Ka rauka te au nuti kino—e te au teata kino—na runga i te TV, te tereponi, te apinga apaipai, e te au komupiuta 24/7.

 Te akarakara ra te tamariki i te reira.

 Akapeea koe me akono i taau tamariki kia kore ratou e mataku i te au nuti kino?

•  Akapeea te tamariki me akakeuia e te nuti?

•  Akapeea koe me tauturu i taau tamariki me taitaiaia e te nuti?

•  Akapeea me kua kite ana taau tamaiti i tetai tumatetenga kino?

•   E taitaia ana te tamariki me kite ratou i te au tumatetenga i runga i te nuti. Penei kare tetai au tamariki e akakite i to ratou manako, e penei te taitaiaia ra ratou no te reira. a E ka kino atu te reira me te taitaia ra to ratou nga metua.

•   Penei e mārama kore te tamariki i ta ratou e akara ra i runga i te nuti. Ei akaraanga, ka manako tetai pae e ka tupu ta ratou i kite ki to ratou ngutuare tangata. E me akara putuputu te tamariki i te au teata kino no tetai tumatetenga kino penei ka manako ratou e te tupu putuputu ra te reira.

•   Penei e ngata i te tamariki kia mārama meitaki i te nuti. Kare te tamariki i kite e e pitiniti te au nuti e ka puapingaia te reira i te pae o te moni me maata te tangata e akara ra i te reira nuti. No reira, ka akakeukeu tetai au nuti i te maata anga o te tangata kia inangaro i te akara ua atu i te reira.

•   Akaiti i ta ratou akarakara i te nuti kino. Kare te aiteanga e ka akangaropoina taau tamariki i te au mea e tupu ra i teianei ao. Inara kare e meitaki me akara ua ratou me kore me akarongo ua i te au nuti kino.

   “Tetai taime e pukapuka ana maua no runga i tetai nuti, ma te kite kore e kino te reira me akarongo mai te tamariki.”—Maria.

   Kaveinga Pipiria: “E apainga teiaa te manata ua.”—Maseli 12:25, Contemporary English Version.

•   Akarongo marie, ariu atu ma te akaaroa. Me e ngata i taau tamaiti kia pukapuka no te reira tupuanga, e akakite kiaia kia torō i tetai tutu no te reira. E uriuri i te au manako apiapi o taau tamaiti na te tuatua anga i te au tuatua ka mārama aia, auraka e uriuri i te au apinga kare aia e anoanoia kia kite.

   “Kua maru mai ta maua tamaine te noo anga matou ki raro ma te akarongo kiaia. Kare teia tuatua e tauturu iaia me ka karanga koe, ‘Ko teia te tu i teianei, ka aru tatou i te reira.’”—Sarahi.

   Kaveinga Pipiria: “Kia rapurapu ua . . . i te akarongo, kia tavarevare i te tuatua.”—Iakobo 1:19.

•   Tauturu i taau tamaiti kia mārama meitaki i te au nuti. Ei akaraanga, penei ka riro tetai tangata tei opuia ei nuti kino. Akamārama ki taau tamariki i ta ratou ka rave kia vai meitaki ua. E akamanako katoa e me tupu tetai tumatetenga ka akakiteia te reira e te nuti no te mea kare e tupu putuputu ana te reira.

   “Tauturu i taau tamariki i te pae o te manako ngakau. I muri ake i te kite anga i tetai apinga ka akakeuia te manako ngakau, e tauturu i ta tatou tamariki kia akamou ki runga i te au manako papu, ka maru mai ratou.”—Lourdes.

   Kaveinga Pipiria: “Na te ngakau o te tangata pakari e akakite ki te vaa i te akono, e na te reira e akakite ki te ngutu i te kite.”—Maseli 16:23.