Utuutuia au ei Katorika i Rochester, New York. E varu oku mataiti, kua akatakake toku nga metua. No reira i te epetoma ka noo au ki ko i toku mama i te ngai tau ua, e i te openga epetoma, ka noo au ki toku papa i te ngai apinganui. Te kite anga au i toku mama e tauta pakari ra kia utuutu e toko ono tamariki, kua moemoea au kia tauturu i toku ngutuare tangata na te riro anga mai ei tangata ona mirioni.

 Kua inangaro a papa kia manuia toku oraanga, no reira kua tono aia iaku kia atoro i tetai apii rongonui no te akaaere otera. Reka tikai au i te reira e kua aere ki tera apii, ma te manako e te pau maira te Atua i taku pure no te riro mai ei tangata ona mirioni e te mataora. E rima mataiti taku apii anga i te akaaere otera, te angaanga pitiniti, e te turanga pae moni o te au pitiniti maata e i taua taime rai te angaanga ra au i ko i te otera pere moni i Las Vegas, Nevada.

 E 22 oku mataiti, kua riro mai au ei tauturu no tetai akaaere maata o te otera pere moni. Kua riro mai au ei tangata ona mirioni e te manuia roa, ka kai putuputu au i te kai memeitaki roa e ka inu i te uaina e te kava oko maata. Ka karanga ua rai toku au oa angaanga, “E akamou i toou manako ki runga i te mea puapinga roa atu i teianei ao—⁠te moni.” To ratou manako, ko te moni te ravenga e rauka ai te mataora mou.

 I taku ngai angaanga, naku e tiaki i te aronga apinganui tei aere mai ki Las Vegas no te pere moni. Noatu e aronga ona mirioni ratou, i te akara anga kare ratou e mataora ana. Kua akamata katoa toku mataora i te ngaro. Ko te tika, te maata atu taku moni ko te maata atu toku apiapi e kare au e moe meitaki ana i te po. Kua tamanako au i te tamate i toku oraanga. I te mea kua ō mai te manako ekoko no runga i toku oraanga, kua uri au ki te Atua ma te pati kiaia, “Akapeea e rauka ai iaku te mataora mou?”

 I tera taime, kua neke toku nga tuaine e nga Kite raua no Iehova ki Las Vegas. Noatu kare au e āriki i ta raua puka, kua akatika au kia tatau kapiti matou i te Pipiria e kia taangaanga au i taku uaorai Pipiria. I roto i taku Pipiria, kua akairaia te au tuatua a Iesu. No te mea ka āriki ua au i te au tuatua pouroa a Iesu, kua uriuri matou i tana i tuatua. Kua tatau katoa au i taku Pipiria me ko au anake ua.

 Poitirere tikai au i taku i tatau. Ei akaraanga, karanga a Iesu: “Kia pure kotou, auraka e maata te tuatua rikiriki puapinga kore, mei ta te au etene ra: ko tei manako e, tei te rai o te tuatua e kiteia mai ei ratou.” (Mataio 6:7) Inara, kua oake mai te orometua i tetai tutu no Iesu e kua karanga mai me pure au ki tera tutu, ma te taiku i te Pure a te Atu e te Pure kia Maria e tai ngauru taime, ka oake mai te Atua i te moni taku ka pati atu. Inara kua tamanako au e me ripiti ua i taua tuatua rai kare ainei e e maata te tuatua rikiriki puapinga kore? Tatau katoa au i ta Iesu tuatua: “Auraka kotou e akametua i tetai tangata i teianei ao: okotai rai oki o kotou Metua, ko tei noo i te rangi.” (Mataio 23:9) No reira kua ui au kiaku uaorai, ‘Eaa au e toku au oa Katorika i kapiki ei i to matou orometua e “Metua”?’

