HĀPĪ 01
¿ꞌO te aha koe ana hāpī i te Pipiria?
Rahi nō te taŋata e haka topa era i te manaꞌu o ruŋa i te ŋā ꞌui nei: ¿ꞌO te aha te taŋata e mate ena? ¿ꞌO te aha e piri mai era te ꞌati? ¿He aha te meꞌe ka piri mai ena pe muꞌa ka oho ena? ꞌE tētahi atu meꞌe. Takoꞌa, e ai rō ꞌā tētahi meꞌe e haka tipa-tipa ena i a tātou, pa he meꞌe era pē hē ana peꞌe te tārahu ꞌo pē hē ana koa te huaꞌai. E ai rō ꞌā te taŋata hora e taiꞌo era i te Pipiria, he aŋi-aŋi rō ꞌai i te rāua meꞌe haŋa era mo ꞌite. Takoꞌa, ko ravaꞌa ꞌā ꞌi ruŋa, te mārama-rama mo ꞌite pē hē ana haka tere riva-riva i te rāua ara. Ki tuꞌu manaꞌu, ¿e riva rō te Pipiria mo hāꞌūꞌū atu i a koe takoꞌa?
1. ¿He aha te meꞌe e ravaꞌa ena e tātou ꞌi ruŋa i te Pipiria?
ꞌI ruŋa i te Pipiria e ravaꞌa ena tātou i te pāhono ki te ŋā ꞌui nei: ¿ꞌA ꞌai i aŋa te meꞌe taꞌatoꞌa? ¿Mo te aha i aŋa ai i te taŋata? ¿ꞌO te aha e piri era te mamae ꞌe te taŋi-taŋi ki te taŋata? ¿He aha te meꞌe e piri era e mate era te taŋata? ¿E kore rō te ꞌati ꞌe i te meꞌe rake-rake e tahi mahana? ¿He aha te meꞌe ka piri era ki te ao pe muꞌa ka oho ena? Mo haŋa koe mo ꞌite i te parautiꞌa o ruŋa i te ŋā meꞌe nei, ka kimi koe i te pāhono ꞌi ruŋa i te Pipiria. O te Pipiria mau ꞌā e kī ena mo aŋa tātou pē ira ꞌe rahi nō te taŋata i koa ai ꞌi te hora ravaꞌa era i te pāhono.
2. ¿Pē hē e hāꞌūꞌū atu ena e te Pipiria paurō te mahana?
ꞌI ruŋa i te Pipiria he ravaꞌa koe i te roŋo mo hāꞌūꞌū atu i te meꞌe taꞌatoꞌa. Mo haꞌaauraꞌa atu, ꞌi ruŋa he kī atu, pē hē ana koa mau tuꞌu huaꞌai. Takoꞌa, he kī atu pē hē koe ana koa ꞌi te hora e aŋa era koe ꞌe he aha te meꞌe mo aŋa mo ai ko tipa-tipa ꞌā koe. Ka hāpī ena koe i te Pipiria he hāpī koe o ruŋa i te ŋā meꞌe nei ꞌe takoꞌa o ruŋa i te rauhuru atu meꞌe. ꞌI rā hora he aŋi-aŋi koe he aŋi mau ꞌā tū meꞌe kī era ꞌi ruŋa i te Pipiria pē nei ē, taꞌatoꞌa roŋo pāpaꞌi ꞌi ruŋa he “hauhaꞌa” e tahi (2 Timoteo 3:16).
Te puka nei taꞌe he Pipiria. ꞌO ira ka hāpī ka oho ena koe i te puka nei, ka kimi e koe mau ꞌā i te kupu vānaŋa ꞌi ruŋa i taꞌa Pipiria, mo uꞌi ana ai ko tano ꞌā ki te meꞌe e hāpī ena e koe mai ruŋa nei.
MO MAꞌA TUꞌU ꞌITE
Ki uꞌi tātou pē hē te Pipiria e hāꞌūꞌū ena i te taŋata, ꞌo te aha ana ꞌui ki te rua mo hāꞌūꞌū atu mo aŋi-aŋi riva-riva i te meꞌe pāpaꞌi era ꞌi ruŋa ꞌe pē hē ana taiꞌo i te Pipiria mo taꞌe haꞌumani ōꞌou.
3. Te Pipiria e haka takeꞌa rō mai ꞌā te ara tano mo haꞌere o tātou
Pa he mōrī e haka māꞌeha ena i te tātou ara te puka era he Pipiria. Te meꞌe pāpaꞌi era ꞌi ruŋa he haka aŋi-aŋi mai he aha te meꞌe tano ꞌe he aha te meꞌe taꞌe tano mo aŋa o tātou ꞌe takoꞌa he aha te meꞌe ka piri mai ena pe muꞌa ka oho ena.
Ka taiꞌo Salmo 119:105 ꞌe ꞌai ka vānaŋa rō kōrua o ruŋa i te ŋā meꞌe nei:
-
¿He aha te meꞌe e manaꞌu era e te taŋata pāpaꞌi era i te salmo nei o ruŋa i te Pipiria?
-
¿He aha te meꞌe e manaꞌu ena e koe o ruŋa i te Pipiria?
4. Te Pipiria e pāhono rō ꞌā taꞌa meꞌe haŋa mo ꞌite
Ka mataꞌitaꞌi koe i te vīdeo o ruŋa i te viꞌe e tahi i ravaꞌa ꞌi ruŋa i te Pipiria te pāhono ki te meꞌe e haka tipa-tipa era i a ia. Ka mataꞌitaꞌi te VĪDEO, ꞌe ꞌai ka vānaŋa rō kōrua o ruŋa i te ŋā meꞌe nei:
-
¿He aha te meꞌe i haka kuꞌi-kuꞌi i a ia?
