Te akamaroiroi maira te Pipiria i te oronga anga ma te ngakau tae e te meitaki. Te akaari katoa maira te reira i te puapinga ka tupu ki te tangata ngakau oronga e te tangata tei āriki. (Maseli 11:25; Luka 6:​38) Karanga a Iesu: “E mea meitaki i te oronga atu i te rave mai.”​—Angaanga 20:35.

•  Eaa te taime tau no te oronga?

•  Eaa te taime tau kore no te oronga?

•  Au irava no te oronga anga

 Ka puapinga te oronga anga me raveia ma te ngakau oronga ua i te taime kare i manakoia ana. “E oronga te tangata ravarai i tana i akakoro i roto i tona ngakau,” i na te Pipiria ei, “eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.”​—2 Korinetia 9:7

 E tuanga no “te akono mou i te Atua” tei akamareka iaia me oronga ma te ngakau tae. (Iakobo 1:​27) Ko te tangata tei oronga i te tauturu ki te aronga e ngere ra, te angaanga kapiti ra ki te Atua, tei akara mai i tona ngakau oronga e e kaiou kiaia. (Maseli 19:17) Te apii maira te Pipiria e na te Atua e tutaki i te tangata oronga.​—Luka 14:12-​14.

 Me raveia te reira ma te akakoroanga noinoi. Teia tetai au akaraanga:

•   Kia akareka i tetai tangata.​—Mataio 6:2.

•   Kia rauka mai te apinga.​—Luka 14:12-14.

•   Kia rauka te ora.​—Salamo 49:6, 7.

 Me tauturu te reira i te au angaanga me kore au tu te akaapa ra te Atua. Ei akaraanga, ka kino i te oronga i te moni ki tetai tangata te ka taangaanga puapinga kore i te reira no te pere moni me kore te oko apinga i te apinga akakona e te kava. (1 Korinetia 6:​9, 10; 2 Korinetia 7:1) Pera katoa, kare e tau i te oronga ki tetai ka rauka te akono iaia uaorai i te tua o te moni, inara kua patoi i te rave i te reira.​—2 Tesalonia 3:​10.

 Me tamanata i tana apainga no ko mai i te Atua. Te apii maira te Pipiria e kia akono te upoko i tona ngutuare. (1 Timoteo 5:8) Kare e tau no tetai upoko i te oronga ki tetai ke e kua ō tona ngutuare ki roto i te kino. Pera katoa, kua akaapa a Iesu i te aronga tei patoi i te akono i to ratou metua pakarikari na te tuatua anga e “na te Atua taku apinga katoa.”​—Mareko 7:​9-​13.