“E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:4, Te Bibilia Tapu Ra.

 Kua taputou mai te Atua e ka takoreia te au mamae ravarai e tupu nei ki te au tangata i teia tuatau e te tumu katoa o teia au mamae.

 “E nana e orei i te roi-mata katoatoa.” Te akapapu maira teia au tuatua i ta Iehova a taputou ta te peroveta ko Isaia i tata e Nana na Iehova “e orei i te roi-mata i te au mata ravarai.” (Isaia 25:8; Apokalupo 7:17) Te akaari maira teia i te aroa o te Atua no te aronga e mii nei kua takake tetai tei akaperepereia me kore no tetai ua atu mamae.

 “E kore rava te mate.” Tetai aiteanga o teia tuatua “kare te mate e tupu akaou.” Kua taputou mai te Atua e ka takoreia te mate e te mamae. Pera katoa, ka rauka te tuakaouanga no te aronga tei mate. (1 Korinetia 15:21, 22) No reira, ko te mate, ka “akakoreia.”—1 Korinetia 15:26.

 “Te aue, e te mii; e te mamae oki, e kore katoa ïa.” Kare te aiteanga o ta te Atua taputou e kare te tangata e kite i te mamae, mei te mamae o te kopapa. Inara, te karanga ra teia taputou e te au manako taitaia, te mamae ngakau, e te mamae i te pae kopapa no te ara b e te tu apa ra ka akakoreia te reira.—Roma 8:21, 22.

 “Kua kore te au mea taito.” Te akakite maira te tuanga openga o teia irava i te au tauianga ka tupu ki te au tangata. Karanga ra tetai puka: “Ko te tu o te oraanga e tupu nei ki te au tangata, mei te mate, te mii, te aue, e te mamae, ka monoia te reira ki tetai oraanga ou.” Ka rekareka i reira te au tangata i tetai oraanga meitaki i te enua nei e tuatau ua atu, mei ta te Atua i akakoro i mua ana.—Genese 1:27, 28.

 I te akamataanga o te pene 21, kua akakite mai te apotetoro ko Ioane i tana i kite i roto i te orama: “E kite atura au i te rangi ou e te enua ou.” (Apokalupo 21:1) Te akakite maira aia i tetai tauianga maata tei taikuia i roto i tetai au irava o te Pipiria. (Isaia 65:17; 66:22; 2 Petero 3:13) Ka mono te kavamani me kore te “rangi ou” o te Atua i te au kavamani a te tangata, e ka tutara ki rungao i te “enua ou,” koia oki, te au tangata i runga i te enua i roto i te ao ou.—Isaia 65:21-23.

 Eaa te akapapu maira e te taiku ra te orama ki te oraanga i te enua nei? Mea mua, karanga ra te taputou a te Atua ma teia au tuatua e: “Tei ko te tangata ra te puakapa o te Atua.” (Apokalupo 21:3) Kare teia taputou i orongaia ki te au angera i te rangi, mari ra no te au tangata i te enua nei. Te rua, akakite maira te orama “e e kore rava te mate.” (Apokalupo 21:4) Kare te mate i tupu ana i te rangi, kua tupu ra ki te au tangata i te enua nei. (Roma 5:14) No reira, te akakite maira teia irava i te au turanga te ka tupu no te tuatau ki mua i te enua nei.

 Akara i teia vitio poto ua no runga i te puka o Apokalupo.