HĀPĪ 12
¿He aha te tātou meꞌe mo aŋa mo riro he repahoa o te ꞌAtua?
1, 2. ¿Ko ai ko ai te taŋata i riro he repahoa o te ꞌAtua?
KA MANAꞌU RĀ KOE, ¿ko ai tuꞌu repahoa? ¿O te aha i riro ai he repahoa ōꞌou? O te ai te meꞌe haŋa rahi āꞌau he huru era ōꞌona, tōꞌona huru manaꞌu, tōꞌona huru riva ꞌe meꞌe koa nō kōrua i te hora e piri ena.
2 I muꞌa ꞌā i vae ai e Iehoha i te taŋata mo riro he repahoa Ōꞌona. Mo haꞌauraꞌa atu, i ruŋa i tāꞌana puka e kī rō ꞌā, a ꞌAparahama “he repahoa Ōꞌona” (Isaías 41:8; Tanatiako 2:23). Te ꞌariki era ko Tāvita ꞌe peira ꞌā a Taniera, i riro takoꞌa rō he repahoa o te ꞌAtua. A rāua he taŋata haŋa rahi a Iehoha (Aŋa o te ꞌĀpōtoro 13:22; Daniel 9:23).
3. ¿O te aha a ꞌAparahama, a Tāvita, ꞌe a Taniera i riro ai he repahoa o te ꞌAtua?
3 ¿O te aha a ꞌAparahama, a Tāvita, ꞌe a Taniera i riro ai he repahoa o te ꞌAtua? I kī rō e Iehoha ki a ꞌAparahama: “Ko haka roŋo ꞌā koe i tōꞌoku reꞌo” (Génesis 22:18). Ki te nuꞌu haka roŋo, ꞌe taꞌe haka nui-nui i a rāua, ki a rāua a Iehoha e kimi ena mo riro he repahoa Ōꞌona. Peira ꞌā, ata ki te kāiŋa e tahi, e riva nō a Īa mo riro he repahoa. Oīra a Īa i kī ai ki te nunaꞌa era o Itaraera: “Ka haka roŋo kōrua i tōꞌoku reꞌo ꞌe he riro au he ꞌAtua o kōrua ꞌe a kōrua he riro he nunaꞌa Āꞌaku” (Jeremías 7:23). Peira ꞌā, mo ai ko haŋa ꞌā koe mo riro he repahoa o te ꞌAtua, e haka roŋo koe ki a Īa.
E HĀPAꞌO RŌ ꞌĀ E IEHOHA I TŌꞌONA REPAHOA
4, 5. ¿Pe hē a Iehoha e hāpaꞌo ena i tōꞌona repahoa?
4 Te Pipiria e kī rō ꞌā pe nei ē, a Iehoha e kimi rō ꞌā i te rāveꞌa mo haka tikeꞌa i tōꞌona pūai ki te nuꞌu here ki a Īa hai māhatu taꞌatoꞌa (2 Crónicas 16:9). I ruŋa i a Salmo 32:8 a Iehoha i kī ki tōꞌona repahoa pe nei ē: “He haka mārama-rama ꞌe he hāpī atu e au mo haꞌere koe a te ara mau era mo oho ōꞌou. ꞌE peira ꞌā he pupura atu au hai tōꞌoku mata mo hāpī atu mo taꞌe hape tuꞌu ara”.
5 E ai rō ꞌā e tahi kope pūai ꞌe taparahi-taꞌata e taꞌe haŋa ena mo riro tātou he repahoa o te ꞌAtua. No atu rā meꞌe, ko haŋa ꞌā Iehoha mo hāpaꞌo mai (Ka taiꞌo 1 Pētero 5:7). A Pablo ko ꞌite riva-riva ꞌā i te meꞌe nei. Oīra i pāpaꞌi ai o ruŋa i a Iehoha: “O te ꞌAtua te hāꞌūꞌū mai. ¿He aha ia ana riꞌa-riꞌa ꞌi te meꞌe mo aŋa mai e te taŋata?” (ꞌEvereo 13:6). Oīra, e aŋa ki a Īa hai māhatu no atu te ꞌati mo piri mai i te meꞌe era he repahoa tātou o te ꞌAtua. I te hora nei he uꞌi tātou he aha te meꞌe aŋa e tū kope taparahi-taꞌata era, he Tātane, mo taꞌe riro tātou he repahoa o Iehoha.
