“Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”—Philipi 4:6, 7.

 “Auraka e taitaia no runga i te au mea katoatoa, inara i roto i te au turanga ravarai, na roto i te pure e te patianga, ma te akameitakianga, e oronga i ta kotou patianga ki te Atua. E na te au o te Atua, tei maata atu i te au kite mārama e paruru i to kotou ngakau e to kotou manako na roto i te Karaiti ia Iesu.”—Philipi 4:6, 7, New International Version.

 Ka rauka i te aronga e akamori ra i te Atua i te akakite i to ratou manamanata e te taitaia na te pure anga kiaia. Kua taputou mai aia e ka oronga mai aia i te au kia ratou, te ka tauturu ia ratou kia akakoromaki i te taitaia e ka paruru i to ratou manako e te ngakau. Te akataka maira te irava 6 i te au tu o te pure te ka tauturu ia ratou kia rauka te au.

 Te akakite anga e au pure ïa te o maira te pati akatenga. Penei ka akakite tetai tangata ki te Atua me taitaia ratou me kore tei roto ratou i te kino, mei ia Iesu rai. (Ebera 5:7) E oronga putuputuia ana taua au tu pure.

 Ko te pati anga e au patianga taka meitaki ïa ki te Atua. Ka oronga te aronga e akamori ra iaia i te pati anga na roto “i te au mea katoa nei.” Inara, e mea tau kia rotai te reira pure ki to te Atua anoano tei akakiteia i roto i te Pipiria.—1 Ioane 5:14.

 Te au pure akameitaki i te Atua, e akameitaki anga ïa no tana i rave e ka rave no tatou. Me akamou tatou ki te tumu i akameitaki ei tatou i te Atua, ka tauturu te reira ia tatou kia vai mataora ua.—1 Tesalonia 5:16-18.

 Kia pau mai i taua au pure, ka oronga mai te Atua i te au ki te aronga e akamori ra iaia. Te akataka maira “te au o te Atua” i te tu maru te ka akavaitata atu ia tatou kiaia. (Roma 15:13; Philipi 4:9) Ko teia au, e “maata ua atu i te kite tangata” no te mea na te Atua i oronga mai i te reira, te ka tauturu ia tatou.

 Te karanga ra teia irava e ka akamaroiroi te au o te Atua i to tatou ngakau. Te tuatua Ereni i uriia no te “akamaroiroi” e tuatua na te vaeau tei akataka mai i ta tetai pupu vaeau ka rave ei paruru i te oire. Pera katoa, ka paruru te au o te Atua i te ngakau e te manako o tetai tangata. Ka tauturu te reira iaia kia kore e taitaia no tona au manamanata.

 Te au ta te Atua i oronga mai ka riro ei paruru ia tatou na roto “i te Mesia nei ia Iesu,” no te mea na Iesu i akavaitata atu ia tatou ki te Atua. Kua oronga mai a Iesu i tona oraanga ei atinga oko no ta tatou ara. Me akarongo tatou kiaia, ka mataora tatou i ta te Atua akameitakianga. (Ebera 11:6) Na roto katoa ia Iesu e tae ei ta tatou pure ki te Atua. Karanga a Iesu: “Kare ua e tangata e tae ki te Metua ra, mari ra ei iaku.”—Ioane 14:6; 16:23.

 Te puka Pipiria ko Philipi e reta ïa na te apotetoro ko Paulo i tata ki te au Kerititiano i te oire o Philipi. a I roto i te pene 4 o teia puka, kua akamaroiroi a Paulo i te katoatoa i roto i te putuputuanga kia rekareka ua rai, e kua akameitaki ia ratou no to ratou tu oronga ua, tana i rekareka tikai. (Philipi 4:4, 10, 18) Kua akaari mai aia akapeea te pure me akatupu i te au o te Atua, e kua akataka mai i te au manako e te au angaanga tau ka anoanoia kia rauka “te au o te Atua.”—Philipi 4:8, 9.