Kare, kare te Patireia o te Atua i roto i te ngakau o te au Kerititiano. a Te akakite maira te Pipiria e teiea te reira, i te akataka anga e ko “te basileia o te rangi.” (Mataio 4:​17, King James Version) Akara ana akapeea te Pipiria i te akamārama mai anga e e kavamani tika tikai te reira, ka tutara mei te rangi mai.

•   Te Patireia o te Atua, e au tutara tona, e iti tangata tona, e e papa ture tana, ei akatupu i te anoano o te Atua i te rangi e te enua nei.​—Mataio 6:​10; Apokalupo 5:​10.

•   Te kavamani o te Atua, me kore Patireia, ka tutara ki rungao i “te au tangata katoa, te pa enua, e te au reo” o te enua. (Daniela 7:​13, 14) No ko mai tona mana tutara i te Atua, kare i te tangata.​—Salamo 2:​4-6; Isaia 9:7.

•   Akakite a Iesu ki tana au apotetoro tiratiratu e ka piri mai ratou kia “noo ki rungao i te au terono” o teia Patireia i te rangi.​—Luka 22:28, 30.

•   Teia Patireia, e au enemi tona, te ka takoreia.​—Salamo 2:​1, 2, 8, 9; 110:1, 2; 1 Korinetia 15:25, 26.

 Kare te Pipiria i apii ana e tei roto i toou ngakau te Patireia o te rangi e te tutara ra te reira i roto i te ngakau. Mari ra, te akakite maira e ka rauka i te “tuatua o te Basileia” me kore te “evangelia o te Basileia” i te akakeu i to tatou ngakau.​—Mataio 13:19; 24:14.

Eaa te aiteanga o “te basileia o te Atua, tei roto ïa ia kotou nei”?

 Kua mārama kore tetai pae e teiea te Patireia ia Luka 17:21 o tetai au urianga Pipiria. Ei akaraanga, te akakite ra te King James Version e “te basileia o te Atua, tei roto ïa ia kotou nei.” Kia mārama i teia irava, ka akara ana tatou i te katoaanga o teia pene.

 Te tuatua ra a Iesu ki te au Pharisea, e pupu arataki akonoanga tei patoi iaia e kua tamate atu iaia. (Mataio 12:14; Luka 17:20) E mea tau ainei kia akamanako e tei roto te Patireia i to ratou ngakau paketaketa? Karanga a Iesu kia ratou: “Ko roto ra, te ki nei ïa i te pikikaa e te kino.”​—Mataio 23:27, 28.

 Te akamārama maira tetai urianga i ta Iesu tuatua ia Luka 17:21: “Te patireia o te Atua tei konei ia kotou.” (Na matou te tataanga arara; Contemporary English Version) “Te Patireia o te Atua tei rotopu ia kotou na.” (New World Translation) Te Patireia o te rangi tei “konei” me kore tei “rotopu” i te au Pharisea, no te mea ko Iesu te Ariki, tei ikiia e te Atua, e tu ra ki mua ia ratou.​—Luka 1:​32, 33.