“Kare rava au i manako ana e ka rauka iaku i te tavini pu tikai ia Iehova.” I karanga ai a Gwen, no England mai, te akakite anga mai i tona manako i te tavini anga ki te au ngai te anoano maataia ra te tauturu i Albania. *

 Ko Gwen tetai o te Au Kite e manganui tei neke ki Albania no te tauturu i te akaputu mai i “tei inangaroia e te au enua katoa ra.” (Hagai 2:7) Eaa ra tei akakeu i teia aronga tutu evangeria? Eaa te au mea ka anoanoia ratou kia akatanotano e rauka ai ia ratou te neke ki reira? E eaa te au tupu anga mataora tei tauturu ia ratou kia rave ua rai i te angaanga noatu te au turanga ngatā?

 Pouroa te au papuritia tei neke mai i te tauturu i Albania e okotai o ratou anoano: Akaperepere ratou ia Iehova e te inangaro ra i te tauturu i tetai kia kite iaia.

 I mua ake ka neke ei, kua rave ratou i te ka rauka no te akamaata i ta ratou angaanga tutu aere, e kua riro teia ei tauturu ia ratou me tupu mai te au timataanga i te enua ke te tavini ra ratou. Karanga mai a Gwen e: “Mea mua kua piri atu au ki tetai pupu reo Albania i roto i toku oire. Aru mai kua aere atu au ki Albania no tetai uruoaanga. I muri mai kua oki akaou au ki reira i te tamou tikai i te reo.”

 I tona 23 mataiti kua neke atu a Manuela ki tetai mai ngai o tona enua i Itaria, i te tauturu i tetai putuputuanga meangiti. Karanga mai aia: “Kua tavini au i reira e a mataiti. E oti kua kite mai au e te anoanoia ra te tauturu i Albania. No reira kua aere atu au ki reira i te painia no tetai mai au marama.”

 E itu o Federica mataiti i tona kite anga i te au ripoti mei Albania mai i ko i tetai uruoaanga. Karanga mai aia: “Akakite mai te taeake e oronga ra i te ripoti no te au papuritia i Albania e kua rauka ia ratou i te akamata i te au apii Pipiria e manganui e kua aere mai te aronga tei inangaro ki te au uipaanga. Kua akakite atu au ki toku nga metua e kua inangaro au i te aere ki Albania. Poitirere tikai raua i toku inangaro i te rave i te reira, kua karanga mai a tati, ‘E pure i te reira, me e anoano no Iehova, ka akarongo mai aia.’ I nga mārama i muri mai, kua patiia mai matou ei ngutuare tangata kia tavini i Albania!” E maata te au mataiti i aereia mai, kua akaipoipo a Federica ia Orges i teianei. Te tavini kapiti nei raua ei nga orometua tamou i Albania.

 I te ritae anga a Gianpiero mei tana angaanga, kua neke atu raua ko tana vaine ko Gloria ki Albania. Karanga mai aia: “Kua utuutu mai maua i ta maua au tamariki tamaroa i Itaria. Kua neke atu ratou e toru ki te au ngai te anoanoia ra te tauturu. Kua pakia to maua ngakau e teia Punanga Tiaki ‘Ka Rauka ia Koe te Ano Atu ki Makedonia?’ Kua noo maua ki raro e kua akara meitaki ka akapeea maua me taangaanga meitaki i taku moni pakari kia rauka i te tavini i Albania.”

 Ka anoanoia te aronga tei neke ki te ngai te anoanoia ra te tauturu kia parani meitaki i mua ake e te rave i te au mea tei anoanoia no te neke anga ki reira. (Luka 14:28) Ko tetai mea kia akamanako, ka akapeea ratou me akono ia ratou i reira. Iaia i England, ko Gwen, tei taikuia mai i mua ana, kua neke aia ki te kainga o tona tuakana kia rauka iaia i te akaputu i tana moni. Maara ia Sophia raua ko Christopher, no England mai, e: “Kua oko maua i to maua motoka e tetai apinga o te are. Kua inangaro maua i te noo ki Albania no tetai mataiti.” Ma te mataora kua rauka ia raua i te noo ki reira no tetai tuatau roa.

