Rekareka a Madián e Marcela i tetai oraanga meitaki i Medellín, Colombia. E moni meitaki ta Madián mei tana ngai angaanga, e kua rauka ia raua te noo ki roto i tetai apatimani manea. Inara kua akakeu tetai apinga ia raua kia akara akaou i to raua oraanga ei nga tavini no te Atua ko Iehova. “I te 2006 kua aere maua ki te akaputuputuanga takake ‘Kia Akono Meitaki i Toou Mata.’ E maata te au ako tei orongaia kia akamāmā tatou i to tatou oraanga no te tavini maata atu i te Atua,” i na raua ei. “Ia maua e akaruke ra i te akaputuputuanga, kite mai maua e e mea ke ta maua e rave ra. E aronga oko maata maua i te apinga e e aka kaiou ta maua.”

 I muri ake i teia akakeu anga i te pae vaerua, kua akamata a Madián e Marcela i te akamāmā i to raua oraanga. “Kua akameangiti mai maua i ta maua oko apinga,” i na raua ei. “Kua neke maua ki tetai apatimani meangiti, kua oko i to maua motoka, e kua oko mai i te patikara matini.” Kua akamutu katoa raua i te aere ki te au shopping mall te ngai e timataia ana raua te oko apinga. Kua akamata raua i te akapou i tetai tuatau no te tuatua ki te tangata i te pae mai no runga i te Pipiria. E kua piri raua ki te au oa te maroiroi ra i te tavini i te Atua ko Iehova ei nga painia takake. *

 Kare i roa, kua inangaro a Madián e Marcela i te akamaata atu i ta raua angaanga tutu aere na te neke anga ki tetai manga putuputuanga tei anoano i te tauturu i vao i te oire. E rauka ai ia raua, kua akaruke a Madián i tana ngai angaanga. Kua manako tona pu e kua nenevaia aia. Kua akamārama atu a Madián kiaia, te uianga: “E maata taau moni e koi ana, te mataora ra ainei koe?” Akakite mai aia kare, no te mea e maata tona au manamanata kare e rauka i te rapakau. Karanga atu aia kiaia: “Kare i reira e eaa te maata o taau moni e koi ra. Inara eaa te ka akarekareka tikai ia koe. Na te apiianga i te tangata no runga i te Atua, te mataora nei maua ko taku vaine, e te inangaro nei maua kia mataora atu na te akapou maata anga i te taime ki teia angaanga.”

 Kua kitea e Madián e Marcela te oraanga merengo e te mataora na te aruaru anga i te au akakoroanga pae vaerua. No te 13 mataiti i topa, kua tavini raua i te au putuputuanga te anoano ra i te tauturu i te tua tokerau opunga o Colombia. E te rekareka nei raua i te akameitakianga ei nga painia takake.