TE TĀTANE E VĀVĀ RŌ ꞌĀ I TE TAŊATA
6. ¿He aha te meꞌe kī e te Tātane o ruŋa i te taŋata?
6 I te hāpī 11 a tātou i hāpī ai pe hē te Tātane i pātoꞌi ai ki a Iehoha ꞌe pe hē i vāvā ai i kī era he kope haꞌavare a Īa. He kī takoꞌa o ruŋa i tōꞌona taꞌe au o te taꞌe haꞌatiꞌa ki a Atamu rāua ko Eva mo uꞌi e rāua ꞌā, he aha te meꞌe riva-riva ꞌe he aha te meꞌe rake-rake. Te puka era o Job e hāpī rō mai ꞌā pe hē te Tātane e vāvā mai ena i te taŋata e haŋa era mo riro he repahoa o te ꞌAtua. Te Tātane e kī rō ꞌā te taŋata e aŋa ena i te meꞌe haŋa o te ꞌAtua taꞌe o te haŋa mau ki a Īa, a rāua e aŋa nō era i rā meꞌe, i te hauhaꞌa riva ka ravaꞌa era o te aŋa peira. E kī takoꞌa rō ꞌā e riva nō a īa mo aŋa e tahi meꞌe mo pātoꞌi taꞌatoꞌa nō taŋata ki te ꞌAtua. Ki uꞌi he aha tātou meꞌe mo aŋi-aŋi o ruŋa i a Job ꞌe pe hē i hāpaꞌo ai e Iehoha.
7, 8. (a) ¿He aha te meꞌe manaꞌu e Iehoha o ruŋa i a Job? (b) ¿He aha te meꞌe kī e te Tātane o ruŋa i a Job?
7 ¿Ko ai te taŋata era ko Job? A īa he taŋata riva i noho ai i ruŋa i te henua 3.600 matahiti a tuꞌa. A Iehoha i kī pe nei ē, ꞌina e tahi taŋata o rā hora tuꞌu pahe huru era ōꞌona. A Job e moꞌa rahi rō ꞌā i a Iehoha ꞌe he enemī mau āꞌana te aŋa rake-rake (Job 1:8). He repahoa mau ꞌā a Job o Iehoha.
8 O te Tātane i kī o ruŋa i a Job pe nei ē, a īa e aŋa rō ana i te meꞌe haŋa o te ꞌAtua mo ravaꞌa i te hauhaꞌa riva nō mai i a Īa. Pe nei te Tātane i kī ai ki a Iehoha: “¿Kai titi ꞌo e koe i te ꞌāua ka vari rō a muri i a īa, a muri i tōꞌona hare ꞌe a muri i tōꞌona meꞌe taꞌatoꞌa era? Tāꞌana aŋa taꞌatoꞌa e aŋa era hai tōꞌona rima Āꞌau i haꞌamoꞌa, ꞌe tāꞌana puaꞌa, tāꞌana māmoe ꞌe te tahi atu manu tere henua āꞌana, ko rahi ꞌā i ruŋa i te henua. ꞌE, i te hora nei, ka haka roa-roa rā koe i tuꞌu rima ꞌe ka hiko tahi tāꞌana meꞌe taꞌatoꞌa era, ai koe ka uꞌi rō pe hē ka vānaŋa ꞌino atu ena i muꞌa mau ꞌā o tuꞌu ꞌariŋa” (Job 1:10, 11).
9. ¿He aha te meꞌe i haꞌatiꞌa e Iehoha mo aŋa e te Tātane?
9 O te Tātane i vāvā i a Job ꞌe he kī, a īa e aŋa era i te meꞌe haŋa a Iehoha o te vaꞌai nō hai meꞌe riva ki a īa. I kī takoꞌa rō pe nei ē, e riva nō a īa mo haka tutuki mo haka rē a Job te aŋa te oho ki a Iehoha. No atu te taꞌe tano te manaꞌu o Iehoha ki te meꞌe haŋa mo aŋa e te Tātane, i haꞌatiꞌa nō e Īa mo haka ꞌatu i a Job. Peira ka haka tikeꞌa era e Job, o tōꞌona haŋa rahi ki a Iehoha, a īa e aŋa era i te meꞌe haŋa Āꞌana.
