-nuku māmoe o Iehoha.—E taiꞌo 1 Pedro 5:2, 3.
Pahe pukuraŋa o muꞌa ꞌā, te Taŋata Haka ꞌIte o Ruŋa o Iehoha ko taka-taka ꞌā, mo tatāra te parau ꞌāpī riva-riva o te Puka o te ꞌAtua i te taꞌatoꞌa hare, mo hāpī i te taŋata mo riro rāua he pukuraŋa o Ietū (Hechos 20:20). Peira ꞌā, e hāpī rō ꞌā te Puka o te ꞌAtua ki te taŋata haŋa mo ꞌite te parautīꞌa. Te Taŋata Haka ꞌIte o Ruŋa o Iehoha, taꞌe he nunaꞌa taka-taka mo aŋa nō te aŋa o te ꞌAtua, ko riro ꞌā ananake he huaꞌai nui-nui e tahi here ki a rāua pahe taina ꞌā. Pahe matuꞌa here ki taꞌana ŋā poki, te ꞌAtua e hapaꞌo ena i a rāua (2 Tesalonicenses 1:3). O te ai a rāua e haꞌūꞌū rō ꞌā ki te tahi, ꞌe e haka uhu rō ꞌā mo aŋa te meꞌe haŋa o Iehoha, ko riro ꞌā ko rāua te huaꞌai hopeꞌa o te koa o te ꞌAo taꞌatoꞌa.—E taiꞌo Salmo 33:12; Hechos 20:35.
