Te mea kino: Kare e rauka te au pirianga oa me e tu akama toou.

 Te mea meitaki: Kare te tu akama i te mea kino roa. Ka tauturu te reira ia koe kia akamanako meitaki i mua ake ka tuatua ai e kia akara e te akarongo meitaki.

 Te mea meitaki atu: Kare te tu akama e tupu ua atu, ka rauka rai ia koe te akatere i te ngai kino o te reira. Ka akaari atu teia atikara akapeea koe me rave i te reira.

•  Kia mārama koe i taau e mataku ra

•  Taau ka rave

•  Ta toou au oa i karanga

 Ka tupu te akama me akamanako ua koe i te tuatua ki te tangata. E ka akamamao koe ia koe uaorai mei te katoatoa mei te mea tei roto koe i tetai ngai poiri. Ka tupu rai te mataku. Inara me mārama koe i taau e mataku ra, penei kare koe e mataku akaou i te reira. Akara i teia au akaraanga e toru.

•   Mataku #1: “Kare au e kite eaa taku ka tuatua.”

   Te tika: Kare e maara ana i te tangata taau i tuatua inara ka maara ia ratou taau i rave no te akarekareka ia ratou. Ka rauka ia koe te akatere i toou mataku na te akarongo meitaki anga, e te reka tikai anga i ta tetai ka tuatua.

   Akamanako: Eaa te tu oa taau ka inangaro—ko te pupuvaa me ko tetai tei akarongo meitaki?

•   Mataku #2: “Ka manako te tangata e popoa ua au.”

   Te tika: Ka tuatua te tangata no runga ia koe noatu e tu akama toou e me kare. Ka rauka ia koe te akatere i toou mataku—e tauturu i te tangata kia kite meitaki ia koe—me tuatua ua koe kia kite tikai ratou ia koe.

   Akamanako: Me akara koe e te akava tau kore ra te katoatoa ia koe, penei te akava tau kore ra koe ia ratou na te manako kino anga ia ratou?

•   Mataku #3: “Ka akama au me tuatua au i te mea tarevake.”

   Te tika: Ka tupu rai teia ki te katoatoa. Ka rauka ia koe te akatere i toou manako na te akara anga i te tarevake ei tuatau no te akaari e kare koe e manata ana i te reira.

   Akamanako: Kare ainei te reka ra koe i te aronga tei tuatua ua mai e e tarevake ana rai ratou?

 Kua kite ainei koe? Manako tetai pae e kare ratou e akama ana no te mea te tuku karere ra ratou. Inara e māmā ake te akaoaoa ki te tangata me pukapuka tikai koe kia ratou. Tata te taote no te manako e te taunga tekenoroti ko Sherry Turkle e: “Me kite tikai koe i te tutu mata o tetai ma te rongo i tona reo i reira korua e piri vaitata ai ki tetai e tetai.” a

•   Auraka e akaaite ia koe ki tetai. Kare koe e anoanoia kia riro ei mapu pupuvaa. Mari ra, e akatere koe i toou tu akama kia kore koe e ngere i te au pirianga oa memeitaki.

   “Kare te au pukapuka anga e anoanoia kia roangarere, e kare koe e anoanoia kia tuatua i te au taime ravarai. E akakite i toou ingoa ki tetai mapu ou, me kore e ui i te au uianga māmā ua.”—Alicia.

   Kaveinga Pipiria: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”—Galatia 6:4.

•   E akara. E akara meitaki i te aronga e pukapuka ra e akapeea ratou me pukapuka ki tetai e tetai. Eaa ta ratou e rave ra? Eaa te mea kare e meitaki ana? Eaa ta ratou e rave ra ka rauka ia koe te rave?

   “E akara e e apii mei te aronga e māmā ia ratou te akaoaoa. Akara i to ratou tu e ta ratou e tuatua ra me aravei ratou i tetai no te taime mua.”—Aaron.

   Kaveinga Pipiria: “Na te auri i akakina i te auri; e na te tangata e akakina i te mata o tona [oa].”—Maseli 27:17.

•   E ui i te au uianga. E oronga ana te tangata i to ratou manako no tetai apinga, no reira e mea meitaki i te ui i te au uianga no te akamata i tetai pukapuka anga kia ratou. Kare i reira koe e manata.

   “Me akapapa vave koe ka akaiti te reira i te taitaia. E akamanako koe i te au tumu manako me kore te au uianga i mua ake i tetai tarekareka anga e ka meangiti mai te taitaia no te aravei i tetai aronga no te taime mua.”—Alana.

   Kaveinga Pipiria: “Auraka te tangata e akono i tona anake uaorai au mea, e akono katoa ra i to etai ke ra au mea.”—Philipi 2:4.