HE RAVEꞌINO E TE TĀTANE I A JOB
10. (a) ¿He aha te meꞌe i aŋa e te Tātane i ruŋa i a Job? (b) ¿Pe hē i pāhono ai e Job?
10 Te meꞌe raꞌe i aŋa e te Tātane, he tiŋaꞌi tahi i tāꞌana māmoe ꞌe he toke tahi tāꞌana manu tere henua taꞌatoꞌa. Takoꞌa i tiŋaꞌi rō i te rahi o tōꞌona tāvini. ꞌIna e tahi meꞌe toe i topa i roto i te rima o Job. Peira ꞌā, i tiŋaꞌi tahi rō i te hoꞌe ꞌahuru ŋā poki a Job, hora haka marere era hai tokerau pūai e tahi, i te hare ꞌi īra tahi rāua. No atu rā meꞌe, ꞌina a Job kai hape ki a Iehoha. Te Pipiria e kī rō ꞌā: “I te taꞌatoꞌa meꞌe nei ꞌina a Job kai hara ꞌe ꞌina kai vānaŋa ꞌino o ruŋa i te ꞌAtua” (Job 1:12-19, 22).
Rahi nō te meꞌe riva i vaꞌai e Iehoha ki a Job o te taꞌe hape ki a Īa
11. (a) ¿He aha te meꞌe i aŋa takoꞌa e te Tātane ki a Job? (b) ¿Pe hē i pāhono ai e Job?
11 Te Tātane kai neke haka ꞌou a tuꞌa. Hai huru haka ꞌariŋa era ōꞌona i kī ai ki te ꞌAtua: “Ka tōtōā koe i tōꞌona hakari, ꞌe ai ka uꞌi rō ana ai e ko vānaŋa ꞌino atu i muꞌa mau ꞌā o tuꞌu ꞌariŋa”. I ꞌoti era, he aŋa e te Tātane mo piri e tahi maiūi hopeꞌa o te mamāe ki a Job (Job 2:5, 7). No atu rā meꞌe, ꞌina a īa kai hape ki a Iehoha. Pe nei i kī ai, ꞌina a īa e ko hape ki te ꞌAtua ki tōꞌona mate haŋa (Job 27:5).
12. ¿Pe hē i haka tikeꞌa ai e Job te Tātane he kope reo-reo e tahi?
12 ꞌIna a Job kai ꞌite e tahi meꞌe o ruŋa i te vānaŋa ꞌino kī era e te Tātane o ruŋa i a īa ꞌe takoꞌa o te aha e rahi e oho era tōꞌona mamāe. ꞌE i manaꞌu rō pe nei ē, o te ꞌAtua rā ŋā meꞌe taꞌatoꞌa era te aŋa (Job 6:4; 16:11-14). No atu rā meꞌe, ꞌina a Job kai hape ki te ꞌAtua. Peira i haka aŋi-aŋi ai ki te taꞌatoꞌa, ko aŋa ꞌā īa ki a Iehoha o tōꞌona haŋa rahi ki a Īa, ꞌe taꞌe o te meꞌe riva ka ravaꞌa era. Peira takoꞌa i haka tikeꞌa ai pe nei ē, taꞌatoꞌa vānaŋa ꞌino kī era e te Tātane, he reo-reo e tahi.
13. ¿He aha te meꞌe i ravaꞌa e Job o te taꞌe hape ki te ꞌAtua?
13 No atu te taꞌe ꞌite e Job te meꞌe vānaŋa era e te Tātane ki a Iehoha o ruŋa i a īa, ꞌina a īa kai hape ki te ꞌAtua ꞌe peira i haka tikeꞌa ai pe nei ē, te Tātane he kope taparahi-taꞌata. I te meꞌe era a Job he repahoa o Iehoha ꞌe ꞌina a īa kai hape, he toꞌo mai he vaꞌai e te ꞌAtua i te hauhaꞌa riva (Job 42:12-17).
KI A KOE TAKOꞌA TE TĀTANE E VĀVĀ MAI ENA
14, 15. ¿O ruŋa i te aha te Tātane e vāvā mai ena i te taŋata taꞌatoꞌa?
