KAU 9
¿Pe hē te huaꞌai ana rovaꞌa te koa mau?
1. ¿O te aha te taŋata ana haꞌipoꞌipo?
A Iehoha te ꞌAtua koa, ko vaꞌai mai ꞌā i te ŋā parau ꞌāpī riva-riva nei, e ko haŋa ꞌā mo koa mau te huaꞌai (1 Timoteo 1:11). ꞌAꞌana te haꞌipoꞌipo i aŋa. Te haꞌipoꞌipo e vaꞌai rō ꞌā i te huru tano, titīka, mo hapaꞌo te ŋā poki e mo rovaꞌa i te koa mau i roto i te huaꞌai. Te nuꞌu here ki te ꞌAtua e haꞌipoꞌipo a te huru haꞌatere taŋata o toꞌona kona noho.—E taiꞌo Lucas 2:1, 4, 5
¿He aha te meꞌe manaꞌu o te ꞌAtua o ruŋa i te haꞌipoꞌipo? Te haꞌipoꞌipo mo te ꞌAtua, he piri te taŋata ki te viꞌe e ꞌina ko haꞌataꞌa. A Iehoha ko haŋa ꞌā mo noho te taŋata ki te viꞌe nō e tahi e pe tū huru ꞌā te viꞌe (Hebreos 13:4). He enemī mau ꞌoꞌona te haꞌataꞌa (Malaquías 2:16). No atu rā meꞌe e haꞌatiꞌa rō ꞌā te haꞌataꞌa mo ai e tahi o roto i te haꞌipoꞌipo ko taiꞌata ꞌā, ko te meꞌe nō nei te meꞌe haꞌatiꞌa e te ꞌAtua mo haꞌataꞌa.—E taiꞌo Mateo 19:3-6, 9.
2. ¿Pe hē te kenu e te viꞌe ana haka tere i roto i te rāua haꞌipoꞌipo?
A Iehoha i aŋa ai i te taŋata e i te viꞌe, mo here, mo hokorua e mo haꞌūꞌū te aŋa i roto i te rāua haꞌipoꞌipo (Génesis 2:18). Te kenu, he pūꞌoko o toꞌona hare e maꞌana e maꞌu i te rauhuru meꞌe mo toꞌona hare, pahe kai, kahu e te tahi meꞌe, e takoꞌa mo hāpī o ruŋa i te ꞌAtua ki toꞌona huaꞌai. Peira ꞌā te kenu e tapa i taꞌana viꞌe ꞌe e haka tikeꞌa toꞌona here ki a īa. Te kenu e te viꞌe e moꞌa e here i roto i a rāua ꞌā. I te ai e hara rō ꞌā te kenu e te viꞌe, e hāpī pe hē ana aŋa mo taꞌe maꞌu te riri, mo rovaꞌa peira i te koa mau.—E taiꞌo Efesios 4:31, 32; 5:22-25, 33; 1 Pedro 3:7.
3. Mo ai ꞌina he koa i roto i te haꞌipoꞌipo ¿e riva nō mo haꞌataꞌa?
Mo ai e ai rō ꞌā te ꞌati i roto i te haꞌipoꞌipo, e kimi te raveꞌa mo haka titīka te ꞌati hai here (1 Corintios 13:4, 5). Te vānaŋa o te Puka o te ꞌAtua e kī rō ꞌā, te haꞌataꞌa taꞌe he ara mo haka titīka te ꞌati o te nuꞌu haꞌipoꞌipo.—E taiꞌo 1 Corintios 7:10-13.
4. ¿He aha te meꞌe haŋa o te ꞌAtua mo te ŋā poki?
Ko haŋa ꞌā Iehoha mo koa o te ŋā poki. Ōira e hāpī ena i te huru hopeꞌa o te riva mo koa i roto i te rāua taŋa. Takoꞌa, mo hāpī i te maramarama e huru haka tere o te matuꞌa (Colosenses 3:20). Peira ꞌā, ko haŋa ꞌā Iehoha mo ŋaroꞌa te ŋā poki i te koa mo aŋa ki a Īa e ki taꞌana poki ko Ietū.—E taiꞌo Eclesiastés 11:9–12:1; Mateo 19:13-15; 21:15, 16.
5. ¿He aha te meꞌe o te matuꞌa mo aŋa mo rovaꞌa rāua ŋā poki i te koa mau?
Te matuꞌa e kimi i te raveꞌa tano mo vaꞌai i te kai, i te kahu e i te hare mo noho te rāua ŋā poki (1 Timoteo 5:8). Taꞌe ko te ŋā meꞌe nō nei te meꞌe mo aŋa. Takoꞌa e hāpī mo here e mo haka tere a te huru era o Iehoha (Efesios 6:4). Mo ai te matuꞌa e haka tikeꞌa rō ꞌā i te rāua here ki te ꞌAtua, he maꞌa e he maꞌu rō ai e te rāua ŋā poki nei here i roto i te rāua mahatu. Mo hāpī te ŋā poki hai Puka o te ꞌAtua, he riva mo haka tere titīka te rāua manaꞌu.—E taiꞌo Deuteronomio 6:4-7; Proverbios 22:6.
Te ŋā poki e haŋa takoꞌa rō ꞌā mo haka koa i a rāua, ōira te matuꞌa e koa e haꞌi i te rāua ŋā poki hora aŋa era i te meꞌe riva-riva. Takoꞌa, hora era mo aŋa i te meꞌe rake-rake e riva nō mo ture mo haka titīka te rāua haka tere iŋa. Hora era e ture ꞌā te matuꞌa ki taꞌana poki ꞌina ko puꞌa, ko vānaŋa hai riri. Mo aŋa pe nei te matuꞌa i te rāua ŋā poki he koa nō te meꞌe ka piri ena (Proverbios 22:15).—E taiꞌo Colosenses 3:21.
Te Taŋata Haka ꞌIte o Ruŋa o Iehoha ko papaꞌi ꞌā rauhuru puka mo te matuꞌa ko īa ko taꞌana ŋā poki. Taꞌatoꞌa nei ŋā puka hai Puka o te ꞌAtua i aŋa ai.—E taiꞌo Salmo 19:7, 11.