AKAMĀRAMAIA TE AU IRAVA PIPIRIA
Ieremia 29:11—“Kua Kite Oki Au i te au Akakoro Anga Taku i Akakoro ia Kotou Nei”
“Kua kite oki au i te au akakoro anga taku i akakoro ia kotou nei, te tuatua mairā Iehova, a e akakoro anga au ïa, kare to te kino, kia oronga atu au ia kotou i te openga ta kotou i manako ra.”—Ieremia 29:11, Te Bibilia Tapu Ra.
Aiteanga o Ieremia 29:11
Kua taputou mai te Atua ko Iehova ki tona iti tangata tei akamori iaia e e akakoro anga ʼau tana i akakoro no ratou. Noatu kua tataia te reira no te iti tangata i taito, te vai nei rai teia au tuatua na te Atua. Koia ‘te Atua o te irinakianga.’ (Roma 15:13) Te tika, kua tata aia i teia au taputou ki roto i te Pipiria “kia rauka to tatou tatari anga” no tetai oraanga meitaki a te tuatau ki mua.—Roma 15:4.
Aerenga manako o Ieremia 29:11
E tuanga teia au tuatua i roto i tetai reta tei tukuia ki te ngati Iseraela i Babulonia, tei apainaia mei Ierusalema ei tuikaa. b (Ieremia 29:1) Kua akakite te Atua e ka vai ua ratou ei tuikaa no tetai tuatau roa e e patu i to ratou are, e tanu i te kai, e e uanga. (Ieremia 29:4-9) Karanga katoa te Atua: “Kia ope nga mataiti e itu ngauru i Babulonia ra, e atoro atu ei au ia kotou, e e akatupu au i taku tuatua meitaki ia kotou i reira, i te akaoki anga mai ia kotou ki teianei ngai [i Ierusalema].” (Ieremia 29:10) Kua akakite te Atua e kare rava aia e akangaropoina ia ratou e kua papu to ratou irinakianga e ka oki ratou ki te ipukarea.—Ieremia 31:16, 17.
Kua akono te Atua i tana taputou ki te ngati Iseraela. Mei tana i totou, kua autuia a Babulonia e te Ariki ko Kuro o Peresia. (Isaia 45:1, 2; Ieremia 51:30-32) I muri akera, kua akatika a Kuro i te ngati Iuda kia oki ki to ratou ipukarea. I muri ake i te 70 mataiti ei tuikaa, kua oki ratou ki Ierusalema.—2 Paraleipomeno 36:20-23; Ezera 3:1.
Te akapumaana maira te taputou o Ieremia 29:11 i te aronga te irinaki ra i te au taputou a te Atua i teia rā. E ka tupu te ʼau i te ao katoa na roto i te Patireia o te Atua i raro ake ia Iesu Mesia.—Salamo 37:10, 11, 29; Isaia 55:11; Mataio 6:10.
Manako tarevake no Ieremia 29:11
Manako tarevake: E “akakoro anga” to te Atua no te tangata tataki tai.
Te tika: E tuku ana te Atua na te tangata uaorai e iki i ta ratou ka rave. Kua orongaia tana au tuatua ia Ieremiah 29:11 ki te ngati Iseraela i Babulonia ei pupu, e e okotai ona manako no te reira pupu—kia rauka tetai oraanga ʼau. (Ieremia 29:4) Inara, kua tuku ua te Atua i te tangata tataki tai kia iki kia puapingaia mei Tana taputou e me kare. (Deuteronomi 30:19, 20; Ieremia 29:32) Te aronga tei iki kia aru i te Atua kua pure ratou kiaia ma te ngakau tae.—Ieremia 29:12, 13.
Manako tarevake: Ka akapuapinga te Atua i te aronga tei akamori iaia ki te au apinganui.
Te tika: Te tuatua “akakoro” i roto i tetai au Pipiria ia Ieremia 29:11 kua uriia mei te tuatua Epera te aiteanga “ʼau, oraanga meitaki, e te turanga meitaki.” I roto i te aerenga manako, kua taputou te Atua kia oronga i te ʼau e te oraanga meitaki ki te ngati Iseraela tuikaa kare i te apinganui. Ka noo ua ratou ki reira e tae ua atu ki te taime me oki ratou ki Ierusalema.—Ieremia 29:4-10.
E tatau ia Ieremia pene 29 i roto i te study edition o te New World Translation of the Holy Scriptures e te au akamāramaanga tuatua rikiriki e te kimikimianga.
a Ko Iehova te ingoa o te Atua.—Salamo 83:18.
b No runga ia Ieremia 29:11, akakite The Expositor’s Bible Commentary e: “Kare e kitea tetai taputou meitaki rava atu i teia i roto i te Tuatua Tapu tei akaari i to Yahweh [Iehova] tu tangi aroa no teia aronga tuikaa ma te oronga kia ratou, te tumu anga kia manako meitaki e kia irinaki i te reira.”—Volume 7, kapi 360.
Ka Reka Katoa Koe i Teia
ESSENTIAL BIBLE TEACHINGS
Eaa te Patireia o te Atua?
Roto i ta Iesu angaanga orometua, kua apii aia no runga i te Patireia o te Atua. No tetai au anere mataiti, kua pure tana au pipi no teia Patireia kia tae mai.
APIIANGA PIPIRIA
Tauturu Apii Pipiria
Iki i te au tauturu apii Pipiria ei akameitaki atu i taau apii e te akamaroiroi ia koe.
APIIANGA PIPIRIA
Tamata i ta Matou Apii Pipiria
Āriki i tetai uriurianga apii Pipiria naau anake kare e tutaki ma te puapii.
