HĀPĪ 09
Hai pure he hāhine koe ki te ꞌAtua
¿Ko tuꞌu ꞌā koe ki te roa ena mo manaꞌu e ai e tahi kope mo hāꞌūꞌū atu mo haka tere riva-riva ōꞌou? ¿E ai rō ꞌā taꞌa meꞌe haŋa ꞌāꞌau mo aŋi-aŋi o ruŋa i te meꞌe e haka kuꞌi-kuꞌi ena i a koe? Mo ꞌati ōꞌou mo māui-ui tuꞌu māhatu, ¿haŋa rō koe mo ai e tahi kope mo haka haŋu atu ꞌe mo haka haumārū i tuꞌu māhatu? ¿Haŋa rō koe mo ꞌata hāhine ki a Iehoha? Mo te pure e hāꞌūꞌū atu mo ravaꞌa tahi i te ŋā meꞌe nei. ꞌO ira, ¿pē hē mau ana pure? ¿E haka roŋo rō ꞌā te ꞌAtua i te pure taꞌatoꞌa? ¿Pē hē koe ana ꞌite e haka roŋo rō ꞌā te ꞌAtua i taꞌa pure? Mai ki vānaŋa o ruŋa.
1. ¿Ki a ai tātou ana pure? ¿O ruŋa ꞌo te aha tātou ana pure?
Ki te tātou Matuꞌa o ruŋa i te raŋi nō tātou ana pure i hāpī mai ai e Ietū ꞌe ki a Iehoha nō a ia e pure era. ꞌO ira i hāpī rō ki tāꞌana pukuraŋa pē hē ana pure hora kī era: “Pē nei ana pure: ‘E te Matuꞌa o mātou o te raŋi ē . . .’” (Māteo 6:9). E pure ena tātou ki a Iehoha he ꞌata hāhine tātou ki a ia pa he repahoa.
E pure ena ki te ꞌAtua e riva nō mo pure o ruŋa i te meꞌe haŋa taꞌatoꞌa era o tātou mo vānaŋa. Nō atu rā meꞌe, mo haŋa mo pāhono mai e te ꞌAtua i te tātou pure, e ko riva tātou mo no-noꞌi hai meꞌe taꞌe haŋa ꞌāꞌana. Te Pipiria e kī rō ꞌā: “Te ꞌAtua e haka roŋo rō mai ꞌana i te meꞌe no-noꞌi e tātou ana tano rā meꞌe ki tōꞌona manaꞌu” (1 Iovani 5:14). I hāpī rō mai e Ietū he aha te tātou meꞌe mo no-noꞌi e pure ena tātou (ka taiꞌo Māteo 6:9-13). Taꞌe nō o ruŋa i te tātou meꞌe haŋa ana pure, ꞌina tātou ko rehu, e māuru-uru tātou ki te ꞌAtua o ruŋa i te ŋā meꞌe taꞌatoꞌa aŋa mai era ki a tātou. Pē ira ꞌā, e riva nō mo no-noꞌi ki a ia mo hāꞌūꞌū ki tētahi.
2. ¿Pē hē tātou ana pure?
Te Pipiria e kī rō mai ꞌā: “Ka haka ꞌite tahi te meꞌe e ŋaroꞌa ena ꞌi roto i te kōrua māhatu” (Salmo 62:8). Ka vānaŋa ena koe ki te ꞌAtua, o ruŋa i te meꞌe e ŋaroꞌa ena ꞌi roto i tuꞌu māhatu ana vānaŋa. E riva nō mo pure hai reꞌo pūai ꞌo hai manaꞌu nō. ꞌI te meꞌe era e vānaŋa ꞌā koe ki te ꞌAtua, e moꞌa koe ki a ia a te huru noho ōꞌou ꞌo a te huru māroa ōꞌou. Pē ira ꞌā, e riva nō koe mo pure ꞌi te taꞌatoꞌa nō kona ꞌe ꞌi te taꞌatoꞌa nō hora.
3. ¿Pē hē te ꞌAtua e pāhono ena i te tātou pure?
