Akapeea te Atinga o Iesu i Riro ei ei “Oko no te Tangata e Manganui”?

AKATANGI

Te pauanga a te Pipiria

Ko te atinga oko o Iesu ta te Atua ravenga no te akaora i te tangata mei te ara e te mate. Te akakite maira te Pipiria i te toto akamaringiia o Iesu, tei tutaki i te oko. (Ephesia 1:7; 1 Petero 1:18, 19) No reira, a Iesu i karanga ai e kua aere mai aia ei “oko no te tangata e manganui.”—Mataio 20:28, King James Version.

Eaa ra i anoanoia ai te “oko no te tangata e manganui”?

Kua angaia te tangata mua ko Adamu ma te tiamā. Tei iaia te manakonakoanga no te oraanga mutu kore inara kua ngere aia i te reira no te mea kare aia i akarongo ana ki te Atua. (Genese 3:17-19) I te anau tamariki anga aia, kua iri katoa mai te ara ki tana uanga. (Roma 5:12) No teia tumu, te akakite maira te Pipiria e kua “okoia” e Adamu iaia uaorai e tana tamariki ki raro i te tuikaa o te ara e te mate. (Roma 7:14) No te ara, kare e rauka ia ratou i te oko i tei ngere ia Adamu.—Salamo 49:7, 8.

Kua tangi atura te Atua i te uanga a Adamu no to ratou turanga puapinga kore. (Ioane 3:16) Kua umuumu ta te Atua kaveinga tuatua tika eiaa aia e akakore i ta ratou ara ma te kore e tumuanga tau. (Salamo 89:14; Roma 3:23-26) Kua aroa maata te Atua i te tangata ravarai, e kua oronga mai aia i te tumu tau kia akakoreia e kia tangaroia ta ratou ara. (Roma 5:6-8) Na roto i te atinga oko.

Eaa ta te oko i akatupu?

I te tuatau Pipiria, te kupu “oko” te ō maira e toru ïa apinga:

E tutakianga te reira.—Numero 3:46, 47.
Akatupu mai te reira i te akamataraanga, me kore te akaora mai anga.—Exodo 21:30.
Ka tutaki kia aiteite tona puapinga ki te apinga ka okoia mai. a

Akamanako ana akapeea teia au ravenga e tau ei ki te atinga oko o Iesu Mesia.

Tutakianga. Karanga ra te Pipiria no te au Kerititiano e kua “okoia kotou i te oko.” (1 Korinetia 6:20; 7:23) Te tutakianga, ko te toto o Iesu, na roto i te reira kua “oko koe ia matou ei tangata no te Atua . . . no roto i te au kopu ravarai, e te au reo katoa, e te au iti-tangata katoa, e te pa enua katoa.”—Apokalupo 5:8, 9.
Akamataraanga. Kua oronga mai te atinga o Iesu i te “oko” i te ara.—1 Korinetia 1:30; Kolosa 1:14; Ebera 9:15.
Tutaki Aiteite. Aiteite te tutaki o te atinga o Iesu ki ta Adamu i ngere—te oraanga tiamā o te tangata okotai. (1 Korinetia 15:21, 22, 45, 46) Na ko ra te Pipiria: “Mei te tangata katoa e manganui i akariroia ei tangata ara i te akono kore o te tangata okotai [ko Adamu] ra, manganui oki tei akariroia ei tangata tuatua-tika i te akono a te tangata okotai [ko Iesu Mesia] ra.” (Roma 5:19) Te akamārama mai nei teia i te mate o te tangata okotai ka tutaki i te oko no te aronga ara katoatoa. Te tika, te atinga o Iesu kua “oko i te tangata katoa” te aronga tei rave i te au takainga kia puapingaia mei te reira.—1 Timoteo 2:5, 6.

a I roto i te Pipiria, te au kupu tei uriia te tuatua “oko” te aiteanga e tutaki, me kore tetai apinga puapinga, ka okoia. Ei akaraanga, te aiteanga o te tuatua verepa Epera ka·pharʹ e “amo.” (Genese 6:14) Te taiku ra ki te tapokianga ara. (Salamo 65:3) Te tuatua koʹpher te taiku ra ki te moni tutaki ei tapoki me kore kia akaaiteite i te ka okoia. (Exodo 21:30) Pera katoa, te tuatua Ereni lyʹtron, te uri anga e “oko,” tetai aiteanga e “tutaki aiteite ei akaora.” (Mataio 20:28; The New Testament in Modern Speech, na R. F. Weymouth) Te taiku ra te aronga tata Ereni i teia kupu ki te moni tutaki ei oko mai i tetai tangata tamaki me kore ei akarangatira i tetai tuikaa.