14 ¿He aha te meꞌe mo hāpī o tātou o ruŋa i te meꞌe i piri ki a Job? I aŋanirā nā te Tātane e vāvā mai ena i te taꞌatoꞌa taŋata aŋa mo te ꞌAtua. Pe nei e kī ena, e aŋa rō ꞌā tātou ki te ꞌAtua o te meꞌe riva nō ka ravaꞌa ena mai i a Īa. O te Tātane i kī: “Taꞌatoꞌa meꞌe ai o te taŋata he vaꞌai moꞌōna mau ꞌā mo ora” (Job 2:4). Hai vānaŋa nei i vāvā ai e te Tātane i a Job, ꞌe peira ꞌā ki te taŋata ꞌe ki te ŋā viꞌe taꞌatoꞌa pe nei ē, ata haŋa rāua he raꞌe ki a rāua mau ꞌā ꞌe taꞌe ki te ꞌAtua. Rahi nō te matahiti mai te hora mate era o te hora pāpaꞌi era te puka o Proverbios, te Tātane i haka ꞌariŋa i oho nō ki a Iehoha hai vānaŋa ꞌino ꞌe i vāvā i oho nō i tāꞌana nunaꞌa. ¿Pe hē tātou e ꞌite nei peira mau ꞌā? Hai meꞌe kī era i ruŋa i a Proverbios 27:11: “E poki āꞌaku ē, ka haka roŋo koe i tāꞌaku roŋo mo haka koa koe i tōꞌoku māhatu, mo riva au mo pāhono ki te kope e haka ꞌariŋa mai era hai vānaŋa ꞌino.”
15 Māꞌau mau ꞌā e uꞌi ana ai e haka roŋo rō koe ki te ꞌAtua ꞌe ana ai e haŋa rō koe mo riro he repahoa mau ꞌā Ōꞌona. Peira koe ka haka tikeꞌa ena te Tātane he kope reo-reo e tahi. No atu te rahi o te meꞌe a au mo aŋa mo riro he repahoa o te ꞌAtua, ī te meꞌe hopeꞌa o te riva-riva mo aŋa e koe. He meꞌe hopeꞌa o te nui-nui mo haka hio-hio i te manaꞌu nei, o te ai nā te Tātane e vāvā mai ena i a koe ꞌe he kī mo piri atu te ꞌati he haka rē rō ai koe i te ꞌAtua. Nā paꞌi a īa e aŋa mai ena i te rauhuru atu meꞌe mo hape tātou ki te ꞌAtua. ¿Pe hē?
16. (a) ¿Pe hē te Tātane e haka tuꞌu ena i a īa mo haka rē te aŋa te oho te taŋata ki te ꞌAtua? (b) Ki tuꞌu manaꞌu, ¿hai aha te Tātane e riva ena mo haka tutuki i a koe mo haka rē te aŋa te oho ki te ꞌAtua?
16 Te Tātane hai rauhuru atu huru e kimi ena i te rāveꞌa mo haka tapa i a tātou mai te ꞌAtua. Mo haꞌauraꞌa atu, e ai rō ꞌā te mahana he haka tuꞌu i a īa pahe reone maruaki mo kimi i te taŋata mo kai (1 Pētero 5:8). Oīra a koe ana taꞌe māere mo taꞌe haŋa tuꞌu repahoa, tuꞌu huaꞌai ꞌe te tahi atu nuꞌu, mo hāpī mo oho i te Pipiria ꞌe te aŋa te oho i te meꞌe tītika. Peaha, he ŋaroꞌa koe ka kī e tamaꞌi atu ana (Iovani 15:19, 20). * Takoꞌa e ai rō ꞌā te mahana, he haka tuꞌu i a īa pahe merahi maꞌeha e tahi. Peira e haka mira-mira ena i a tātou mo aŋa i te meꞌe taꞌe tano ki te ꞌAtua (2 Kōrinto 11:14). Te meꞌe aŋa takoꞌa e te Tātane mo haka rē te aŋa o tātou ki te ꞌAtua, he haka manaꞌu mai pe nei ē, ꞌina e tahi auraꞌa o tātou Mōꞌona (Proverbios 24:10).