E ai rō ꞌā te rauhuru rāveꞌa o te ꞌAtua mo pāhono mai i te tātou pure. Hai tāꞌana vānaŋa ena he Pipiria e riva nō tātou mo ravaꞌa i te pāhono ki te tātou pure. Te taiꞌo i te vānaŋa o te ꞌAtua “he haka mārama-rama i te taŋata taꞌe ꞌite” (Salmo 19:7; ka taiꞌo Tanatiako 1:5). ꞌI te hora e tipa-tipa rahi era tātou ꞌo te ai ko ꞌati ꞌā, mā Iehoha e haka haumārū i te tātou manaꞌu. Pē ira takoꞌa ꞌā, e riva nō te ꞌAtua mo haka makenu i tāꞌana nūnaꞌa mo hāꞌūꞌū mai ꞌi te hora o te tātou ꞌati.
MO MAꞌA TUꞌU ꞌITE
Mai ki uꞌi pē hē tātou ana pure hai tātou ꞌinaŋa taꞌatoꞌa mo haka koa i te ꞌAtua ꞌe pē ira ꞌā, pē hē te pure e riva ena mo hāꞌūꞌū mai ki a tātou.
4. Mo haka roŋo mai e te ꞌAtua e ai rō ꞌā te huru tano mo pure ki a ia
¿Pē hē tātou ana pure mo haka roŋo mai e te ꞌAtua? Ka mataꞌitaꞌi te VĪDEO.
He meꞌe haŋa o te ꞌAtua mo pure ki a ia nō. Ka taiꞌo Salmo 65:2 ꞌe ꞌai ka vānaŋa rō kōrua o ruŋa i te meꞌe nei:
-
“Te kope haka roŋo i te pure” ki tuꞌu manaꞌu, ¿e haŋa rō ꞌā mo pure ōꞌou ki a ia? ¿ꞌO te aha koe e manaꞌu ena pē ira?
Mo haŋa o tātou mo haka roŋo e te ꞌAtua i te tātou pure, e haka tere a te roŋo hāpī mai era e ia. Ka taiꞌo Miqueas 3:4 ꞌe 1 Pētero 3:12, ꞌe ꞌai ka vānaŋa rō kōrua o ruŋa i te meꞌe nei:
-
¿Pē hē tātou ana ꞌite e haka roŋo rō mai ꞌā te ꞌAtua i te tātou pure?
Mo pure te nūnaꞌa tamaꞌi e rua mo rē o rāua i te tamaꞌi, ki tuꞌu manaꞌu, ¿ko tano ꞌā mo pāhono e te ꞌAtua i te rāua pure?
5. Mai roto i te tātou māhatu tātou ana pure
Rahi nō te taŋata i hāpī rō ki a rāua mo pure ko tū vānaŋa ꞌā ko tū vānaŋa ꞌā, ¿ko te ŋā pure ena te pure haŋa o te ꞌAtua? Ka taiꞌo Māteo 6:7 ꞌe ꞌai ka vānaŋa rō kōrua o ruŋa i te meꞌe nei:
-
E pure ꞌā tātou, ¿he aha te meꞌe mo aŋa mo taꞌe kī ko tū vānaŋa ꞌā ko tū vānaŋa ꞌā?
Mo haka topa ōꞌou i te manaꞌu paurō te mahana o ruŋa i te meꞌe riva-riva e piri atu ena, he riva koe mo pure mo māuru-uru ki te ꞌAtua o ruŋa i rā ŋā meꞌe, ¿taꞌe ꞌō pē ira? Mo aŋa koe pē ira, ka tomo era te tāpati ko pure ꞌā koe o ruŋa i te rauhuru meꞌe ki te ꞌAtua, huru kē huru kē ꞌe ꞌina koe kai kī ko tū vānaŋa ꞌā ko tū vānaŋa ꞌā.