 Kua noo tetai au papuritia ki Albania no tetai au marama, e oti kua oki ki to ratou enua anau i te angaanga e te akaputu i ta ratou moni e kua oki akaou ki Albania. Kua tupu teia kia Eliseo e Miriam. Akamārama mai a Eliseo: “I noo ana a Miriam i roto i tetai oire e maata te aronga turoto i Itaria, ka māmā ua i te kimi i tetai angaanga i reira. Ka oki maua ki reira e ka angaanga e toru mārama i te tuatau maana e oti kua oki akaou ki Albania no tetai iva mārama kua rauka te reira no ta maua moni akaputu. Kua rave maua i teia e rima mataiti.”

 Muri mai i te neke anga, ka akatanotano te aronga tei aere i te tauturu i to ratou oraanga ou, kua riro te akoanga e te akaraanga o te Au Kite i reira i te tauturu ia ratou kia akakoromaki i te au turanga ngatā. Karanga mai a Sophia, tei taikuia i mua ana e: “I te tuatau anu i Albania, e anu kino te au are mei taku i mātau i toku enua anau. Kua kite mai au i te aao kakau kia tau ki te reira ngai na te akara anga i te au kakau o te au tuaine i reira.” No Poland mai a Grzegorz e tana vaine ko Sona, te neke anga raua i te tauturu i te au taeake i te oire manea ko Prizren, i Kosovo. * Akakite mai a Grzegorz e: “E tu akaaka tikai to te au papuritia i konei, te aroa takinga meitaki e te tamou marie! Te tauturu nei ratou ia maua kia apii i te reo e te vai atura. Ei akaraanga, ka akakite mai ratou i te au are toa mama, e kua akamārama mai ratou akapeea me oko i te au apinga i ko i te makete.”

 Ko te aronga tei neke ki tetai enua ke ka puapinga ratou mei tetai pirianga oa ki te Au Kite i reira e te kite katoa no runga i to ratou oraanga. Akamārama mai a Sona e: “Kua kite ana au i te ririnui i te aroa o Iehova. Kua akamatutu mai te au taeake i toku akarongo kua kite ana au ia ratou i te akaruke i to ratou irinaki o mua ana e to ratou oraanga no te apii no runga ia Iehova. I roto i te putuputuanga, kua kite matou e te inangaroia ra matou, e kua kite katoa akapeea matou me tauturu atu. Te tavini nei matou i te pae i te au taeake e te au tuaine tei riro mai ei au oa no matou.” (Mareko 10:29, 30) Karanga mai a Gloria e: “E maata taku au tuaine i kite mai tei akakoromaki i te au turanga kino mei to ratou kopu tangata tei patoi i te Au Kite. Pakia tikai toku ngakau i te kite i to ratou inangaro ia Iehova.”

 Ka rauka katoa i te aronga tei aere ki te ngai te anoano ra i te tauturu i te apii mai i te au apiianga puapinga penei kare i tupu ana kia ratou. Ei akaraanga, te aere anga ki tetai ngai kare i matauia e ratou kia tavini pu tikai ia Iehova kua akatupu i te mataora kia ratou. Karanga mai a Stefano e: “I toku enua anau, ka tutu aere au na te taangaanga anga i te intercom, ma te tapoto i taku ka tuatua. Kareka ra te iti tangata Albania e reka ana ratou i te tuatua, me inu kaope tikai. No toku tu, kua akamā au i te akamata anga, kare au e kite e eaa taku ka tuatua. I muri roa maira, kua rauka iaku i te akarongo ki to ratou manako e te pukapuka no te reira, teianei e reka ana au i te pukapuka kia ratou. Mareka tikai au i te rave i taku angaanga tutu aere.”

