Kare, kare te au akonoanga e aiteite ana. Te akakite maira te Pipiria i te au akonoanga tei akamareka kore i te Atua. Tei roto i teia nga tuanga e rua.

Tuanga 1: Akamorianga i te au atua pikikaa

 Te akatutu maira te Pipiria i te akamorianga atua pikikaa e e “puapinga kore,” e “pikikaa tikai,” e te “tarevakaua.” (Ieremia 10:​3-5; 16:19, 20) Kua akaue te Atua ko Iehova a i te iti tangata Iseraela i taito: “Auraka rava toou ei atua ke atu iaku nei.” (Exodo 20:​3, 23; 23:24) Te akamorianga te au Iseraela i te au atua ke, “tupu akera te riri o Iehova.”​—Numero 25:3; Levitiku 20:2; Te Au Akava 2:​13, 14.

 Mei tera katoa to te Atua manako no te akamorianga o “te au mea e karangaia e e atua.” (1 Korinetia 8:5, 6; Galatia 4:8) Kua akaue aia i te aronga tei inangaro i te akamori iaia kia akamutu i te piri atu ki te aronga akonoanga pikikaa, te na ko anga: “E aere mai kotou ki vao, mei roto mai ia ratou ra, kia taka ke kotou.” (2 Korinetia 6:​14-​17) Naringa e aiteite te au akonoanga e te arataki ra ki te Atua, eaa i reira te Atua i oronga ai i teia akaueanga?

Tuanga 2: Akamorianga i te Atua mou na te tu kare aia e mareka ana

 I tetai au taime, kua akamori te au Iseraela i te Atua na te taangaanga anga i te au irinakianga e te au angaanga akamorianga atua pikikaa, inara kua patoi a Iehova i teia kairo anga i te akonoanga mou ki te pikikaa. (Exodo 32:8; Deuteronomi 12:​2-4) Kua akaapa a Iesu i te au arataki akonoanga i tona tuatau no ta ratou peu akamorianga i te Atua; e akaariari akonoanga ua ta ratou, inara e pikikaa “te akaruke [anga] i te au mea mamaata o te ture, te tuatua-tau, te aroa, e te akarongo.”​—Mataio 23:23.

 Pera i teia tuatau, ko te akonoanga tuatua mou anake te arataki ra i te tangata ki te Atua. Tei roto i te Pipiria teia tuatua mou. (Ioane 4:​24; 17:17; 2 Timoteo 3:​16, 17) Te riro ra te au apiianga akonoanga kare i roto i te Pipiria ei akavare i te tangata mei te Atua. E maata te au apiianga te manako ra te tangata e no roto mai i te Pipiria​—te Toru Tai, te oraanga mate kore, e te tamamae anga mutu kore​—no ko mai te reira i te aronga tei akamori i te au atua pikikaa. Te akamorianga tei turu i teia au apiianga e “puapinga kore,” no te mea kua aru ratou i te au peu akonoanga kare i ta te Atua au apiianga.​—Mareko 7:7, 8.

 Makitakita te Atua i te akonoanga pikikaa. (Tito 1:​16) Kia akavaitata i te tangata ki te Atua ka anoanoia te akonoanga kia rave i te reira e kare no tetai au peu matauia. Ei akaraanga, te karanga ra te Pipiria: “Te manako ra tetai tangata ia kotou e, e akono tona i te Atua, e kare i tapeka i tona arero, te pikikaa ra i tona uaorai ngakau; e akono pikikaa tona i te Atua. Ko te akono mou i te Atua e te kino kore i mua i te aroaro o te Atua, o to tatou Metua ra, ko teia ïa: Ko te takinga-meitaki i te matiroeroe e te au vaine takaua i to ratou mate anga e te tiaki iaia uaorai auraka ei viivii i teianei ao.” (Iakobo 1:​26, 27) Taangaanga te King James Version i te tuatua “akonoanga mā” no teia akamorianga mā e te tika.