1, 2. ¿Ko ꞌui hē te ꞌui rava ꞌui e te taŋata?

TE ŊĀ poki riki⁠-⁠riki meꞌe rava ꞌui⁠-⁠ꞌui ki te meꞌe taꞌatoꞌa. Mo pāhono ōꞌou te rāua ꞌui, he ꞌui haka ꞌou atu ‘¿He aha?’ E hora ena mo haka aŋi⁠-⁠aŋi ōꞌou i rā meꞌe, i ruŋa ꞌā he ꞌui haka ꞌou atu ‘¿O te aha?’

² No atu mo ai o tātou ko paꞌari ꞌā o e ꞌāpī nō ꞌā, a tātou taꞌatoꞌa e ai rō ꞌā te ꞌui, pahe ŋā ꞌui era, hai aha ana kai, hē te kahu mo uru e hē te meꞌe mo hoꞌo mai. Peira ꞌā, e ai rō ꞌā te ꞌui nui⁠-⁠nui o ruŋa i te tātou noho iŋa e o ruŋa i te meꞌe mo piri mai pē muꞌa ka oho ena. Te ꞌati mo taꞌe ravaꞌa i te pāhono tano mo te ŋā ꞌui nei, he haka rē tātou te kimi te oho i te pāhono.

3. ¿O te aha te taŋata e manaꞌu ena e ko riva rāua mo ravaꞌa te pāhono ki te rāua ꞌui hopeꞌa era o te nui⁠-⁠nui?

³ ¿E pāhono rō mai ꞌā te Pipiria te ꞌui nui⁠-⁠nui rava ꞌui e te taŋata? E ai rō ꞌā te taŋata e manaꞌu ena peira, te ꞌati e manaꞌu takoꞌa rō ꞌā, aŋa riꞌa⁠-⁠riꞌa mo rāua mo aŋi⁠-⁠aŋi i te Pipiria. Oīra e manaꞌu ena, i te oromatuꞌa e i te maꞌori hāpī nō te pāhono mo te ŋā ꞌui nei. E ai rō ꞌā te taŋata takoꞌa e haꞌamā rō ꞌā mo kī pe nei ē ꞌina rāua kai ꞌite i te pāhono, ¿Pe hē ki tuꞌu manaꞌu?

4, 5. ¿Hē te ꞌui hopeꞌa o te nui⁠-⁠nui mōꞌou? ¿O te aha koe ana taꞌe haka rē te kimi te oho i te pāhono ki rā ŋā ꞌui?

⁴ Peaha ko haŋa ꞌā koe mo ꞌite i te pāhono o te ŋā ꞌui nei: ¿O te aha au i poreko ai? ¿He aha te meꞌe mo piri mai mo mate au? ¿Pe hē te huru o te ꞌAtua? A Ietū, te maꞌori hopeꞌa o te nui⁠-⁠nui i kī: “Ka nonoꞌi ka oho e he vaꞌai atu; ka kimi ka oho e he ravaꞌa koe, ka patōtō ka oho e he mātaki atu” (Mateo 7:⁠7). Oīra ꞌina koe ko hōriŋa, ka kimi ka oho ata ka ravaꞌa rō te pāhono mau.

 ⁵ Mo kimi mo oho nō, he ravaꞌa koe i te pāhono i ruŋa i te Pipiria (Proverbios 2:⁠1-5). Te ŋā pāhono nei meꞌe taꞌe aŋa rahi mo aŋi⁠-⁠aŋi. Te meꞌe ka hāpī ena e koe he haka koa atu i te hora nei, e he vaꞌai atu i te hauhaꞌa riva pē muꞌa ka oho ena. Mai ki hāpī tātou o ruŋa i te ꞌui e tahi e kuꞌi⁠-⁠kuꞌi ena i te taŋata.

6. ¿O te aha te nuꞌu e manaꞌu ena ꞌina he ꞌAtua he tapa i a rāua i te hora o te rāua ꞌati?

⁶ Rahi nō te taŋata e manaꞌu ena ꞌina te ꞌAtua he tapa mai i a tātou. A rāua e manaꞌu ena, ꞌāhani te ꞌAtua e tapa rō mai ꞌā e ko tuꞌu te ao pahe hora nei. O te ai i te taꞌatoꞌa kona e tikeꞌa nei tātou te tamaꞌi, te enemī ki te rua e te veve o te taŋata. Te taŋata meꞌe maiūi, meꞌe mamāe e meꞌe mate nō. Oīra te taŋata e manaꞌu ena, ‘Mo ai te ꞌAtua e tapa rō mai ꞌā ¿O te aha paꞌi e taꞌe haka kore ena i te ŋā meꞌe rake⁠-⁠rake nei?’

