I te 2011, kua aere tetai tangata tuitarere ki Norway no Eritrea mai. Te atoro anga te Au Kite o Iehova iaia, akakite aia e kua aravei aia i te Au Kite i tona enua. Karanga aia, iaia i roto i te vaeau, kite ana aia i te Au Kite tei tapekaia no to ratou akarongo no tei patoi i te angaanga vaeau, noatu e kua takinokinoia ratou.

 Kua tupu tetai apinga kiaia e kua aere aia ki roto i te are auri. Iaia i reira kua aravei aia tokotoru Au Kite—ko Paulos Eyasu, Negede Teklemariam, e Isaac Mogos—tei tukuia ki roto i te are auri no to ratou akarongo mei te 1994 mai.

 Iaia i roto i te are auri, kua kite meitaki teia tangata e kua taangaanga te Au Kite o Iehova i ta ratou i apii. Kite aia i to ratou tu tika e kua tuʼa i ta ratou kai ki te au mouauri. Kite meitaki aia i te au mouauri Au Kite te apii kapiti anga i te Pipiria i te au rā e kua pati i tetai pae kia piri mai. Te orongaia anga te tuatau kia tuku ia ratou kia aere, na te taina anga i tetai pepa no te akaruke i to ratou akarongo, kua patoi ratou.

 Kua riro teia ei akakeu i teia tangata ngakau tae, te noo anga aia i Norway, inangaro aia te kite akapeea te akarongo o te Au Kite o Iehova i matutu ei. No reira, te aravei anga te Au Kite iaia, kua akamata viviki aia i te apii i te Pipiria e kua aere ki te au uipaanga.

 Ia Tepetema 2018, kua papetitoia aia ei Au Kite no Iehova. Te taangaanga nei aia i te tuatau no te aravei i te tangata no Eritrea e Sudan, te akamaroiroi ia ratou kia apii i te Pipiria kia rauka te akarongo matutu.