Ko Virginia tetai o te Au Kite o Iehova tei tuia e te maki locked-in syndrome. Kua akangoru tona kopapa. Ka rauka iaia i te akara e te akarongo, te topiri e te akapuera i tona mata, e te akaneke i tona upoko. Kare ra e rauka i te tuatua e te kaikai. E tu matutu e te maroiroi tona kopapa i mua ana. Inara i te 1997, kua tupu te mamae maata e te putuputu i muri i tona upoko. Apai atu tana tane iaia ki te are maki, e i taua po ra, kua moe aia i roto i te coma. Kua āra mai aia e rua epetoma i muri mai e kua akangoru tona kopapa e te akaea ra aia na roto i te matini. No tetai nga rā, kare e maara iaia eaa tei tupu e pera tona ingoa.

 Akamārama mai a Virginia eaa tei tupu i muri mai. “Aere ua rai, kua maara iaku te au mea katoa. Kua pure putuputu au. Kare au i inangaro kia mate e te akaruke i taku tamaiti meangiti. Ei akamaroiroi iaku, kua tauta au i te akamaara i tetai au irava.

 “Muri mai, kua neke te au taote iaku ki vao mei te pia no te aronga maki kino. Te pou anga e ono marama iaku i roto i te au are maki e te ngai rapakauanga, kua oki atu au ki te kainga. Kua akangoru takiri toku kopapa, e ka anoano au i te tauturu a tetai ke. Taitaia tikai au! Manako mai au e kare oku puapinga ki tetai ke e kia Iehova. Manata katoa au e kare e rauka iaku i te utuutu i taku tamaiti.

 “Akamata au i te tatau i te au tua oraanga o tetai Au Kite tei aite to ratou turanga ki toku, e kua poitirere i te kite anga i ta ratou i rauka i te rave no Iehova. Tei tupu, kua tauta au i te akamou i toku manako ki runga i taku ka rauka i te rave. I mua ake ka maki ei au, kare oku taime no te au angaanga pae vaerua. Teianei, ka rave au i te reira i te au rā ravarai. Ka akapou au i toku taime no Iehova, e kare e noo taitaia ua.

 “Kua apii au i te taangaanga i te komupiuta. Ka taomi au i te au pitopito na roto i tetai porokaramu me akaneke au i toku upoko. E angaanga roiroi teia, inara na roto i teia technology, kua rauka iaku te apii i te Pipiria e te akakite i toku manakonakoanga ki tetai ke na roto i te reta e te imere. E papa ara reta taku no te karangaranga ki tetai ke. Ka toʼu mai ratou i te au reta kiaku. Me tarevake te reta, ka puera maata toku nga mata; me tano te reta, ka kamo au i toku mata. Ka taokiokiia teia au takainga kia rauka te au aerenga tuatua. Kua tukatau tetai au tuaine tei akapou i to ratou taime kiaku, i te kite eaa taku e manako ra. Tetai taime, me tarevake te tuatua, ka kata matou.

 “E reka ana au i te rave i te au angaanga a te putuputuanga. Ka tae au ki te au uipaanga na roto i te vitio karangaranga. Ka tata au i taku pauanga, e ka tatau tetai taeake i te reira i te tuanga no te uianga e te pauanga. Pera katoa, ka akara kapiti matou ko tetai Au Kite i te porokaramu JW Broadcasting i te au marama. *

 “E 23 mataiti i teianei toku maki locked-in syndrome. I tetai taime, ka tupu te maromaroa kiaku. Ka rauka ra iaku i te akakoromaki na te pure anga, te kapiti anga ki te au taeake, e te rave maroiroi i te angaanga pae vaerua. Te tika, ma te tauturu a te putuputuanga, kua rauka iaku i te painia tauturu e ono mataiti i teianei. Kua tauta au i te akanoo i te akaraanga meitaki no taku tamaiti ko Alessandro, kua akaipoipo i teianei e te tavini ra ei tangata pakari. Te tavini katoa ra aia e tana vaine ei painia tamou.

 “E akamanako oonu ana au i taku ka rauka i te rave i roto i te enua parataito. Mea mua, ka inangaro au i te tuatua no runga ia Iehova ma toku uaorai reo. Ka inangaro au i te aaere na te pae kauvai e kia kite i te manea o te reira. E no te mea e 20 mataiti toku kaikai anga na roto i tetai kiri, ka inangaro au i te aaki i tetai apara e te kakati i te reira. E no te mea no Itaria mai au, ka inangaro katoa au i te maani e te kai i taku au kai reka no Itaria mai, pera katoa te pizza!

 “Kua riro te ‘manako ora’ ei paruru i toku aerenga manako. (1 Tesalonia 5:8) Me akamanako au iaku uaorai i roto i te ao ou, ka akatupu te reira i te rekareka maata noatu toku maki, ma te irinaki e kare e roa atu ka akakoreia toku maki. Ae, te tapapa nei au i ‘te ora mutu kore’ ta Iehova i taputou mai no tatou na roto i tona Patireia.”—1 Timoteo 6:19; Mataio 6:9, 10.