“Te ꞌAtua o ruŋa i te raŋi he haka tuꞌu e tahi haka tere ꞌe e ko haka kore ki te hora hopeꞌa” (Daniel 2:44).

“Ko vaꞌai mai ꞌā e tahi poki ꞌe te haka tere ko haka noho ꞌā ꞌi ruŋa i tōꞌona rima” (Isaías 9:6).

• He haka tere tī-tika, riva nō mo hāꞌūꞌū atu ki a koe (Isaías 48:17, 18).

• Ka haka ꞌāpī ena te ao nei he haka kore tahi te māui-ui ꞌe he koa mau te taŋata (Meꞌe Haka Takeꞌa 21:3, 4).

ꞌĒ-ē, ꞌī tātou he uꞌi ꞌo te aha e kī nei he parautiꞌa mau ꞌā:

• A Ietū ko haka takeꞌa mai ꞌā he aha te meꞌe o te Haka Tere o te ꞌAtua ka aŋa era. A Ietū i hāpī rō ki tāꞌana pukuraŋa mo pure mo tuꞌu mai te Haka Tere o te ꞌAtua ꞌe mo aŋa tāꞌana meꞌe haŋa ꞌi ruŋa i te henua (Māteo 6:9, 10). A Ietū i haka takeꞌa rō pē hē ka pāhono ena te pure nei.

  Hora era ꞌi ruŋa i te henua a Ietū, i hāŋai rō i te taŋata, i haka kore rō te māui-ui ꞌe i haka ora haka ꞌou rō i te nuꞌu mate (Māteo 15:29-38; Iovani 11:38-44). Hai aŋa taꞌatoꞌa nei i haka takeꞌa mai ai e Ietū, he aha tāꞌana meꞌe ka aŋa ena ki tāꞌana taŋata ꞌi te hora era ka ꞌariki era i te Haka Tere o te ꞌAtua (Meꞌe Haka Takeꞌa 11:15).

• Te ꞌati e takeꞌa nei tātou ꞌi te ao taꞌatoꞌa ko haka takeꞌa mai ꞌā nā te Haka Tere o te ꞌAtua ko hāhine mai ꞌā. Ko kī ꞌā e Ietū pē nei ē, raꞌe ki te tuꞌu mai te Haka Tere o te ꞌAtua mo haka kore te taꞌatoꞌa ꞌati, he takeꞌa tātou i te tamaꞌi, i te kai kore, i te ŋāꞌaha-ꞌaha ꞌe mākenu-kenu henua ꞌi te ao taꞌatoꞌa (Māteo 24:3, 7).

  ꞌI te rava takeꞌa e tātou i te ŋā meꞌe nei ꞌi ꞌaŋanīrā e riva nei tātou mo kī, nā te Haka Tere o te ꞌAtua ko hāhine mai ꞌā ꞌe māꞌana e haka kore tahi te ŋā ꞌati taꞌatoꞌa nei.