 Kua neke atu a Leah raua ko tana tane ko William ki Albania mei Marike mai. Karanga mai aia: “Te tavini anga i konei kua rauka ia maua i te taui i to maua aerenga manako e te āriki i te au mea ou. E maata ta maua i kite mai no runga i te aroa taeake, te tu akangateitei, e te pirianga oa! Kite mai maua i te ravenga tukeke me tutu aere, mei te akamārama anga i te au Irava, e te tuatua ua i te reira.” Akakite mai a William e: “Ko te maata anga o te tangata e aere mai ana ki Albania e reka ana ratou i te ngai taatai manea. E reka ana au i te aaere i te Albanian Alps. Inara ko te au tangata taku e mataora ana i teia ngai! E poto te tuatau me pukapuka ki te aronga o te reira ngai i te tuatau o te angaanga takake. Me aere maua ki reira, ka pou ia maua te rā katoa i te tuatua ki te au ngutuare tangata.”

 Rauka te rekareka i teia aronga tei aere ki te ngai te anoano ra i te tauturu me ariu mai te tangata ki te nuti meitaki. (1 Tesalonia 2:19, 20) Akakite mai a Laura, tei neke ki Albania ei mapu tuaine i tetai akaraanga: “Kua tavini au no tetai tuatau i Fier. I roto i te rua e te apa mataiti, kua rauka e 120 aronga ou tei tau kia tutu aere! Kua apii au e 16 ia ratou!” Maara i tetai tuaine ko Sandra e: “Kua tutu aere au ki tetai vaine e angaanga ra i ko i te makete. Kua riro mai aia ei tuaine e kua oki ki tona vira. Toku tuatua openga anga kiaia, kua akamata aia e 15 apii Pipiria!”

 Ko tetai aronga tei aere i te tauturu e kua neke ki Albania tei reira rai e te mataora nei rai i te rave i ta ratou angaanga. Umere tikai ratou i te kite e kua puapinga ta ratou angaanga mei te taime mua mai i tutu aere ei ratou. (Koheleta 11:6) Akakite mai a Christopher, tei taikuia i mua ana e: “Kua aravei au i tetai tangata tei apii ana maua i te Pipiria i toku neke mua anga ki Albania. Pakia toku ngakau i te akakite anga mai aia i ta maua i uriuri ana no runga i te Pipiria. Teianei kua papetitoia raua ko tana vaine ei nga tavini no Iehova.” Tuatua mai a Federica, tei taikuia i mua ana e: “I roto i tetai putuputuanga, kua aravei mai tetai tuaine iaku e kua ui mai me kua maara au iaia. Akakite mai aia e kua tutu aere ana au kiaia e iva mataiti i mua ana. No tetai tuatau kua neke au ki tetai oire ke mai, kua apii aia i te Pipiria e kua papetitoia. I manako ana au i to matou taime mua i Albania kare i tupu ana te meitaki. Kua tarevake tikai au!”

 Mareka tikai te au taeake e te au tuaine tei neke ki Albania me kore ki Kosovo i te kite e kua akameitaki a Iehova i ta ratou angaanga e kua tupu mai te meitaki. I muri mai i nga mataiti i Albania, karanga mai a Eliseo no tona oraanga, e: “Ei au tangata, ka ngoie ua ia tatou i te akavareia e ka rauka te turanga tinamou mei teianei ao. Inara kare i te mea tika. I tetai tua, te oronga maira ta Iehova au kaveinga, i te turanga tinamou ma te puapinga. Tauturu maira taku e rave nei kia akamaara au i te reira. Kua taangaanga meitakiia au e ma te mareka tikai. E au oa mou toku ma te okotai akakoroanga.” Āriki katoa a Sandra: “I toku neke anga ki te ngai te anoanoia ra te tauturu, kua irinaki au e kua oronga mai a Iehova i te tika anga manea kia akatupu au i toku anoano—kia riro mai ei mitinari. Kare rava au i tataraara ana no te neke anga ki Albania. Mataora tikai au.”