7. (a) ¿Pe hē te pūꞌoko haka tere o te rauhuru hare pure e haka manaꞌu ena ki te taŋata o te ꞌAtua te haka ūtuꞌa mai? (b) ¿O te aha ana taꞌe tuhi ki te ꞌAtua o ruŋa i te meꞌe rake⁠-⁠rake e piri mai ena?

⁷ E ai rō ꞌā te pūꞌoko haka tere o te rauhuru hare pure, e haka manaꞌu rō ꞌā ki te taŋata, te ꞌAtua e haka ūtuꞌa rō mai ꞌā, o te ai mo piri mai te ꞌati nui⁠-⁠nui he kī o te ꞌAtua i haŋa peira. He kī takoꞌa āꞌana te uŋa mai rā ꞌati. Hora kī era e rāua peira, e tuhi ꞌā ki te ꞌAtua āꞌana te haka ūtuꞌa mai. Te parautiꞌa, te Pipiria e hāpī rō ꞌā taꞌe mai te ꞌAtua te meꞌe rake⁠-⁠rake e oho mai ena. I ruŋa i te puka o Santiago 1:⁠13 e kī rō mai ꞌā, te ꞌAtua ꞌina he haka ꞌatu i te taŋata hai meꞌe rake⁠-⁠rake. Pe nei e kī nei: “Hora era o te ꞌati, ꞌina e tahi mo kī: ‘O te ꞌAtua te haka ꞌatu mai’. O te ai e ko riva mo haka ꞌatu i te ꞌAtua hai meꞌe rake⁠-⁠rake e ꞌina a Īa e ko haka ꞌatu takoꞌa atu.” Te haꞌauraꞌa o te vānaŋa nei, no atu te haꞌatiꞌa o te ꞌAtua mo piri mai te ꞌati, taꞌe āꞌana te aŋa i te meꞌe rake⁠-⁠rake taꞌatoꞌa e piri mai ena (Ka taiꞌo Job 34:⁠10-12). Ki haꞌauraꞌa atu.

8, 9. ¿He aha ana taꞌe riva mo tuhi ki te ꞌAtua o ruŋa i te ꞌati e piri mai ena? Ka haꞌauraꞌa mai.

 ⁸ Ka manaꞌu rā koe i te taŋa ꞌāpī e tahi, noho i muri i tōꞌona ŋā matuꞌa era. Tōꞌona matuꞌa tane e here rahi rō ꞌā ki a īa, oīra e hāpī rō ꞌā mo haka tere titīka i a īa. I tano era te mahana he pātoꞌi tū taŋa ꞌāpī nei ki tōꞌona matuꞌa e he eꞌa he oho mai te hare. He aŋa i te meꞌe rake⁠-⁠rake e oīra he piri te ꞌati ki rā poki. ¿E tuhi mau rō koe ki tōꞌona matuꞌa tane o te ai ko piri ꞌā te ꞌati ki tāꞌana poki o te taꞌe haka noho e īa hora oho era mai te hare? ¡ꞌIna hoꞌi! (Lucas 15:⁠11-13). Pahe matuꞌa tane nei, te ꞌAtua ꞌina he haka noho i te taŋata hora era mo haŋa o rāua mo pātoꞌi ki a Īa e mo aŋa i te meꞌe rake⁠-⁠rake. Oīra, hora era mo piri mai te ꞌati, ꞌina tātou ko rehu, taꞌe mai i a Īa te meꞌe rake⁠-⁠rake e piri mai ena. Meꞌe taꞌe tano mo tuhi tātou ki te ꞌAtua.

⁹ E ai rō ꞌā te rāveꞌa nui⁠-⁠nui e tahi o te ꞌAtua e taꞌe haka kore ena i te meꞌe rake⁠-⁠rake e piri mai ena i te hora nei. I te Hāpī 11 he ata aŋi⁠-⁠aŋi koe he aha te meꞌe kī e te Pipiria o ruŋa nei meꞌe. Te meꞌe raꞌe āꞌau mo aŋi⁠-⁠aŋi i te hora nei, te ꞌAtua e here rō mai ꞌā, e te rua, ꞌina tātou ko tuhi ki a Īa i te hora era mo ꞌati o tātou. Te parautiꞌa, ko Īa mau nō te kope mo haka kore tahi te ꞌati (Isaías 33:⁠2).

