UI TE AU MAPU E
Akapeea Au me Akanoo Meitaki i Toku Taime?
Eaa koe ka akanoo meitaki ei i toou taime?
Ka aite te taime mei te moni. Me kaimoumou koe i te reira, ka ngere aea koe. Me akanoo meitaki koe i toou taime, ka rauka ia koe i te rave i te au mea taau e reka ana i te rave!
Kaveinga Pipiria: “Te inangaro ua ra te vaerua o te tangata moe ua, kare ra ana: kareka ko te vaerua o te akamaroiroi ra, ka akamatuia ïa.”—Maseli 13:4.
Mea Puapinga: Me akanoo meitaki koe i toou taime, ka maata atu toou taime va, e kare e meangiti mai.
Me akanoo meitaki koe i toou taime, ka puapingaia koe me maata mai koe. Ka rauka taau ngai angaanga me kore ka ngere koe i te reira. Me e pitiniti taau, ka akono ainei koe i te tangata angaanga tei tae reti mai ki te angaanga?
Kaveinga Pipiria: “Ko te akono meitaki i te mea ngiti ra, kua akono meitaki katoa i te mea maata.”—Luka 16:10.
Mea puapinga: Me akanoo meitaki koe i toou taime, ka riro koe ei tangata mako.
Inara, kare i te mea māmā i te akanoo meitaki i te taime. Akara ana i teia au manamanata.
Manamanata #1: Au Oa
“Me pati mai te au oa kia aere matou ori aere, ka aru ua au, noatu kare oku taime. Ka manako au, ‘A, ka rapu ua au i taku angaanga me oki mai au ki te kainga.’ Kare te reira i te mea meitaki, no te mea kua tupu ana te kino.”—Cynthia.
Manamanata #2: Tamanata Anga
“Ka aite te tivi mei te vacuum cleaner. Ka pou toou taime i te akara i te au porokaramu e te au teata, e ka ngata ia koe i te akamutu.”—Ivy.
“Ka pou te ora ki runga i taku tablet. E oti ka manako kino au no te mea, te tumu i akamutu ei au, kua pou tona patiri.”—Marie.
Manamanata #3: Taroaroa
“E taroaroa ana au i te rave i taku apii e tetai atu au angaanga ke. Ka kaimoumou au i toku taime no te rave i tetai angaanga neneva e oti ka rave ei i taku apii—kare au e akanoo meitaki ana i toku taime.”—Beth.
Me akanoo meitaki koe i toou taime, ka maata atu toou taime va, e kare e meangiti mai
Taau ka rauka i te rave
Akapapa i taau angaanga. Te au angaanga o te ngutuare e te apii. Tata eia ora ka pou no te rave i te reira i roto i te epetoma.
Kaveinga Pipiria: “Kia timata oki kotou i te au mea e maata ua atu te meitaki.”—Philipi 1:10.
Akapapa i te angaanga e reka ana koe i te rave i toou taime va. Te au angaanga social network e te akara tivi. Tata, eia ora ka pou i roto i te epetoma.
Kaveinga Pipiria: “Ei aerenga akono meitaki to kotou . . . ma te taporoporo oki i te tuatau.”—Kolosa 4:5.
Akapapa i tetai parani. Akara i taau nga akapapaanga e rua. Kua rava ainei te taime no te au angaanga puapinga? Ka anoanoia ainei koe kia rave mai i te taime tei akanooia no te angaanga tarekareka?
Tauturu: Akapapa kia rave i te angaanga no te rā, e akairo me kua oti te reira i te rave.
Kaveinga Pipiria: “Te kimianga o te aronga maroiroi ra, tei runga ïa i te apinga maata.”—Maseli 21:5.
Rave i te reira. Penei tetai taime kare koe e āriki i te patianga no te aere ori aere, kia rauka ia koe i te akaoti i te au angaanga puapinga. I te maata anga o te taime, ka maata atu toou taime va—e ka reka atu koe i te reira.
Kaveinga Pipiria: “Eiaa e akatau i te angaanga; kia maroiroi oki te ngakau.”—Roma 12:11.
Tutaki ia koe uaorai—eiaa ra e rave vave. “Tetai taime ka akaoti au e rua angaanga i runga i taku papaanga no te rā,” i karanga ai tetai tamaine ko Tara, “e oti ka manako au, ‘OK, ka akara au i te tivi e 15 miniti e oti ka rave atu i taku angaanga.’ Kua pou e 15 ki te 30 miniti, e 30 miniti ki te tai ora, kite ake au kua pou e rua ora!”
Eaa te pauanga? Akamanako i te tuatau tarekareka ei tutaki ia koe no te akaoti anga i taau angaanga—eiaa ra e rave vave.
Kaveinga Pipiria: “Kare ainei e meitaki no te tangata . . . kia kite tona ngakau i te meitaki i tana ra angaanga?”—Koheleta 2:24.