 I te tatau anga au i te puka Pipiria o Iakobo i akamata ai au i te ekoko i toku turanga puapinga i teianei ao. I te pene 4 kua tata a Iakobo: “Kare kotou i kite e ko te anoano i teianei ao, e enemi ïa i te Atua ra? E teianei ko te anoano e ei oa aia no teianei ao, e enemi ïa tangata no te Atua.” (Iakobo 4:4) Kua umere roa au i te irava 17: “E teianei ko te tangata i kite i te rave i te mea meitaki, e kare i rave, kua riro ïa ei ara nana.” I reira rai kua ringi au i toku nga tuaine i te akakite kia raua ka akamutu au i taku angaanga i ko i te otera pere moni no te mea kua ō mai te au peu kare au e mareka akaou ana, kapiti mai te pere moni e te noinoi.

 Inangaro au i te akameitaki atu i toku pirianga ki te Atua e pera ki toku nga metua e te ngutuare tangata. No reira kua iki au kia akamāmā mai i toku oraanga kia maata te taime no te rave i te reira. Inara kare teia au tauianga i te mea māmā. Ei akaraanga, kua orongaia tetai au patianga kia tere ki mua i roto i te angaanga pitiniti otera e ka taki rua me kore taki toru taime te maata o te moni taku ka koʼi. Inara i muri ake i te pure anga no runga i te reira, kua iki au e kare teia i te oraanga taku ka inangaro. Kua akaruke au i taku ngai angaanga, kua neke ki roto i te ngai pāka motoka i te kainga o toku mama, e kua akamata i tetai manga pitiniti no te nenei i te papaanga kai a te au are kaikai.

 Noatu kua tauturu te Pipiria iaku kia kite i te mea puapinga i roto i te oraanga, kare rai au e aere ki te au uipaanga a te Au Kite o Iehova. Kua ui toku nga tuaine eaa toku manamanata no te Au Kite. Pau atu: “No to kotou Atua ko Iehova, nana e akatakake i te au ngutuare tangata. Te taime ua ka rauka iaku i te akapou i toku tuatau ki toku ngutuare tangata, ko te tuatau Keritimiti e te rā anauanga, e kare kotou e piri mai ki teia au orote.” Kua akamata toku tuaine i te aue e kua ui kiaku: “Teiea koe i te au rā ke o te mataiti? Ka inangaro maua te akapou i te taime kia koe i te au rā katoatoa. Inara ka inangaro ua koe i te aere mai i tera au orote—e no te mea kua māroia koe kia aere mai.” Kua puta toku ngakau i tana tuatua e kua aue maua.

 Te mārama anga au e te akaperepere ra te Au Kite o Iehova i to ratou ngutuare tangata—e kua tarevake au—kua iki au kia aere ki tetai o ta ratou uipaanga i ko i te Are Uipaanga Patireia. I reira kua aravei au ia Kevin, e puapii Pipiria tukatau tei akamata i tetai apii Pipiria kiaku.

 E oraanga tau e te māmā ua to Kevin raua ko tana vaine tei akatika ia raua kia akapou maata i te taime no te tauturu i etai ke kia mārama i te Pipiria. Pera katoa kua rava ua ta raua moni i koʼi no te tutaki i to raua patete ki Aperika e Central America, te au ngai e tauturu ra raua i te pātu i te au opati Betela o te Au Kite. E oraanga mataora tikai to raua e kua akaperepere raua i tetai e tetai. Manako au, ‘Ko teia oraanga taku i moemoea tikai.’

 Akaari mai a Kevin i tetai vitio ka rauka te mataora mei te angaanga mitinari, e kua iki au ko teia taku ka inangaro kia rave. I te mataiti 1995, muri ake i te apii matatio anga i te Pipiria e ono marama, kua papetitoia au ei Kite no Iehova. Teianei, kare au e pati akaou i te Atua kia ona mirioni au mari ra ka pure au: “Auraka e tukuia mai te putaua e te apinga nui iaku nei.”—⁠Maseli 30:8.

 Kitea e au te apinganui mou tikai—⁠kare i te pae moni mari ra i te pae vaerua. Kua akaipoipo au i taku vaine akaperepere ko Nuria i Honduras, e te tavini kapiti nei maua ei nga mitinari i Panama e Mexico. Tika rava ta te Pipiria e karanga ra: “Na Iehova te meitaki i apingaʼi te apinga, kare oki e kapiti katoaia mai te kino i te reira”!—⁠Maseli 10:22.