10. ¿O te aha tātou e ꞌite riva⁠-⁠riva nei nā te ꞌAtua he haka titīka tahi te rave ꞌino aŋa e te nuꞌu rake⁠-⁠rake?

¹⁰ ꞌIna o ruŋa i te huru o te ꞌAtua te meꞌe rake⁠-⁠rake (Isaías 6:⁠3). Taꞌatoꞌa meꞌe aŋa āꞌana he meꞌe maitaki, he meꞌe riva⁠-⁠riva e he meꞌe titīka nō. Oīra e ꞌite nei tātou ꞌina a Īa e ko hape mai ki te hora hopeꞌa. Te taŋata taꞌe peira. E aŋa rō ꞌā i te meꞌe rake⁠-⁠rake. E ka ai atu e tahi pūꞌoko haka tere titīka, ꞌina i a īa te pūai mo haka kore te meꞌe rake⁠-⁠rake aŋa e te nuꞌu rave ꞌino. ꞌIna e tahi kope hāhine ki te pūai o te ꞌAtua. E riva nō a Īa mo haka titīka tahi te ꞌati taꞌatoꞌa aŋa e te nuꞌu rake⁠-⁠rake, e nā Īa he aŋa peira. Te ꞌAtua he haka kore tahi te meꞌe rake⁠-⁠rake taꞌatoꞌa ki te hopeꞌa raꞌa (Ka taiꞌo Salmo 37:⁠9-11).

11. ¿He aha te meꞌe ŋaroꞌa e te ꞌAtua e tikeꞌa ena i tuꞌu mamāe?

¹¹ ¿He aha te meꞌe ŋaroꞌa e te ꞌAtua e tikeꞌa ena i te tātou mamāe e i te meꞌe rake⁠-⁠rake o ruŋa i te henua? Te Pipiria e hāpī rō ꞌā, meꞌe haŋa o te ꞌAtua te meꞌe titīka e i te meꞌe tano taꞌatoꞌa (Salmo 37:⁠28). Oīra te meꞌe haŋa o te ꞌAtua he tikeꞌa i te meꞌe riva e titīka i ruŋa i te ao, e taꞌe te ꞌino e te aŋa rake⁠-⁠rake. He enemī mau ōꞌona mo tikeꞌa e ꞌati rō ꞌā te taŋata. Te Pipiria e kī rō ꞌā, i mamāe rō tōꞌona māhatu hora tikeꞌa era i te rake⁠-⁠rake o te henua i muꞌa ꞌā (Génesis 6:⁠5, 6). ꞌIna te ꞌAtua kai huri ꞌā tōꞌona manaꞌu o ruŋa i nei meꞌe (Malaquías 3:⁠6). Oīra te Pipiria e kī era te ꞌAtua e tapa riva⁠-⁠riva rō ꞌā i a tātou (Ka taiꞌo 1 Pedro 5:⁠7).

12, 13. (a) ¿O te aha tātou e tapa ena ꞌe e here ena ki te rua, e he aha te meꞌe ŋaroꞌa o tātou e tikeꞌa ena i te mamāe o ruŋa i te henua? (b) ¿O te aha tātou e ꞌite riva⁠-⁠riva nei nā te ꞌAtua he haka kore tahi te mamāe e te meꞌe taꞌe titīka?

¹² Te Pipiria e kī takoꞌa rō ꞌā te ꞌAtua ko aŋa ꞌā i a tātou pahe huru era ōꞌona (Génesis 1:⁠26). Mo haꞌauraꞌa atu, te ꞌAtua i aŋa ai i a tātou hai tōꞌona huru riva taꞌatoꞌa. Oīra hora era mo tikeꞌa ōꞌou i te taŋata riva e ꞌati rō ꞌā, he mamāe koe. Peira ꞌā te ꞌAtua, ata hau tōꞌona mamāe mo tikeꞌa i te meꞌe tuꞌu peira. ¿Pe hē tātou e ꞌite nei peira mau ꞌā?

