Kua maata mai au i roto i tetai ngutuare tangata putaua, i te oire maata ko Tiranë i Albania. Kua angaanga pakari toku papa i te akono ia matou. Noatu ra, kare e rava ana ta matou moni. I toku meangiti anga, kua mārama au e e aronga putaua matou. Te maataanga o te taime kare oku tamaka e kare e rava ana te kai.

 I toku meangiti anga, kua akamata au i te keikeia. Kua manako au e te tauturu ra au i toku ngutuare. I muri mai, kua mou au i te akava. I te mataiti 1988, te tae anga au ki te 14 mataiti, kua apai taku papa iaku ki tetai apii ou. E rua mataiti iaku i reira, e kua apii au i te angaanga tupaki auri. Te akarukeanga au, kua kimi au i tetai ngai angaanga inara kare i rauka ana. Kare e rava ana te angaanga no te mea kare e mako ana te turanga o te kavamani i Albania. Kua riri au i teia e kua akamata akaou i te keikeia. Aere ua rai, kua mou matou i te akava, e kua tiria ki roto i te are auri no tetai toru mataiti.

 Te tukuia anga au ki vao, kua akamata akaou au i te keia. Kua kino takiri te turanga o te kavamani i te pae moni, e kua kino atu te turanga i Albania. I tera tuatau rikarika, e maata taku moni i keia. I muri mai kua mou toku nga oa keikeia i te akava, inara kua oro au ki tetai enua ke kia kore au e tiria ki roto i te are auri no tetai tuatau roa. I taua tuatau, e pepe tamaroa ta maua ko taku vaine ko Julinda.

 Kua tae atu matou ki Peritane. Kua inangaro tikai au i te akamata i tetai oraanga ou no taku vaine e taku tamaiti, inara kare e rauka iaku i te akamutu i taku au angaanga tarevake. Kare i roa ana, kua akamata akaou au i te rave kino—teia taime, ko te oko i te au mea akakona, e e maata taku moni i rauka mai.

 Eaa to Julinda manako no te reira apinga akakona? Nana e akakite atu: “Mei toku meangiti anga i Albania, kua inangaro au i te taui i toku turanga putaua. Ka rave au i tetai ua atu apinga kia rauka mai tetai oraanga meitaki. Kua manako au e ka akameitaki atu te moni i to matou oraanga, no reira kua turuturu au ia Artan i te pikikaa, keikeia, e te oko apinga akakona—tetai ua atu apinga kia rauka mai te moni.”

 I te mataiti 2002, kua taui to matou oraanga. Kua mou au i te akava e kua tiria ki roto i te are auri no te oko i te apinga akakona.

 Kua akamata takere te Pipiria i te taui i toku oraanga. I te mataiti 2000, kua akamata a Julinda i te apii i te Pipiria ma te Au Kite o Iehova. Kare au i inangaro i te apii i te Pipiria, no te mea manako au e angaanga maromaroa oki te reira. Inara, kua reka a Julinda i tana apii. Karanga aia: “No roto mai au i tetai ngutuare akamori Atua, e e akangateitei ana au i te Pipiria. E inangaro ua ana au i te apii i te Pipiria, no reira kua mataora au i te apii ma te Au Kite. Taka meitaki ua te au mea taku i apii i roto i te Pipiria. Kua akakeu teia iaku kia rave i te au tauianga i roto i toku oraanga. Kare toku tu no runga i te moni i taui ana—inara kia tae ki te taime i mou ei a Artan i te akava i taui ei toku manako. Kua tauturu te reira iaku kia kite e e tika ta te Pipiria i tuatua no runga i te moni. Kua aruaru maua kia monimoni mai inara, kare te reira i apai mai i te mataora. Kua kite mai au e ka anoanoia au kia aru meitaki i te au turanga ta te Atua i akanoo.”

 I te mataiti 2004, kua tukuia au mei te are auri, e kua tamata au i te oko akaou i te apinga akakona. Inara, kua taui te tu o Julinda, e kua tuatua aia i tetai apinga tei taui i toku manako: “Kare au e inangaro akaou i taau moni. Inangaro au i taku tane, e inangaro au i te papa o taku tamariki kia noo mai ki te pae ia ratou.” Kua poitirere au, inara te tano ua ra tana. Maata te au mataiti kare au e noo ana i te pae ia ratou. Kua akamanako katoa au i te mamae tei tupu no taku angaanga keia moni. No reira kua iki au i te taui i toku tu e kia akaruke i toku au oa rave kino.

 Kua tukia toku ngakau te aere anga maua ko taku vaine e ta maua nga tamaroa ki te uipaanga a te Au Kite o Iehova. Kua mareka tikai au i te au taeake oaoa taku i aravei. I muri mai, kua apii au i te Pipiria.

 Kua kite mai au i roto i te Pipiria e “ko te anoano maata oki i te moni te tumu o te au kino katoa nei . . . i te umuumu anga i te reira, e kua ko mama rava ia ratou uaorai i te iriea e manganui.” (1 Timoteo 6:9, 10) Kua mārama meitaki au i te tika o teia irava! Kua tataraara au no te au mea tarevake taku i rave i mua ana, e te mamae ta te reira i akatupu kiaku e toku ngutuare tangata. (Galatia 6:7) Te apii anga au no runga i to Iehova e to Iesu aroa no tatou, kua taui au i toku tu. Kua akamata au i te akamanako atu i tetai ke e kare ko au ua, e kua akapou au i te taime ki toku ngutuare.

 Kua puapingaia au na te aruanga i te ako a te Pipiria: “Ei noo anga noinoi kore i te apinga to kotou; kia mareka i ta kotou i rauka ra.” (Ebera 13:5) I teianei, kua rauka iaku te manako ‘au e te akava ngakau mā. Kua oronga mai teia i te mataora kiaku kare rava au i kite i mua ana. Kua meitaki atu toku pirianga ki taku vaine, e toku ngutuare tangata.

 I mua ana, kua manako au e ka mataora matou me maata ta matou moni. I teianei kua kite meitaki au i te mamae ta te angaanga tarevake e te inangaro i te moni i akatupu kiaku. Kare e maata ana ta matou moni, inara kua kite au kua rauka mai tetai apinga puapinga roa atu i roto i to matou oraanga—ko tetai pirianga kia Iehova. Ko te akamorianga ia Iehova ei ngutuare tangata tei apai mai i te mataora mou tikai kia matou.