KA HAKA ROŊO TE ROŊO A IEHOHA
17. ¿O te aha tātou e haka roŋo nei ki te ꞌAtua?
17 Mo haka roŋo tātou ki a Iehoha, i rā hora tātou e haka tikeꞌa nei pe nei ē, te Tātane he kope reo-reo e tahi. ¿He aha te meꞌe ka hāꞌūꞌū mai era mo haka roŋo ki te ꞌAtua? Te Pipiria e kī rō ꞌā: “E here koe ki a Iehoha tuꞌu ꞌAtua, hai tuꞌu māhatu taꞌatoꞌa, hai tuꞌu ora iŋa taꞌatoꞌa, hai tuꞌu haŋu taꞌatoꞌa” (Deuteronomio 6:5). A tātou e haka roŋo nei ki a Iehoha o te ai e haŋa rahi rō ana ki a Īa. Ka nui-nui ka oho ena te tātou haŋa ki a Īa, he haŋa tātou mo aŋa tahi Tāꞌana meꞌe e nonoꞌi mai era. Pe nei te ꞌāpōtoro era ko Iovani i pāpaꞌi ai: “Te haŋa ki te ꞌAtua ko te meꞌe nei: he haꞌatura ki tāꞌana roŋo, ꞌe tāꞌana roŋo meꞌe taꞌe paŋahaꞌa” ꞌo taꞌe aŋa rahi mo aŋa (1 Iovani 5:3).
18, 19. (a) ¿He aha te meꞌe rake-rake taꞌe tano ki te mata o te ꞌAtua? (b) ¿Pe hē tātou e ꞌite nei a Iehoha ꞌina he nonoꞌi mai i te meꞌe taꞌe riva e tātou mo aŋa?
18 Rahi atu te meꞌe rake-rake taꞌe tano ki te mata o Iehoha. Nā ko tuhi tahi ana i raro iti hai ꞌīŋoa “ E enemī koe ki te meꞌe enemī e Iehoha”. Peaha he manaꞌu koe e tahi o te ŋā meꞌe nei meꞌe taꞌe rake-rake mau ꞌā mo aŋa, ꞌe ka taiꞌo ka oho ena koe i te Pipiria, ꞌe ka haka topa ena koe i tuꞌu manaꞌu o ruŋa i rā ŋā meꞌe taiꞌo era, he aŋi-aŋi koe he meꞌe mārama-rama mau ꞌā mo haka roŋo ki te roŋo o te ꞌAtua. Peaha takoꞌa he aŋi-aŋi koe e ai rō ꞌā tuꞌu huru haka tere taꞌe tano mo haka tītika. Peaha e aŋa rahi rō ꞌā mo aŋa i tū hora ꞌā, no atu rā meꞌe, mo aŋa koe peira, he ravaꞌa koe i te koa mau ꞌe i te haumārū e piri era ki te repahoa mau o Iehoha (Isaías 48:17, 18). ¿Pe hē tātou e ꞌite nei e riva nō mo huri te tātou huru haka tere taꞌe tano?
19 ꞌIna a Iehoha he nonoꞌi mai e tahi meꞌe taꞌe riva e tātou mo aŋa (Deuteronomio 30:11-14). A Īa paꞌi he repahoa mau mo tātou ꞌe ata ꞌite a Īa ko ai mau a tātou ki tātou mau ꞌā. Mo haꞌauraꞌa atu, ko ꞌite ꞌā Īa mo te aha tātou e haka kē nei ꞌe mo te aha ꞌina (Salmo 103:14). A Pablo i kī rō i te vānaŋa nei mo haka haŋu mai: “Te ꞌAtua ꞌina e ko taꞌe haka tano i tāꞌana meꞌe kī. Ko kī ꞌana, paꞌi: ꞌina e ko haꞌatiꞌa mo haka ꞌatu mai i a tātou hai meꞌe e ko ravaꞌa e tātou mo haꞌaoromaꞌi, ꞌe, takoꞌa, e vaꞌai rō mai e ia i te rāveꞌa mo eꞌa o tātou ꞌina kai hara mai rā meꞌe era mo haka ꞌatu mai” (1 Kōrinto 10:13). Mā Iehoha e vaꞌai mai i te pūai mo aŋa i te meꞌe riva ꞌe peira mau ꞌā ka aŋa era. ꞌE he vaꞌai atu i te “pūai nui-nui” mo haka ꞌuhu ka piri mai ena te ꞌati (2 Kōrinto 4:7). I te hora piri era te ꞌati ki a Pablo, a Iehoha i hāꞌūꞌū. Oīra i riva ai a Pablo mo kī: “Meꞌe nō era mo topa mai, e ꞌite nō e au mo maꞌu, māuru-uru ki a Ietū Kiritō, kope haka pūai mai i a au” (Fīripo 4:13).
