AKAMĀRAMAIA TE AU IRAVA PIPIRIA

Roma 10:13—“Kapiki i te Ingoa o te Atu”

AKATANGI

“Ko te katoatoa tei kapiki i te ingoa o Iehova ka ora ia.”—Roma 10:13, New World Translation.

“Ko te kapiki i te ingoa o te Atu ra, e ora ïa.”—Roma 10:13, Te Bibilia Tapu Ra.

Aiteanga o Roma 10:13

Kare te Atua e papakitai ana, e te anoano nei aia i te tangata katoatoa kia ora e kia rauka te ora mutu kore, noatu te enua, te kara, e te turanga. Inara, ka anoanoia tatou kia kapiki i te ingoa o Iehova, te ingoa tikai o te Atua Mana Katoatoa. a—Salamo 83:18.

I roto i te Pipiria, kia “kapiki i te ingoa o Iehova” e maata atu tona aiteanga i te kite ua i tona ingoa e te taangaanga i te reira ki roto i te akamorianga. (Salamo 116:12-14) Te kapiti maira te irinakianga i te Atua e kia pati i tana tauturu.—Salamo 20:7; 99:6.

E mea puapinga kia Iesu Karaiti to te Atua ingoa. Kua tuatua aia i roto i tana pure: “E to matou Metua i te ao ra, Kia tapu toou ingoa.” (Mataio 6:9) Kua akaari katoa mai a Iesu e kia kite, kia akarongo, e kia akaperepere tatou ia Iehova kia rauka te ora mutu kore.—Ioane 17:3, 6, 26.

Eaa tatou ka karanga ai e ko Iehova “te Atu” tei taikuia ia Roma 10:13 i roto i Te Bibilia Tapu Ra? No te mea kua taiku teia irava ia Ioela 2:32, tei reira to te Atua ingoa, i te reo Epera b mua e kare i te taoonga “te Atu.”

Aerenga manako o Roma 10:13

I roto ia Roma pene 10, te akaari maira te Pipiria e ka rauka tetai turanga meitaki ki te Atua me akarongo tatou kia Iesu Karaiti. (Roma 10:9) Kua turuia teia i roto i te au irava tei matauia ko te Koreromotu Taito. Ka akaari tetai tangata i tona akarongo na roto i “te vaa oki tei aaki i te tuatua,” koia oki te tutu aere i te nuti meitaki no te ora ki te aronga kare e irinaki. I reira e rauka ai ia ratou te akarongo e kia ora.—Roma 10:10, 14, 15, 17.

E tatau ia Roma pene 10 i roto i te study edition o te New World Translation of the Holy Scriptures e te au akamārama anga tuatua rikiriki e te kimikimianga.

a E 7,000 taime to te Atua ingoa i roto i te au tataanga Pipiria taito. I te reo Epera, e a reta o teia ingoa tapu, tei karangaia ko te Tetragrammaton. Ko “Iehova” te ingoa tei matauia i te reo Rarotonga; inara, e reka ana tetai aronga apiipii i te ingoa “Yahweh.”

b Papu kua taiku te au Kerititiano tata Pipiria i te ingoa o te Atua i roto i te au irava “Koreromotu Taito.” Akakite The Anchor Bible Dictionary e: “E tika te vaira te Tetragrammaton, te Ingoa Tapu, te Yahweh, i roto i tetai me kore te katoa anga o te au irava K[oreromotu] T[aito] i roto i te K[oreromotu] O[u] i te tata anga mua o te KO.” (Volume 6, kapi 392) Kia kite maata atu, akara “The Divine Name in the Christian Greek Scriptures” i roto i te Appendix A5 o te study edition o te New World Translation of the Holy Scriptures. E au urianga Pipiria to roto i te Appendix C2 tei taangaanga i te ingoa tapu i roto ia Roma 10:13.