I tano era te toru mahana o te mate o Ietū, he vari te ŋā viꞌe e toru, ki te kona era ꞌi ira i haka rē ai tōꞌona hakari, ꞌe he takeꞌa ꞌina o roto ꞌo te ai ko haka ora haka ꞌou ꞌā e Iehoha.

ꞌI ahi-ahi era he haka takeꞌa Ietū i a ia ki tāꞌana pukuraŋa.

A Iehoha i haka ora haka ꞌou i a Ietū, hai hakari vārua, pa he merahi ꞌā. I takeꞌa rō e tāꞌana pukuraŋa, hora iri era ki ruŋa i te raŋi. ꞌI te hora nei a ia he vārua pūai e tahi, e ko mate haka ꞌou.

Ko vaꞌai ꞌā Ietū i tōꞌona hakari, mo haka kore te hara ꞌe te mate mai te ao taꞌatoꞌa (Māteo 20:28). Hai mate ōꞌona e riva ena te ꞌAtua mo vaꞌai mai te ora ki te hopeꞌa raꞌa.

Ko haka ꞌariki ꞌā Iehoha i a Ietū mo ꞌariki i te henua mai ruŋa i te raŋi. E ko ꞌariki hoko tahi nō. E ai rō ꞌā 144.000 taŋata haka roŋo ꞌe haꞌatura ki te ꞌAtua, i vae mai ruŋa i te henua mo iri mo noho mo ꞌariki ꞌi muri i a ia, ka haka ora haka ꞌou mai ena mai te rāua mate. Meꞌe taꞌatoꞌa nei, he Haka Tere o te ꞌAtua (Meꞌe Haka Takeꞌa 14:1-3).

Nā Haka Tere he haꞌariro te henua pa he henua nehe-nehe e tahi. He haka kore te tamaꞌi, te toke, tiŋaꞌi taŋata, te maruaki. ꞌIna e tahi meꞌe mo kore. He koa nō te meꞌe ka piri era ki te taŋata ꞌi rā hora (Salmo 145:16).