AKAMĀRAMAIA TE AU IRAVA PIPIRIA

Genese 1:1—“I Muatangana ra, Kua Anga Iora te Atua i te Rangi e te Enua”

AKATANGI

“I muatangana ra, kua anga iora te Atua i te rangi e te enua.”—Genese 1:1, Te BibiliaTapu Ra.

Aiteanga o Genese 1:1

Te akakite maira teia irava akamataanga o te Pipiria e rua tuatua mou. Te mea mua, e akamata anga to te “rangi e te enua,” me kore te ao rangi e pini ua ake. Te rua, kua angaia te reira e te Atua.—Apokalupo 4:11.

Kare te Pipiria i akakite mai ana e i naea te Atua i anga ai i te ao rangi e pini ua ake, e akapeea aia te rave anga i te reira. Inara kua akakite mai te Pipiria e kua anga aia i te ao rangi e pini ua ake na roto i tona “ririnui, e te mana maata.”—Isaia 40:26.

Te tuatua “anga” kua uriia te reira mei te verepa Epera no te akatutu i tetai angaanga ta te Atua i rave. a I roto i te Pipiria, ko te Atua ko Iehova b anake tei karangaia e ko Tei Anga.—Isaia 42:5; 45:18.

Aerenga manako o Genese 1:1

Te akakite maira teia irava mua o te puka o Genese i te au mea tei angaia i roto ia Genese pene 1 e te 2. Mei ia Genese 1:1 ki te 2:4, te akakite maira te Pipiria i te au takainga ta te Atua i rave no te anga i te enua e te au mea ora i reira, kapiti mai te tane e te vaine mua. I muri ake i teia, kua akakite maata mai te Pipiria i te anga angaia ra te tane e te vaine.—Genese 2:7-25.

Kua akatutu mai a Genese i ta te Atua i anga i roto i te ono “rā.” Kare teia i te 24 ora i te rā, mari ra e au tuatau teia kare i akatakaia mai. Te aiteanga o te tuatua “rā” e au tuatau te reira kare i te 24 ora. Kua akakite mai a Genese 2:4, e kua taangaangaia te “rā” mei te “tuatau” e kua anga te Atua i roto i te ono rā mei te mea kua tupu te reira i roto i te okotai “rā.”

Manako tarevake no Genese 1:1

Manako tarevake: Kua anga te Atua i te ao rangi e pini ua ake i tetai au tauatini mataiti i topa ake nei.

Te tika: Kare te Pipiria i akakite mai ana e i naea te ao rangi e pini ua ake i angaia ai. Kare a Genese 1:1 e patoi ana i ta te aronga kimikimi e karanga ra e e au pirioni ua atu mataiti te roa c o te ao rangi e pini ua ake.

Manako tarevake: Akaari maira a Genese 1:1 e e Toru Tai te Atua no te mea te tuatua Epera “te Atua” i roto i teia irava e tuatua tua-tini ïa.

Te tika: Te taoonga “te Atua” tei uriia mei te tuatua Epera ’Elo·himʹ, e tuatua tuatini ïa, koia oki e ngateitei me kore e meitaki rava, kare ko te numero o te tangata. Karanga te New Catholic Encyclopedia i te tuatua tuatini ’Elo·himʹ i roto ia Genese 1:1 e “e verepa tua-tai te reira, te akataka maira e . . . e tuatua tua-tini ïa no te tu meitaki rava, kare ko te numero.”—Second Edition, Volume 6, kapi 272.

E tatau ia Genese pene 1 i roto i te study edition o te New World Translation of the Holy Scriptures e te au akamārama anga tuatua rikiriki e te kimikimianga.

a Akakite te HCSB Study Bible e: “Me taangaangaia teia verepa Epera bara’, te aiteanga ‘kia anga,’ kare te tangata e rave i teia. Te aiteanga o te bara’ e angaanga te reira na te Atua anake.”— Kapi 7.

b Ko Iehova te ingoa o te Atua.—Salamo 83:18.

c No te tuatau o te tuatua Epera tei uriia “i muatangaana,” kua akakite The Expositor’s Bible Commentary e: “Kare teia tuatua i akataka mai ana i te roa me kore te taime o te tuatau.”—Revised Edition, Volume I, kapi 51.