“Auraka e apiapi i to apopo ra; na apopo e apiapi i tana uaorai. Ko te rā ko tona uaorai kino, oti ra ua ïa.”—Mataio 6:34, Te Bibilia Tapu Ra.

 Kua akapapu a Iesu tei tuatua i teia au tuatua ki te aronga e akarongo maira kiaia e auraka ratou e taitaia me kore e apiapi no te au manamanata te ka tupu a te tuatau ki mua. Mari ra, ka puapingaia ratou na te akakoromaki anga i te au manamanata mei tera rā ki tera rā.

 Kare a Iesu i karanga ana e eiaa tatou e akamanako atu i to apopo me kore e parani no te tuatau ki mua. (Maseli 21:5) Kare, kareka ra, te tauturu nei aia ia tatou kia kore e manamanata, me kore e apiapi, eaa te ka tupu apopo. Penei ka akakore taua taitaia i to tatou rekareka e ka tamanata ia tatou. Kare e rauka ia tatou i te akatikatika i te au turanga ngatā kare i tupu ake me ka manata tatou no runga i te reira. Maata anga o te taime, ta tatou e manata ra penei kare e tupu mai, me kore kare i te mea kino roa me tupu te reira.

 Kua riro teia au tuatua a Iesu ei tuanga no tana Akoanga rongonui i te Maunga, i roto ia Mataio pene 5-7. I roto i tana ako, kua akamārama a Iesu e ko te tu apiapi kare ïa e akameitaki mai me kore e akaroaroa atu i to tatou oraanga. (Mataio 6:27) Kua karanga katoa aia e me tuku tatou i te Atua na mua i roto i to tatou oraanga, kare tatou e apiapi i to apopo. Te akono ra te Atua i te au rakau e te au animara, no reira ka akono katoa aia i te aronga e akamori ra iaia.—Mataio 6:25, 26, 28-33.