¹³ Te Pipiria e hāpī rō ꞌā te ꞌAtua, he here (1 Juan 4:⁠8). E i te rahi o tōꞌona here te ꞌAtua i aŋa ai i te meꞌe taꞌatoꞌa. Oīra a tātou e here takoꞌa ena, o te ai te ꞌAtua e here rō ꞌā. Ka manaꞌu rā, ꞌāhani e ai rō ꞌā tuꞌu pūai mo haka kore tahi te meꞌe rake⁠-⁠rake taꞌatoꞌa o te henua, ¿E haka kore rō e koe? ¡E hoꞌi! O te ai e here rō ꞌā koe ki te taŋata. E te ꞌAtua, ¿E aŋa rō peira? I te meꞌe era e haŋa rahi rō mai ꞌā ki a tātou e i a Īa te pūai, nā Īa he haka kore tahi te mamāe e te meꞌe taꞌe titīka. Oīra, ka ꞌite rō ai koe, te ŋā meꞌe riva⁠-⁠riva taꞌatoꞌa kī era e  te ꞌAtua mo aŋa i te haꞌamata o te puka nei, he haka tano tahi e Īa. Mo hīo–hīo te manaꞌu nei i roto i a koe, e ata hāpī koe o ruŋa i te ꞌAtua.

14. ¿Ko ai te ꞌīŋoa o te ꞌAtua e o te aha tātou ana kī tōꞌona ꞌīŋoa?

¹⁴ Mo māhani koe ki te rua kope, ¿He aha taꞌa meꞌe raꞌe mo kī ki a īa? He ꞌīŋoa ōꞌou. ¿E ai rō ꞌā te ꞌīŋoa o te ꞌAtua? Te rahi o te taŋata o te rauhuru hare pure e raŋi ena ki a Īa ꞌAtua o Matuꞌa, meꞌe era taꞌe he ꞌīŋoa. Rā kī haŋa, he huru o he aŋa āꞌana, pahe meꞌe e kī era he ꞌariki o he pūꞌoko haka tere henua. Te ꞌAtua ko kī mai ꞌā tōꞌona ꞌīŋoa: ko Iehoha. I ruŋa i a Salmo 83:⁠18 e kī rō ꞌā: “Mo ꞌite rō ai e te taŋata tuꞌu ꞌīŋoa ko Iehoha, ko koe nō te ꞌAtua ata ruŋa nui o te ao taꞌatoꞌa.” Te taŋata taꞌatoꞌa pāpaꞌi era i te Pipiria, a ruŋa ki te hitu tautini pāpaꞌi iŋa o te ꞌīŋoa nei i pāpaꞌi ai e rāua. A Iehoha ko haŋa ꞌā mo ꞌite ōꞌou i tōꞌona ꞌīŋoa e mo raŋi ki a Īa peira. Ko kī atu ꞌā e Īa i tōꞌona ꞌīŋoa mo riva koe mo riro he repahoa ōꞌona.

15. ¿He aha te haꞌauraꞌa o te ꞌīŋoa o Iehoha?

¹⁵ Te ꞌīŋoa nei o te ꞌAtua, ko Iehoha, e ai rō ꞌā tōꞌona haꞌauraꞌa nui⁠-⁠nui. Te haꞌauraꞌa o te ꞌīŋoa nei, i kī era e Īa e tahi vānaŋa, he haka tano tahi e Īa, e peira ꞌā te meꞌe haŋa era āꞌana mo aŋa, he aŋa e Īa. ꞌIna e tahi meꞌe  mo haka noho i a Īa. Oīra, ko Iehoha nō te kope riva mo maꞌu te ꞌīŋoa nei.⁠ *

16, 17. (a) ¿He aha te haꞌauraꞌa o te vānaŋa: “Mana pūai” e “ꞌAriki o te hopeꞌa raꞌa”? (b) ¿He aha a Iehoha takoꞌa?

