Ko te ture “e mata ra, ei mata ïa te tutaki,” no roto mai ïa i te Ture a te Atua ta Mose i oronga ki te ngati Iseraela e ko ta Iesu katoa i taiku i roto i tana Ako i runga i te Maunga. (Mataio 5:38; Exodo 21:24, 25; Deuteronomi 19:21) Ko te aiteanga, me akautungaia te tangata rave kino, kia tau te utunga ki te kino i raveia. a

 Kua tau teia ture no te aronga kua rave akakoro i te kino ki tetai ke. Akakite te Ture a Mose no te aronga rave kino: “E paruparu ra ei paruparu ïa, e mata ra ei mata ïa, e nio ra ei nio ïa, mei iaia i ravekino atu i tetai ra, kia akapera katoaia mai aia.”​—Levitiku 24:20.

•  Eaa te akakoroanga o te ture “e mata ra, ei mata ïa te tutaki”?

•  Ka aru ainei te au Kerititiano i te ture “e mata ra, ei mata ïa te tutaki”?

•  Au manako tarevake no te ture “e mata ra, ei mata ïa te tutaki”

•  Akatano a Iesu i tetai manako tarevake

 Kare te ture “e mata ra, ei mata ïa te tutaki” e oronga mai i te tikaanga no tetai kia tutaki i te kino ki te kino. Mari ra, kua tauturu teia ture i te au akava kia tuku mai i te utunga tau, tei kore e pakari roa e kare e iti roa.

 Kua riro katoa teia ture ei tāpu i te tangata kia kore e rave akakoro e te kimi ravenga no te takinokino i etai ke. Akamārama mai te Ture: “Ka riro oki tetai papaki i te kite [ta te Atua utunga i te tangata rave kino], e riro i te mataku; e kare atura e rave akaou i taua kino ra i rotopu ia kotou.”​—Deuteronomi 19:20.

 Kare, kare te au Kerititiano e aru i teia ture. E tuanga te reira no te Ture a Mose, ta Iesu i akaope na roto i tona mate.​—Roma 10:4.

 Noatu ra, ka tauturu teia ture ia tatou kia mārama i to te Atua manako. Ei akaraanga, te akaari maira e e akaperepere te Atua i te tuatua tau. (Salamo 89:14) Akaari katoa mai te reira i tona turanga no te tuatua tau—koia, kia akoia te tangata rave kino “ma te tuatua-tau.”​—Ieremia 30:11.

 Manako Tarevake: Te ture “e mata ra, ei mata ïa te tutaki,” kua akatika i tetai tangata kia akaoko atu me kore te tutaki i te kino ki te kino.