He meꞌe haŋa o te matuꞌa, mo vānaŋa e tāꞌana poki te meꞌe e ŋaroꞌa ena ꞌi roto i tōꞌona māhatu. Pē ira ꞌā a Iehoha, he meꞌe haŋa ꞌāꞌana, mo vānaŋa o tātou o ruŋa i te meꞌe ŋaroꞌa ꞌi roto i te tātou māhatu.
6. Te pure he hauhaꞌa nui-nui e tahi o te ꞌAtua mo tātou
Mo piri mai o te ꞌati, ¿pē hē te pure e hāꞌūꞌū mai ena? Ka mataꞌitaꞌi te VĪDEO.
Te Pipiria e kī rō mai ꞌā te pure e haka haumārū rō ꞌana i te tātou manaꞌu ꞌe i te tātou māhatu. Ka taiꞌo Fīripo 4:6, 7 ꞌe ꞌai ka vānaŋa rō kōrua o ruŋa i te ŋā meꞌe nei:
-
E pure ena tātou koiꞌite e ko kore te tātou ꞌati, nō atu rā meꞌe, ¿pē hē te pure e hāꞌūꞌū mai ena?
-
¿O ruŋa ꞌo te aha e haŋa ena koe mo pure?
¿Ko ꞌite ꞌā koe i te meꞌe nei?
Te vānaŋa he amén tōꞌona haꞌaauraꞌa, “ko tano ꞌana” ꞌo “pē ira mau ꞌā ana topa”. Mai muꞌa ꞌā e haka oti ena te pure hai vānaŋa ena he amén (1 Crónicas 16:36).
7. Ka haꞌataꞌa ka haka topa te hora mo pure
E ai rō ꞌā te mahana ꞌi te rahi o te aŋa he rehu i a tātou mo pure. ¿Pē hē a Ietū e haka takeꞌa era he meꞌe nui-nui māꞌana te pure? Ka taiꞌo Māteo 14:23 ꞌe Marko 1:35, ꞌe ꞌai ka vānaŋa rō kōrua o ruŋa i te ŋā meꞌe nei:
-
¿Pē hē a Ietū e riva era mo haꞌataꞌa mo haka topa i te hora mo pure?
-
ꞌE a koe, ¿mai hē koe ana haꞌataꞌa ana haka topa i te hora mo pure?
HE AHA TAꞌA MEꞌE MO PĀHONO MO KĪ ATU E TE NUꞌU: “Nō atu ki a ai koe e pure ena e ŋaroꞌa nō e te ꞌAtua”.
-
¿He aha taꞌa meꞌe mo pāhono mo kī atu i te meꞌe nei?
TE MEꞌE MO AŊI-AŊI O RUŊA I TE HĀPĪ NEI
Mo pure o ruŋa i te meꞌe ŋaroꞌa ꞌi roto i te tātou māhatu, he ꞌata hāhine tātou ki te ꞌAtua, pē ira ꞌā he haka haumārū te tātou manaꞌu ꞌi te hora e tipa-tipa rahi ena ꞌe he hāꞌūꞌū mai mo aŋa i te meꞌe haŋa a Iehoha.
Mo taꞌe rehu
-
¿Ki a ai tātou ana pure?
-
¿Pē hē mau ana pure?
-
¿Pē hē te pure e hāꞌūꞌū mai ena ki a tātou?
MO RARA MO OHO
Ka uꞌi te meꞌe haŋa o te taŋata mo aŋi-aŋi o ruŋa i te pure.
“Siete preguntas sobre la oración” (La Atalaya, 1 de octubre de 2010)
Ka taiꞌo ꞌo te aha he meꞌe nui-nui mo pure ōꞌou ꞌe o ruŋa ꞌo te aha koe ana pure.
“¿ꞌO te aha au ana pure?” (Meꞌe pāpaꞌi ꞌi roto i te Internet nō)
Ka uꞌi ki a ai ana pure e kī ena ꞌi ruŋa i te Pipiria.
Ka mataꞌitaꞌi te vīdeo nei mo aŋi-aŋi ana ai e ai rō ꞌana e tahi nō kona ꞌo hora mo pure.