¹⁶ Pahe meꞌe taiꞌo era e tātou i ruŋa i a Salmo 83:⁠18 e kī ena o ruŋa o Iehoha “ko koe nō te ꞌAtua ata Ruŋa Nui.” Peira ꞌā i ruŋa i a Revelación 15:⁠3 e kī rō ꞌā: “Nui⁠-⁠nui e hopeꞌa  o te riva⁠-⁠riva taꞌa aŋa e Iehoha ē, te ꞌAtua mana pūai. Titīka e parautiꞌa te ara taꞌatoꞌa ena āꞌau, te ꞌAriki o te hopeꞌa raꞌa.” ¿He aha te haꞌauraꞌa o te vānaŋa “mana pūai”? Te haꞌauraꞌa o nei vānaŋa, ko Iehoha nō te kope ata pūai o te ao taꞌatoꞌa. E te vānaŋa “ꞌAriki o te hopeꞌa raꞌa” tōꞌona haꞌauraꞌa, ꞌina ōꞌona haꞌamata e ꞌina ōꞌona hopeꞌa. Pahe meꞌe kī ena i ruŋa i a Salmo 90:⁠2 mai muꞌa ꞌā e pē muꞌa ꞌā tōꞌona ora iŋa. ¡Ko te aha te nui⁠-⁠nui o te ꞌAtua!

¹⁷ Ko Iehoha nō te kope aŋa tahi era i te meꞌe taꞌatoꞌa. I ruŋa i a Revelación 4:⁠11 e kī rō ꞌā: “Ki a koe mau nō e Iehoha ē, he ꞌAtua o mātou, ana vaꞌai te moꞌa, te pūai, te haŋu e ana tutūri o te ai āꞌau i aŋa te meꞌe taꞌatoꞌa e hai haŋa ōꞌou i aŋa ai.” ꞌĒ-ē, mai te merahi ki te hetuꞌu i ruŋa i te raŋi, ki te kai taꞌatoꞌa o ruŋa i te tumu, ki te ika o roto o te vaikava, taꞌatoꞌa ŋā meꞌe ena e manaꞌu ena e koe, a Iehoha i aŋa.

18. ¿O te aha te nuꞌu e manaꞌu ena e ko riva mo riro rāua he repahoa o te ꞌAtua? ¿He aha te meꞌe kī e te Pipiria o ruŋa i nei meꞌe?

¹⁸ Hora era mo taiꞌo e te nuꞌu o ruŋa i te huru nui⁠-⁠nui e pūai o Iehoha, e manaꞌu rō ꞌā peaha i raro era ꞌā a rāua, e he manaꞌu takoꞌa, ‘te ꞌAtua he kope mana pūai, he kope hopeꞌa o te hōnui, e tōꞌona kona noho ai ruŋa atu era. ¿O te aha ia te ꞌAtua ana uꞌi mai i a au?’ ¿Ko te meꞌe nei te meꞌe haŋa o te ꞌAtua mo ŋaroꞌa o tātou? ꞌIna, taꞌe peira. A Iehoha ko haŋa ꞌā mo hāhine mai ki a tātou. Te Pipiria e kī rō ꞌā te ꞌAtua “ꞌina he roa rahi, mai muri i a tātou” (Hechos 17:⁠27). Ko haŋa ꞌā te ꞌAtua mo hāhine koe ki a Īa, e ko kī ꞌā, nā Īa “he hāhine atu” (Santiago 4:⁠8).

19. (a) ¿Pe hē koe ana riro he repahoa o Iehoha? (b) ¿Hē te huru o Iehoha ata haŋa āꞌau?

¹⁹ ¿Pe hē koe ana riro he repahoa o Iehoha? Ko kī ꞌā e Ietū: “ꞌI te haꞌauraꞌa mau mo ora ki te hopeꞌa raꞌa, he hāpī he oho o ruŋa i a koe e te ꞌAtua parautiꞌa mau ē, e o ruŋa i te taŋata uŋa mai era e koe ko Ietū Kiritō” (Juan 17:⁠3). Mo hāpī mo oho he māhani koe ki a Iehoha e ki a Ietū. E mo aŋa peira, he riva koe mo ora ki te hopeꞌa raꞌa. Ka haka topa rā, nā tātou ko hāpī ko ꞌoti ꞌā “te ꞌAtua he here” (1 Juan 4:⁠16). E nā e ai takoꞌa rō ꞌā te tahi huru tau ōꞌona. Te Pipiria e kī rō ꞌā a Iehoha he ꞌAtua haka ꞌaroha e hāꞌūꞌū ki te taŋata, ꞌina he riri hōrou ꞌe e rahi rō ꞌā tōꞌona here taꞌe hape e parautiꞌa (Éxodo 34:⁠6; Pedro 3:⁠9). A Iehoha he ꞌAtua riva e ko haŋa riva⁠-⁠riva ꞌā mo haka kore te tātou hara (Salmo 86:⁠5). Te ꞌAtua e ko hape atu (Revelación 15:⁠4). He ata ꞌite koe o ruŋa i tōꞌona huru nehe⁠-⁠nehe, ka taiꞌo ka oho ena koe o ruŋa i a Īa i ruŋa i te Pipiria.

