Kare. Me akaaiteia ki te au tataanga taito, ka kite tatou e kare te Pipiria i taui noatu te au tauatini mataiti o te kopi anga i te reira ki runga i te au apinga pe ua.

 E tauatini ua atu au tataanga taito o te Pipiria tei kiteaia. Tetai au tataanga, e maata te ngai tukeke, te akaari maira e kua tarevake te kopi anga. Te maataanga o teia au ngai tuke, e mea iti ua e kare te karere i taui. Inara, kua kitea mai tetai au tauianga maata i roto i tetai au tataanga taito, i te akara anga e mea akakoro kia taui i te karere Pipiria. Akamanako ana e rua akaraanga:

1.   Ia 1 Ioane 5:7, te taiku ra tetai au urianga takere o te Pipiria i teia au tuatua: “i te rangi, te Metua, te Logo, e te Vaerua Tapu: e teia toko toru ra e okotai ia.” Inara, i roto i te au tataanga taito irinakiia, kua akapapu mai e kare teia au tuatua i roto i te tataanga mua. Kua tāruia te reira ki roto i muri mai. a No reira, kua akapae te au urianga Pipiria irinakiia i teia au tuatua ki vao.

2.   E tauatini ua atu taime kua tataia te ingoa o te Atua i roto i te au tataanga taito o te Pipiria. Inara, e maata te urianga Pipiria tei mono i te reira ki te au taoonga mei te “Atu” me kore “Atua.”

 I teia tuatau, e maata tikai te au tataanga taito tei kitea mai e e mea māmā tikai i te akataka i te au ngai tarevake. b Me akaaiteia teia au tataanga, eaa ta te reira i akaari mai no runga i te tu tano tikai o te Pipiria i teia tuatau?

•   No runga i te tataanga o te Au Tuatua Tapu Epera (kapiki katoaia ko te “Koreromotu Taito”), karanga te tangata kite a William H. Green: “Penei ka rauka kia tuatuaia e kare atu e tataanga tika tikai tei tataia mei teia te tu.”

•   No runga i te Au Tuatua Tapu Ereni Kerititiano, koia te “Koreromotu Ou,” tata te tangata apii Pipiria ko F. F. Bruce: “E maata ua atu te akapapuanga no te au tataanga o te Koreromotu Ou me akaaiteia ki au tataanga ke mai o te aronga tata i taito, kare ra tetai e ekoko i te tu papu tikai o te reira au tataanga ke.”

•   Karanga a Sir Frederic Kenyon, e tangata maata no te au tataanga taito o te Pipiria e ka rauka i tetai tangata “te mou i tana Pipiria ki roto i tona rima e te karanga ma te kore e ekoko e te emiemi e te mou nei aia i te Tuatua mou tikai a te Atua, tei ora mai mei tera uki ki tera uki i te au anere mataiti i aereia mai e kare i tauiia.”

•   Kua taporoporo te aronga tata ngati Iuda e te Kerititiano i te au tua te akaari ra i te au tarevake kino tikai a te iti tangata o te Atua. c (Numero 20:12; 2 Samuela 11:​2-4; Galatia 2:​11-​14) Pera katoa, kua taporoporo ratou i te au tuanga te akaapa ra i te ngati Iuda no to ratou tu akarongo kore e te akakite ra i te tarevake o te au apiianga a te tangata. (Hosea 4:2; Malaki 2:8, 9; Mataio 23:8, 9; 1 Ioane 5:​21) Na te kopi meitaki anga i teia au papaanga, kua akaari te aronga tata i to ratou tu tiratiratu e to ratou akangateitei i te Tuatua tapu a te Atua.

•   Kare ainei me na te Atua i akauru i te Pipiria, e mea tau i reira ka akapapu aia e e tika tikai te reira e tae ua mai ki teia tuatau? d (Isaia 40:8; 1 Petero 1:​24, 25) Ko te tika, kua akakoro aia kia puapingaia te katoatoa mei te reira, kare ko te aronga ua i taito mari ra ko tatou katoa. (1 Korinetia 10:11) Ae, “te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.”​—Roma 15:4.

•   Kua taiku a Iesu e tana au pipi i te au urianga o te Tuatua Tapu Epera ma te kore e ekoko i te tu tika tikai o teia au tataanga taito.​—Luka 4:​16-​21; Angaanga 17:​1-3.