Te Puka o Apokalupo—Eaa Tona Aiteanga?
Te pauanga a te Pipiria
Te ingoa Ereni o te puka Pipiria o Apokalupo, A·po·kaʹly·psis (apokalupo), te aiteanga “Akamaeuanga” me kore “Akakiteanga.” Te akakite maira teia ingoa i te aiteanga o Apokalupo—ka akamaeu te reira i te au mea tei uunaia e ka akakite i te au mea te ka tupu i muri roa ake te tataia anga. E maata tana au totou kare i akatupuia ake.
Akatakaanga i te puka o Apokalupo
Te akamataanga.—Apokalupo 1:1-9.
Te au karere mei ko mai ia Iesu ki te putuputuanga e itu.—Apokalupo 1:10–3:22.
E orama no te Atua i runga i tona terono i te rangi.—Apokalupo 4:1-11.
Te au orama, mei tetai ki tetai:
Nga akairo e itu.—Apokalupo 5:1–8:6.
Nga pu e itu, ka akakite te toru pu openga i te au mate.—Apokalupo 8:7–14:20.
Nga kapu e itu, e mate to roto tei akatutu i ta te Atua akavaanga te ka riringiia ki runga i te enua.—Apokalupo 15:1–16:21.
Te au orama me takoreia to te Atua au enemi.—Apokalupo 17:1–20:10.
Te au orama akameitakianga mei ko mai i te Atua no te rangi e te enua.—Apokalupo 20:11–22:5.
Te openga.—Apokalupo 22:6-21.
Kia māramaia te puka o Apokalupo
Ka irinakiia tona aiteanga, kare i te mea mataku me kore kino no te aronga tei tavini i te Atua. Koi manako ei te maata anga i te tuatua “apokalupo” ei tumatetenga maata, ka akamata te puka o Apokalupo e ka taopenga na te karanga anga e ka mataora te aronga tei tatau, tei mārama, e tei taangaanga i tana karere me rave ratou i te reira.—Apokalupo 1:3; 22:7.
E maata ta Apokalupo au “akairo,” me kore au akatutuanga kia māramaia ei au akaaiteanga kare i te mea tika tikai.—Apokalupo 1:1.
E maata te au mea puapinga e te au akatutuanga i roto i te puka o Apokalupo tei akakiteia i te akamata anga o te Pipiria:
Iehova—“te Atua ki runga i te rangi” e Tei Anga i te au mea ravarai.—Deuteronomi 4:39; Salamo 103:19; Apokalupo 4:11; 15:3.
Iesu Karaiti—“te Punua-mamoe a te Atua.”—Ioane 1:29; Apokalupo 5:6; 14:1.
Tiaporo ko Satani—te enemi o te Atua.—Genese 3:14, 15; Ioane 8:44; Apokalupo 12:9.
Babulonia Maata—mei ia Babulonia taito (Babela), e enemi aia no te Atua ko Iehova e tona iti tangata e koia te tumu o te au pikikaa akonoanga.—Genese 11:2-9; Isaia 13:1, 11; Apokalupo 17:4-6; 18:4, 20.
‘Te tai’—te aronga kino tei patoi i te Atua.—Isaia 57:20; Apokalupo 13:1; 21:1.
Te au apinga o te tapenakara taito tei taangaangaia no te akamorianga i te Atua—pera te aruna koreromotu, te tai iʼo (kapu no te orei), te au lamepa, te au atinga karakaratio, e te atarau akaatinga.—Exodo 25:10, 17, 18; 40:24-32; Apokalupo 4:5, 6; 5:8; 8:3; 11:19.
Te au puaka taae—te akatutu ra i te au kavamani tangata.—Daniela 7:1-8, 17-26; Apokalupo 13:2, 11; 17:3.
Te au numero ei akatutuanga.—Apokalupo 1:20; 8:13; 13:18; 21:16.
Te aiteanga o te au orama ko “te rā o te Atu” ïa, tei akamata te akanooia anga te Patireia o te Atua i te 1914 e kua akamata a Iesu i te tutara ei Ariki. (Apokalupo 1:10) Ka tapapa atu tatou i te tuanga maata o Apokalupo kia akatupuia i to tatou tuatau.
Kia mārama i te puka o Apokalupo, ka anoanoia taua au mea te ka tauturu ia tatou kia mārama i te toenga o te Pipiria, pera te pakari mei ko mai i te Atua e te tauturu a te aronga tei mārama takere i te reira.—Angaanga 8:26-39; Iakobo 1:5.