20, 21. ¿Pe hē tātou ana riva mo hāhine ki te ꞌAtua no atu te taꞌe tikeꞌa mai?

²⁰ ¿Pe hē koe ana riva mo hāhine ki te ꞌAtua ꞌina paꞌi koe  he tikeꞌa i a Īa? (Juan 1:⁠18; 4:⁠24; 1 Timoteo 1:⁠17). Ka taiꞌo ka oho ena koe o ruŋa o Iehoha i ruŋa i te Pipiria, he uꞌi koe i a Īa pahe matuꞌa hāpaꞌo atu i a koe (Salmo 27:⁠4; Romanos 1:⁠20). Ka hāpī ka oho ena koe o ruŋa o Iehoha he nui⁠-⁠nui he oho tuꞌu here ki a Īa, e he ŋaroꞌa ko ata hāhine ꞌā koe ki a Īa.

²¹ He aŋi⁠-⁠aŋi koe ko Iehoha te tātou Matuꞌa (Mateo 6:⁠9). Āꞌana tātou i aŋa, e ko haŋa takoꞌa ꞌā mo riva⁠-⁠riva te tātou ora iŋa. Ko te meꞌe nei te meꞌe haŋa o te matuꞌa here mo tāꞌana poki (Salmo 36:⁠9). Te Pipiria e hāpī rō ꞌā e riva nō koe mo riro he repahoa o Iehoha (Santiago 2:⁠23). Ka haka topa rā tuꞌu manaꞌu o ruŋa i nei meꞌe. ¡A Iehoha, te kope aŋa tahi era i te ao taꞌatoꞌa, ko haŋa ꞌā mo riro ōꞌou he repahoa ōꞌona!

22. ¿He aha taꞌa meꞌe mo aŋa mo taꞌe haŋa e te rua mo hāpī ōꞌou i te Pipiria?

²² Peaha e ai rō ꞌā te nuꞌu e ko haŋa mo hāpī ōꞌou i te Pipiria. Ko riꞌa⁠-⁠riꞌa ꞌā o te ai he manaꞌu he haka rē koe i tuꞌu hare pure. Oīra ꞌina koe ko haꞌatiꞌa e tahi taŋata mo haka noho atu mo riro koe he repahoa o Iehoha. O te ai ko Iehoha nō te Repahoa hopeꞌa o te riva⁠-⁠riva o te ao taꞌatoꞌa.

23, 24. (a) ¿O te aha ana taꞌe haka rē te ꞌui te oho? (b) ¿He aha te tātou meꞌe ka hāpī ena i te rua hāpī?

²³ Ka hāpī ena koe i te Pipiria e ai rō ꞌā te meꞌe e ko aŋi⁠-⁠aŋi e koe. Oīra ꞌina koe ko haꞌamā mo ꞌui o ruŋa o mo nonoꞌi mo hāꞌūꞌū atu mo aŋi⁠-⁠aŋi ōꞌou. E riro tātou pahe ŋā poki riki⁠-⁠riki i kī ai e Ietū, o te ai ꞌina a rāua he haka nui⁠-⁠nui i a rāua oīra e taꞌe haꞌamā ena mo ꞌui. E te ŋā poki meꞌe rava ꞌui nō (Mateo 18:⁠2-4). Ko haŋa ꞌā te ꞌAtua mo ravaꞌa koe i te pāhono. Oīra e hāpī kora iti nō i te Pipiria mo ꞌite rō ai koe pe nei ē, taꞌa meꞌe e hāpī ena he parautiꞌa (Ka taiꞌo Hechos 17:⁠11).

²⁴ Te rāveꞌa hopeꞌa o te riva⁠-⁠riva mo ꞌite o ruŋa o Iehoha e hāpī te Pipiria. I te rua hāpī o te puka nei he aŋi⁠-⁠aŋi tātou o te aha te Pipiria e topa kē ena mai te taꞌatoꞌa puka.