E HĀPĪ KOE MO HAŊA I TE MEꞌE HAŊA A IEHOHA
20. ¿Ko huru hē o Iehoha te huru tano o tātou mo haka tere ꞌe o te aha ana aŋa peira?
20 Mo haŋa tātou mo riro he repahoa o Iehoha, taꞌe nō e haka rē te aŋa te oho i te meꞌe taꞌe tano kī era e Īa mo taꞌe aŋa. E aŋa takoꞌa i te rua meꞌe (Rōmano 12:9). Te repahoa o te ꞌAtua e haŋa rō ꞌā ki te meꞌe haŋa e Īa. ꞌE e haka tano rō ꞌā te rāua huru ki te huru o te ꞌAtua: pahe “haŋa, he koa, he haumārū, he ꞌite mo haꞌaoromaꞌi, he huru riva, he māhatu ꞌaroha, he haka tano iŋa i te meꞌe kī, he taꞌe manaꞌu i hau rō atu ki te rua, ꞌe he ꞌite mo hāito i te meꞌe kī ꞌe i te meꞌe aŋa” (Karatia 5:22, 23). Mo ꞌite tātou pe hē te huru o te repahoa o te ꞌAtua, ka taiꞌo Salmo 15:1-5.
21. ¿He aha te meꞌe ka hāꞌūꞌū atu ena mo haka tere koe hai huru haŋa o Iehoha?
21 ¿He aha te meꞌe ka hāꞌūꞌū atu ena mo haka tere koe hai tū ŋā huru riva tapa tahi atu ena? Hai hāpī o ruŋa i te meꞌe haŋa a Iehoha. Mo tuꞌu ki te roa nei, e taiꞌo ꞌe e hāpī te Pipiria paurō te mahana (Isaías 30:20, 21). Ka aŋa ena koe peira, he nui-nui he oho tuꞌu here ki a Iehoha ꞌe ka hopeꞌa ena, he haŋa koe mo haka roŋo ki a Īa.
22. Mo haka roŋo koe ki a Iehoha, ¿he aha te meꞌe ka ravaꞌa ena e koe?
22 E riva nō tātou mo haꞌauraꞌa i te hora e huri era i te tātou huru haka tere ki te hora e patu era i te kahu tuai mo uru i te kahu ꞌāpī. Te Pipiria e kī rō ꞌā, mo patu tahi mai i a tātou te huru rake-rake ꞌe mo uru i te huru ꞌāpī o Iehoha (Colosenses 3:9, 10, TNM). No atu te aŋa rahi peaha mo aŋa, ko kī ꞌā e Iehoha, he vaꞌai mai i te hauhaꞌa riva mo aŋa tātou peira ꞌe mo haka roŋo ki a Īa (Salmo 19:11). Oīra, ka haka roŋo koe ki a Iehoha o tuꞌu haŋa ki a Īa ꞌe taꞌe o te meꞌe ka ravaꞌa ena. Hai tuꞌu huru haka tere ka haka aŋi-aŋi ena e koe te Tātane he kope reo-reo e tahi ꞌe he riro koe he repahoa mau o Iehoha.
^ parr. 16 Te vānaŋa nei taꞌe e kī ꞌā o te Tātane te haka tere mau i te taŋata e taꞌe haŋa era mo hāpī mo oho ōꞌou i te Pipiria. Te meꞌe nō, te Tātane te “ꞌatua o te ao nei,” ꞌe te Pipiria e kī rō ꞌā te ao taꞌatoꞌa āꞌana te haka tere tahi. Oīra tātou e taꞌe māere nei o ruŋa i te taŋata haŋa mo haka noho i a tātou mo aŋa ki a Iehoha (2 Kōrinto 4:4; 1 Iovani 5:19).
