“I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioane 3:16, Te Bibilia Tapu Ra.

 I aroa mai te Atua ia tatou e te inangaro ra kia ora tatou e tuatau ua atu. No reira aia i tono mai ei i tana Tamaiti, ia Iesu Karaiti ki te enua nei. Kua rave a Iesu i te au angaanga puapinga iaia i te enua nei. Teia tetai, kua apii aia ki tana au pipi i tona Atua e te Metua. (1 Petero 1:3) Tera tetai, kua oronga aia i tona oraanga no te au tangata ravarai. Kia rauka te ora mutu kore, ka anoanoia kia akarongo tatou ia Iesu.

 Kua akaariia mai to te Atua aroa maata ma teia au tuatua, “te oronga anga mai [aia] i tana Tamaiti anau tai.” a Ko Iesu te Tamaiti umere tikai a te Atua. Akapeea ra? Ko Iesu tikai tei angaia e te Atua. (Kolosa 1:17) E “ko te Tama mua aia o te au mea ravarai i angaia ra.” (Kolosa 1:15) Na roto ia Iesu i angaia ai te au mea ora katoatoa, e te au angera. No reira te Atua ko Iehova b i tono mai ei i tana Tamaiti akaperepere kia “tavini ra, e kia oronga i tona ora ei oko no te tangata e manganui.” (Mataio 20:28) Kua mamae e kua mate a Iesu ei tatara mai ia tatou mei te ara e te mate, ta te tangata mua ko Adamu i tuku mai ki runga ia tatou.​—Roma 5:8, 12.

 Na te akarongo anga ia Iesu, maata atu te ō maira i to te irinaki ua me kore āriki anga i tana i rave no tatou. Akapapu tatou i to tatou akarongo no te Tamaiti a te Atua na te akono e te aru vaitata anga i tona takainga vaevae. (Mataio 7:24-27; 1 Petero 2:21) Karanga te Pipiria: “Ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora.”—Ioane 3:36.

 Kua tuatua a Iesu i taua au tuatua ki tetai orometua akonoanga ngati Iuda ko Nikodemo te ingoa. (Ioane 3:1, 2) Kua akakite a Iesu i te au mea no runga i te Patireia o te Atua c e te “anau akaou.” (Ioane 3:3) Akakite katoa aia e ka mate aia. “Koia katoa te Tamaiti a te tangata ra, kia akateitei katoaia e tikaʼi: Kia kore e mate te akarongo iaia, kia rauka ra te ora mutu kore.” (Ioane 3:14, 15) Kua akakite aia e no te aroa maata o te Atua i rauka ai teia tikaanga ora no te au tangata ravarai. Kua akamārama a Iesu e kia rauka ai te ora, ka anoanoia te akarongo e ka rave tatou i te angaanga te akamareka ra i te Atua.—Ioane 3:17-21.