-
¿Pē hē te Pipiria i hāꞌūꞌū ai i a ia?
Te Pipiria e kī rō mai ꞌā ꞌina tātou ko haka rē te kimi te oho i te pāhono ki te tātou ꞌui. Ka taiꞌo Māteo 7:7 ꞌe ꞌai ka vānaŋa rō kōrua o ruŋa i te meꞌe nei:
-
¿He aha taꞌa meꞌe haŋa ꞌāꞌau mo ꞌite mo pāhono atu e te Pipiria?
5. ¿Pē hē ana hāpī i te Pipiria mo taꞌe haꞌumani ōꞌou?
ꞌI te hora e taiꞌo ena i te Pipiria, nuꞌu rahi te nuꞌu e ŋaroꞌa era i te ora ꞌi roto i te rāua māhatu, ꞌe takoꞌa meꞌe rahi nō te meꞌe riva-riva e ravaꞌa ena ꞌi ruŋa. Ka mataꞌitaꞌi te VĪDEO ꞌe ꞌai ka vānaŋa rō o ruŋa i te ŋā meꞌe nei:
-
¿He aha te meꞌe e manaꞌu era e te taŋa ꞌāpī o ruŋa i te taiꞌo i te rauhuru puka?
-
Nō atu he meꞌe taꞌe haŋa o rāua mo taiꞌo, ¿ꞌo te aha e haŋa ena ꞌi te hora nei mo taiꞌo i te Pipiria?
Te Pipiria e haka haŋu rō mai ꞌā ꞌi te hora e piri mai ena i te ꞌati ꞌe takoꞌa he vaꞌai mai i te rāveꞌa riva mo tiaki o tātou. Ka taiꞌo Rōmano 15:4 ꞌe ꞌai ka vānaŋa rō kōrua o ruŋa i te meꞌe nei:
-
¿Haŋa rō koe mo ꞌite o ruŋa i te rāveꞌa kī mai era e te ꞌAtua ka piri mai ena pe muꞌa ka oho ena?
6. E ai rō ꞌā te taŋata mo hāꞌūꞌū atu mo aŋi-aŋi ōꞌou i te Pipiria
E riva nō koe mo taiꞌo i te Pipiria hoko tahi nō, nō atu rā meꞌe ꞌata hau te riva mo hāꞌūꞌū atu e te rua, mo aŋi-aŋi riva-riva ōꞌou i te haꞌaauraꞌa o te meꞌe pāpaꞌi era ꞌi ruŋa. Ka taiꞌo Aŋa ote ꞌĀpōtoro 8:26-31 ꞌe ꞌai ka vānaŋa rō kōrua o ruŋa i te meꞌe nei:
-
¿Pē hē ka aŋi-aŋi era koe i te meꞌe e taiꞌo ena ꞌi ruŋa i te Pipiria? (Ka uꞌi i te kupu vānaŋa 30 ꞌe 31).
I hāꞌūꞌū era e te rua taŋata ki tū taŋata etiopia era i riva iho ai mo aŋi-aŋi riva-riva i te Pipiria. Rahi nō te taŋata e kī ena he peti e tahi mo hāꞌūꞌū e te rua ki a rāua mo aŋi-aŋi i te Pipiria.
HE AHA TAꞌA MEꞌE MO PĀHONO MO ꞌUI ATU E TE NUꞌU: “¿Mo te aha koe e hāpī ena i te Pipiria?”
-
¿He aha te meꞌe ka kī era e koe? ¿ꞌO te aha?
TE MEꞌE MO AŊI-AŊI O RUŊA I TE HĀPĪ NEI
ꞌI ruŋa i te Pipiria he ravaꞌa e koe i te rauhuru atu roŋo mo riva-riva tuꞌu haka tere iŋa, he pāhono atu i taꞌa meꞌe haŋa era ꞌāꞌau mo ꞌite. Takoꞌa he haka haŋu atu ꞌe he vaꞌai atu i te rāveꞌa riva mo tiaki ōꞌou pe muꞌa ka oho ena.
Mo taꞌe rehu
-
¿Ko roŋo hē te roŋo e ravaꞌa ena tātou ꞌi ruŋa i te Pipiria?
-
¿Ko ꞌui hē te ꞌui e pāhono ena e te Pipiria?
-
O ruŋa i te rauhuru atu meꞌe e hāpī ena e te Pipiria, ¿he aha taꞌa meꞌe i haŋa mo ꞌite?
MO RARA MO OHO
Ka uꞌi pē hē te roŋo o te Pipiria e hāꞌūꞌū mai ena ꞌi ꞌaŋanīrā.
“La eterna sabiduría de la Biblia” (La Atalaya, núm. 1 2018)
Ka uꞌi pē hē te Pipiria i hāꞌūꞌū ai ki te taŋata e tahi e manaꞌu era mai tōꞌona ꞌiti-ꞌiti haŋa ꞌā ꞌina ōꞌona vāroro.
Ka uꞌi te roŋo mo te huaꞌai pāpaꞌi era ꞌi ruŋa i te Pipiria.
“12 claves para una familia feliz” (¡Despertad!, núm. 2 2018)
Ka uꞌi pē hē te Pipiria e hāpī ena ꞌa ꞌai mau te haka tere i te ao nei.
¿ꞌO te aha ana hāpī te Puka o te ꞌAtua? (te vīdeo roa-roa era) (3:14)
